Ձեր վստահելի աղբյուրը

Ամանորի ու Սուրբ ծննդի տոների անբաժանելի մաս են նվերները։ Տարբեր երկրներում տոներից առաջ հարցումներ են անցկացվում, պարզելու թե ինչ են մարդիկ ավելի հաճախ սկսել իրար նվիրել։ Հայաստանում նման վիճակագրություն ու հարցում չկա։

Միտումների մասին կարելի է դատել մեր շրջապատի, բարեկամների, ընկերների՝ նվերների  ընտրության հիման վրա։

Գրքեր, խաղալիքներ, զարդեր,  պայուսակներ, դրամապանակներ, ժամացույցներ, շարֆեր, կոսմետիկա,  բրոշներ, շոկոլադ, հագուստ, հուշանվերներ. ահա առավել հաճախ արվող նվերների ցանկը։

Panorama.am-ը փորձեց պարզել, թե այս առումով  ի՞նչ են առաջարկում տեղական արտադրողները։

Այսպես, ընտրությունը մեծ է, եթե նվեր եք պատրաստելու փոքրիկների համար։

Գրախանութներում ու սովորական խանութներում վաճառվում են թեմատիկ, ժամանցային, ուսուցողական, ուշադրությունն ու տրամաբանությունը զարգացնող տեղական արտադրության սեղանի խաղեր, դոմինոներ։ Գները տատանվում են 2000 – 15 հազար դրամի սահմաններում։
Հայաստանյան հրատարակչությունների կողմից առաջարկվող մանկական գեղարվեստական, գիտահանրամատչելի գրականությունն էլ բազմազան է, բազմալեզու, գեղեցիկ պատկերազարդումներով, որակյալ ու գրավիչ կազմերով։ Այս պարագայում էլ  գները տատանվում են 1000-17 հազար դրամի սահմաններում։

Դե էլ չենք խոսում բազմաբնույթ ներկայացումների  մասին, որոնք առաջարկում են երևանյան թատրոնները։

Ամենափոքրիկների համար կարելի է գնել խաղալիքներ, այս առումով առանձնանում են Նանի-Զանիի տիկնիկները։ Ի դեպ, ընկերության տիկնիկագործները հաճախ են հանդիպում երեխաների հետ, պատմում իրենց գործի մասին։ Նանի-Զանին սկսել է նաև գոգնոցներ առաջարկել փոքրիկ աղջիկների համար։

Nazelie doll boutique –ը ևս մեկը մեկից գեղեցիկ տիկնիկներ է առաջարկում։ Էկոլոգիապես մաքուր, փայտե խաղալիքներ է առաջարկում Noy Wood-ը:  

«Secret Santa»-ի լավագույն նվերները մեզ մոտ են, հայտարարում է ՆԱԽՇԷ-ն   ու առաջարկում ամանորի թեմայով բարձեր, սփռոցներ, խաղալիքներ։

Գիշերազգեստների, տնային հագուստի ամանորյա հավաքածուն արդեն ներկայացրել է «Տոսպ»-ը։  «Մանկան»-ի արտադրած փափուկ խաղալիքները կարելի է  համադրել «Մելանտե»-ի    արտադրած հագուստի հետ։

Կանանց համար տեսականին անսահմանափակ է, ամենասիրունն ու ամենամեծ պահանջարկ վայելողը։

Ձեռագործ զարդերը, բրոշներն ու շարֆերն այս առումով առաջատար են։

Մեկը մեկից ինքնատիպ, տարբերվող ու գեղեցիկ զարդեր է առաջարկում Hulunq-ը՝ հիշեցնելով, որ «Հուլունքը» համարձակ, խելացի, կայացած, փորձարկումներից չվախեցող, հետաքրքրասեր, ինքնավստահ ու նորն ընդունելու պատրաստ կանանց համար է:

Բնական քարերով համարձակ գույներով վզնոցներ, կախազարդեր, ականջօղեր, մատանիներ է առաջարկում Rashani-ին։ Ձեռքի աշխատանքները պատրաստում են Անի Ռաշոյանը, քանդակագործ ամուսինն ու նրա եղբայրը։

Բնական չորացրած ծաղիկներով, արծաթով, կաշվով ու տարբեր կտորներով պատրաստված ամենատարբեր զարդերն առաջարկում է Lusine Harutyunyan handmade-ը։

Ձմռան ցրտին ամենապահանջված տաք շալերի առաջարկն էլ շատ է։ Ցանկացած գույնի ձեռագործ շալեր  անգորա թելից, թեթև է, փափուկ ու մատչելի։

Ազգային թեմատիկայով, որակյալ ու միաժամանակ նորաոճ արծաթե զարդեր է առաջարկում Իմ Զարդը։ 

Բնական կոսմետիկա՝ եթերայուղեր, մաշկը խոնավեցնող, սնուցող յուղեր, գունակարգավորող քսուքներ է առաջարկում Nairian-ը։  Ամանորի առթիվ այստեղ 30 տոկոս զեղչ է գործում։

Nrani-ն  նույնպես տեղական հումքից, բնական կոսմետիկ միջոցներ է արտադրում։ Հումքը Լոռու մարզում հատուկ աճեցված բույսերն ու ծաղիկներն են։

Գեղեցիկ ու թեմատիկ դիզայնով շոկոլադ են առաջարկում Nrane -ն ու «Գուրմէ Դուրմէ»-ն։ 

Ազգային տարազի կտորով պատրաստված դրամապանակներ ու պայուսակներ կարելի է գտնել  TARAZ / ՏԱՐԱԶ-ում։

Եթե տարազի զարդանախշերի սիրահար եք կամ նման մարդու համար եք նվեր փնտրում, ապա ձեզ կօգնի նաև Ղարաբաղ Կարպետը։  Մետաքսյա շարֆերի նոր տեսականին Արցախյան գորգերի զարդանախշերի և  Հայոց այբուբենի թռչնազարդ տառերի գեղեցիկ համադրումն է մետաքսի վրա։

Գլխարկներ ու ձեռնոցներ կարող եք փնտրել Nshanyan-ում։  Տղամարդկանց համար նախատեսված տեսականին գտնելու համար կարելի է դիմել «Տերյան Մշակութային կենտրոն»։  

Ժամացույցներ խորհուրդ չի տրվում նվիրել, բայց եթե արդեն նման որոշում ունեք, ապա առավել հայտնիներից է AWI-ն։  

Եթե հասցեատերը երաժշտության հետ կապ ունի, ապա այս հուշանվերները նրանց համար են։  

Իհարկե, այստեղ ներկայացված չէ տեղական արտադրանք ամբողջությամբ։ Բայց եթե այսքանից հետո էլ չեք կողմնորոշվում, թե ինչ կարելի է նվիրել, ապա փոքր հուշում՝ տեղական արտադրության խմիչքներ՝ գինի կամ կոնյակ, շոկոլադներ, օրինակ Zabel, տարբեր ֆոտոստուդիաների նվեր քարտեր... Կարևորը տեղական արտադրողին օգնելու ցանկությունն ու պատրաստակամությունն է։

Ի դեպ, Panorama.am-ը տեղական արտադրողին գովազդում է առանց վճարի։