Ձեր վստահելի աղբյուրը

Բիզնես Արմենիա հիմնադրամն իրականացնում է բիզնեսի ընթացակարգերի պարզեցման՝ «Էլեկտրոնային կառավարումը՝ որպես օտարերկրյա ներդրումների ներգրավումը խթանելու գործիք» ծրագիրը, որն իրականացվում է Ավստրիական Զարգացման գործակալության ֆինանսավորմամբ։ Ծրագրի շրջանակում Հայաստանում ներդրվում է ՄԱԿ-ի Առևտրի և զարգացման համաժողովի (UNCTAD) «eRegulations» գործիքը և արդեն պարզեցվում են մի շարք ընթացակարգեր։

Panorama.am-ի թղթակցի հետ զրույցում Բիզնես Արմենիա հիմնադրամի Ինստիտուցիոնալ հարաբերությունների մասնագետ Բելլա Մանուկյանն ասաց, որ ծրագրի իրականացման ընթացքում ներդրվել է eRegulations գործիքը, որը շուտով հասանելի կդառնա գործարարների և օտարերկրյա ներդրողների համար։ Գործիքը հասանելի է http://armenia.eregulations.org/ կայքում, որտեղ ներկա պահին ներկայացված են ներդրումների հետ կապված 6 ընթացակարգեր։

Նրա խոսքով՝ Հայաստան այցի շրջանակում արտերկրյա փորձագետները դասընթացներ են անցկացրել Բիզնես Արմենիայի մասնագետների համար՝ գործիքի ներդրման և կիրառման վերաբերյալ։ Այժմ Բիզնես Արմենիայի մասնագետներն ինքնուրույն կառավարում են համակարգը և հրապարակում նոր ընթացակարգեր։ 

Հարցին, թե ինչ է իրենից ներկայացնում, և ինչի համար է նախատեսված «eRegulations» գործիքը, Բելլա Մանուկյանն ասաց, որ ծրագրի գլխավոր նպատակն է բարելավել երկրի ներդրումային և գործարար միջավայրը, հանգեցնելով Հայաստանի մրցունակության ամրապնդմանը:

«Համակարգն արդեն իսկ ներդրվել է ավելի քան 30 երկրներում և օգտագործվում է որպես մատչելի միջոց մի շարք վարչարարական գործընթացներ հեշտացնելու նպատակով։ Համակարգը նաև կնպաստի կոռուպցիոն ռիսկերի նվազեցմանը։ Այս հարթակի միջոցով օտարերկրյա ներդրողն առանց Հայաստան այցելելու կարող է ամբողջական տեղեկություն ստանալ երկրում բիզնես սկսելու և ծավալելու վերաբերյալ։ Օրինակ, բիզնեսի գրանցման գործընթացի համար հնարավոր է հստակ տեսնել, թե քանի քայլ է իրենից ենթադրում տվյալ գործընթացը, որոնք են շահագրգիռ մարմինները, ինչ փաստաթղթեր են անհրաժեշտ և նույնիսկ ինչ տեսք ունեն դրանք, սպասվող արդյունքը, ծախսը և տևողությունը։ Այստեղ նույնիսկ նշվում է, թե որ կառույցում հերթը միջինում որքան ժամանակ է խլում, հրապարակված է նույնիսկ այն աշխատակցի լուսանկարը, որը պետք է ընդունի փաստաթղթերը»,- ընդգծեց նա: 

Բելլա Մանուկյանը հայտնեց, որ ներկայում պարզեցված ձևաչափով ներկայացված են բիզնեսի գրանցումը (անհատ ձեռներեց, ՍՊԸ, ԲԲԸ, ՓԲԸ), մշտական և ժամանակավոր կացության կարգավիճակի ձեռքբերման և միջազգային օտարերկրյա կազմակերպության մասնաճյուղի գրանցման ընթացակարգերը։ Ապագայում հասանելի կդառնան՝ մտավոր սեփականության գրանցումը, անշարժ գույքի վաճառքն ու վարձակալությունը, Ազատ տնտեսական գոտում գործունեություն ծավալելը, ծագման հավաստագրի ստացումը, կառուցապատման թույլտվության ստացումը, ինչպես նաև կոմունալ ծառայություններ մատուցողների հետ բաժանորդային պայմանագրերի կնքումը։

«Ընթացակարգերի պատկերավոր և քայլ առ քայլ ներկայացումն ինքնին համարվում է գործընթացի պարզեցում։ Հարթակի միջոցով օգտատերերը կարող են նաև իրենց բողոքներն ու առաջարկությունները ներկայացնել առցանց»,- նշեց նա:

Դիտարկմանը, թե ինչու՞ են պարզեցվում միայն այս ընթացակարգերը և ոչ թե բիզնեսին առնչվող ցանկացած ընթացակարգ, Հիմնադրամի Ինստիտուցիոնալ հարաբերությունների մասնագետն ասաց՝  կոնկրետ որ ընթացակարգը պարզեցվի, որոշվել է Բիզնես Արմենիայի ներդրումների աջակցության խմբի առօրյա աշխատանքի արդյունքում։ Դրանք, ըստ նրա,  ընտրվել են գործարարների հարցումների հիման վրա և այս պահի դրությամբ առանձնացվել 12 ընթացակարգեր, որոնք առաջիկայում կլրացվեն հարթակում. «Միաժամանակ, հարկ է նշել, որ ներկայացվող ընթացակարգերի քանակի վրա համակարգը սահմանափակում չունի»:

Նա նաև ասաց, որ «eRegulations» համակարգի ներդրումը փուլային է, այսինքն՝ յուրաքանչյուր ընթացակարգի մշակումից և շահագրգիռ գերատեսչության կողմից հաստատվելուց հետո այն հասանելի է դառնում ներդրողների և գործարարների համար։

Հարցին՝ որքանո՞վ կարող ենք վստահ լինել, որ համակարգն արդյունավետ կլինի և թե արդյոք կարո՞ղ է լիարժեքորեն նպաստել բիզնեսի գործը հեշտացնելուն, Բելլա Մանուկյանը պատասխանեց. «Ինչպես արդեն նշեցի, այս գործիքը հաջող կերպով ներդրվել և օգտագործվում է ավելի քան 30 երկրներում։ Իսկ Հայաստանում այն առաջինն է, որ այսքան մանրամասնությամբ ներկայացնում է կարևոր ընթացակարգեր գործարարի տեսանկյունից։ Իսկ արդյունավետության մասին խոսելիս, կընդգծեի, որ հոկտեմբերի 24-ին Շվեյցարիայում տեղի ունեցած Համաշխարհային ներդրումային համաժողովի ընթացքում բիզնեսի գրանցումը դյուրինացնելու իր ջանքերի համար Հայաստանը ՄԱԿ կողմից պարգևատրվեց «Ձեռնարկությունների գլոբալ գրանցման» հավաստագրով։ Բիզնեսի գլոբալ գրանցման https://ger.co հարթակում Հայաստանն ունի 10/10 միավոր և առաջատար է 130 երկրների շարքում»: