Ձեր վստահելի աղբյուրը

Հայաստանում մանկական մահացության ցուցանիշը 2017-ին 2016-ի համամետ նվազել է 0.2-ով՝ 1000 կենդանի ծնվածի հաշվով կազմելով 8.2։ Նման տվյալ ներառված է ԱՎԿ հրապարակած Հայաստանի ժողովրդագրական ժողովածուում, որը հրապարակվել է երեկ։

Բացարձակ թվերով, 2017-ին 0-27 օրական 235 երեխա է մահացել։ Ընդհանուր առմամբ, նախորդ տարվա ընթացքում գրանցվել է 37 700  կենդանի ծնունդ, 634 մեռելածին։ Կենդանի ծնունդները պակասել են, մեռելածիները նույնպես։


 

Նույն ժողովածուի տվյալներով, նախորդ տարվա ընթացքում նորածինների մահվան առավել շատ դեպքեր գրանցվել են Կոտայքում, Շիրակում, Արմավիրում։



ՄԱԿ-ի պաշտոնական տվյալներով, ամեն տարի 30 մլն երեխա ծնվում է  վաղահաս, թերքաշ ու չզարգացած։ Նրանց ապրելու համար պետք է մասնագիտական բժշկական օգնություն։

«Միլիոնավոր նորածիններ են ամեն տարի մահանում, քանի որ չենք կարողանում օգնություն ստանալ, ինչը նրանց իրավունքն է։ Մենք պատասխանատվություն ենք կրում դրա համար»,-նշել է ՅՈՒՆԻՍԵՖ-ի ղեկավար Օմար Աբդին։

Վաղահաս ծնված երեխաներն առավել խոցելի են ծննդաբերական տրավմաների, ինֆեկցիաների նկատմամբ, նրանք հաշմանդամ դառնալու կամ մահանալու մեծ վտանգ ունեն։
«Մենք պետք է կարողանանք յուրաքանչյուր կնոջ ու երեխայի համար ապահովել որակյալ հսկողություն հղիության, ծննդաբերության ու հետծննդաբերական ընթացքում։ Մարդիկ պետք է հնարավորություն ունենա բժշկի դիմել և այդ ընթացքում չպետք է ֆինանսական դժվարությունների հանդիպեն»,-նշել է առողջապահության համաշխարհային կազմակերպության ղեկավար Սումայա Սվամինտան։

ՄԱԿ-ի պաշտոնական էջում հրապարակված տվյալների համաձայն, նախորդ տարի ամբողջ աշխարհում մահացել է 2.5 մլն նորածին, մինչդեռ կարելի էր դրա պատճառները վերացնել։

Մահացածիների 2/3-ը վաղահաս ծնված են եղել։ Վաղահաս ծնված ևս մեկ մլն երեխա ապրել է, սակայն ունեն հաշմանդամություն, քանի որ չեն կարողացել ստանալ անհրաժեշտ բժշկական օգնություն։ Զեկույցի հեղինակները վստահ են, եթե միջոցներ ձեռնարկվեն, ապա մինչև 2030 թվականը հնարավոր կլինի փրկել 2.9 մլն մարդու՝ մայրերի և նորածինների կյանք։