Ձեր վստահելի աղբյուրը

ՀՀ ոստիկանության պետ Վալերի Օսիպյանն այսօր կառավարության նիստից հետո լրագրողների հետ զրույցում հերքեց տեղեկությունները, թե այս օրերին մեծ թվով քրեական հեղինակություններ են այցելել Հայաստան:

Արձագանքելով այն քննադատություններին, թե այս իշխանությունների օրոք ևս քրեական հեղինակություններն ազատ ելումուտ ունեն հանրապետություն, ոստիկանապետն ասաց. «Այսպես կոչված, «օրենքով գողերը», նախքան գող լինելը, մարդ են և օգտվում են Սահմանադրությամբ իրենց ընձեռված իրավունքներից ու պարտականություններից։ Սակայն այդ լուրերն իրականությանը չեն համապատասխանում։ Երբևէ, ձեզ ասում եմ պաշտոնապես, Հայաստանում կրիմինալը չի եղել հսկողության տակ այնպես, ինչպես այսօր է»։

Վալերի Օսիպյանը նշեց, որ օրերս եղել է քրեական հեղինակություն համարվող Արտյոմ Կանևսկոյի եղբոր հիշատակի արարողությունը, նրանք հարազատներով այցելել են նրա շիրիմին։ «Հարազատներով այցելել են գերեզմանատուն. «Ոստիկանությունը դրա մասին տեղյակ է, նախապես էլ է տեղյակ եղել։ Օպերատիվ կանխարգելիչ միջոցառումներ է իրականացրել։ Եվ դուք, և հասարակությունը վստահ եղեք, որ մենք այսօր տիրապետում ենք ամեն մի փոքր, չնչին տեղաշարժի»:

Լրագրողի դիտարկմանը՝ ճիշտ են լուրերը, որ Ալեքսանդր Սարգսյանի որդուն՝ Նարեկ Սարգսյանին, կարողացել են հայտնաբերել քրեական հեղինակություն համարվող անձի օգնությամբ, Վալերի Օսիպյանը պատասխանեց. «Եթե որևէ մեկը կարող է ապացուցել, որ ոստիկանությունը համագործակցել է, ես այս պահին հրաժարական կտամ իմ այս բարձր պետական պաշտոնից: Չի կարող  նման բան լինել:  Կրիմինալը մարդ է, բայց եթե ինքն իր տեղը խախտի, ապա քրեական հիմնարկն է լինելու իր տեղը»:

Անդրադառնալով օրեր առաջ  որոշ քրեական հեղինակությունների ազատ արձակմանը, ոստիկանապետը նշեց, թե իրենց համար որևէ դժվարություն չի ստեղծվում, քանի որ ոստիկանությունն այսօր կաշկանդված չէ, ավելին՝ միևնույն է, թե որ բանտարկյալն է ազատ արձակվում։ «Մենք այս պահին էլ  բոլորի նկատմամբ իրականացնում ենք համապատասխան օպերատիվ միջոցառոըւմներ»,- ասաց նա՝ հավելելով, որ օրինակ, ընտրություններին որևէ մեկը չի միջամտել, ավելին՝ քրեական հեղինակությունները նախընտրել են հեռանալ Հայաստանից։

Խոսելով համաներմամբ ազատ արձակվածների մասին՝ Վալերի Օսիպյանը հայտնեց, որ համաներմամբ ազատվածների մեջ արդեն կրկնակի հանցագործություն կատարածներ կան։ Նա նշեց, որ իրենց մտահոգությունների մասին կխոսեն տարեվերջյան ամփոփիչ ասուլիսում: