Ձեր վստահելի աղբյուրը

Խորհրդարանում ճամպրուկային տրամադրություններ են։ Ազգային ժողովը ճանապարհում է հնաբնակներին և պատրաստվում դիմավորել նորեկներին։

Դատարկ միջանցքներ, աշխատասենյակի նախկին տիրոջ անունը ծանուցող պոկված ցուցանակներ, իրերի տեղափոխություն, ու մեկ էլ մանրահատակի լաքի թարմ հոտ։ Մինչ նորընտիր խորհրդարանականները պատրաստվում են առաջիկայում տեղափոխվել օրենսդիր մարմին, այստեղ մեծ թափով շինարարական աշխատանքներ են ընթանում։

Իսկ պատգամավորների մեծ մասի աշխատասենյակների դռներն այսօր փակ էին։ Միջանցքում հանդիպող ԱԺ աշխատակիցները նշեցին, որ վերջի օրերին խորհրդարանականների հազվադեպ են տեսնում։ Մենք ինքներս էլ համոզվեցինք, որ գեթ մեկ պատգամավոր աշխատավայր չէր ներկայացել ոչ ՀՀԿ, ոչ էլ ՀՅԴ խմբակցությունից։ Որոշ պատգամավորների աշխատասենյակների դռներ էլ թեև բաց էին, բայց այնտեղ միայն վերջիններիս օգնականներն էին։ 

Յոթերորդ գումարման խորհրդարան չանցած կուսակցությունների խմբակցությունների փորձագետները մեզ հետ զրույցում սրտնեղեցին, որ բառացիորեն մի քանի օրից գործազուրկ են դառնալու, ստիպված են լինելու Նոր տարվան ընդառաջ կամ տոներից հետո աշխատանք փնտրել։















ԱԺ միջանցքներում հանդիպեցինք միայն «Լուսավոր Հայաստան» կուսակցության կողմից պատգամավորության  թեկնածու առաջադրված, Երևանի ավագանու անդամ Անի Սամսոնյանին, ով մեզ հետ զրույցում նշեց, որ թեև առայժմ չգիտի իր աշխատասենյակի տեղը, սակայն որոշ գործեր ավարտելու համար այսօր եկել է խորհրդարան։

Հարցին՝ ինչպես է պատկերացնում օրենսդիր մարմնում իր աշխատանքը, նա նշեց, որ ճիշտ այնպես, ինչպես Երևանի ավագանիում՝ սկզբունքային։ «Այս առումով որևէ բան չի փոխվելու, մեծանալու է պատասխանատվությունը, որոշումների կայացման շրջանակը, ինչպես նաև ինքս իմ նկատմամբ պահանջկոտությունը»,- ասաց Անի Սամսոնյանը։

Իսկ ի՞նչ է թողել Երևանի ավագանիում և ինչ է պատրաստվում բերել Ազգային ժողով, հետաքրքրվեցինք։ «Ավագանիում թողել եմ մի քանի չավարտած խնդիրներ, որոնք կփոխանցեմ իմ գործընկերներին։ Բայց այստեղ էլ կբերեմ ավագանիում լուծում չգտած խնդիրներ, որոնք լուծելի են օրենսդրական մասշտաբով»,- ասաց ավագանու անդամը։



ԱԺ աշխատակազմի ղեկավարի տեղակալ Արսեն Բաբայանն էլ Panorama.am-ի թղթակցի հետ զրույցում հայտնեց, որ նախոդ գումարման խորհրդարանի պատգամավորների աշխատասենյակների հանձնման-ընդունման գործընթացը մի քանի օր է՝ մեկնարկել է։

«Պատգամավորները, ովքեր արդեն գիտեն, որ չեն լինելու նորընտիր խորհրդարանում, իրենց սենյակներն ազատել ու հանձնել են։ Դրանք, ըստ կարգի, փոխանցվելու են նորընտիր պատգամավորներին, սակայն նրանցից  ոչ ոք դեռևս իրեր չի բերել։ Երբ Կենտրոնական ընտրական հանձնաժողովը կբաշխի մանդատները, կներկայացվեն հանձնաժողովների նախագահները, խմբակցությունների ղեկավարները, այդ ժամանակ էլ ամեն ինչ ավելի պարզ կլինի։ Այս պահի դեռևս գործում է 6-րդ գումարման Ազգային ժողովը»,- ասաց նա։

Հարցին՝ կարելի՞ է ենթադրել, որ ՀՀԿ խմբակցության պատգամավորների աշխատասենյակները կտրվեն «Իմ քայլը» դաշինքից ընտրված պատգամավորներին, Արսեն Բաբայանը պատասխանեց, որ այս այդ հարցը կլուծվի ժամանակի ընթացքում։