Ձեր վստահելի աղբյուրը

«Ըստ պայմանագրի՝ Երևանում ձնամաքրման աշխատանքները նույնպես կատարում է «Սանիտեք» ընկերությունը։ Այս ամենը մենք որպես ժառանգություն ենք ստացել նախորդ իշխանություններից։ Այս ժառանգությունը մենք ստացել ենք, և այս պահին փորձում ենք շտկել իրավիճակը՝ թե աղբահանության, թե ձյան մաքրման մասով»,- այսօր լրագրողների հետ զրույցում ասաց Երևանի քաղաքապետ Հայկ Մարությանը՝ ի պատասխան այն հարցին, թե պատրա՞ստ է արդյոք քաղաքապետարանն առաջին ձյանը և արդյոք առաջին ձյան տեղալով խնդիրներ չեն ծագի։

«Մենք արդեն այցելել ենք «Սանիտեք» ընկերութուն, ստուգել, թե ինչ վիճակում է իրենց տեխնիկան, արդյոք ունեն աղի բավականաչափ կուտակված քանակ, և արդյոք աշխատուժը կբավարարի, թե ոչ։ Կարող եմ վստահեցնել, որ տեխնիկայի այն քանակը, որն անհրաժեշտ է Երևան քաղաքը լիարժեք կերպով սպասարկելու համար, ընկերությունը չունի։ Մենք բանակցել ենք «Սանիտեքի» հետ, որպեսզի նա ունենա ենթակապալառուներ, որոնք իրենց վրա կվերցնեն այս կամ այն վարչական շրջանը։ Մենք բանակցել ենք նաև տարբեր ճանշինների հետ, որ իրենց տեխնիկան վարձակալությամբ տրամադրեն «Սանիտեքին»։ Հույս ունեմ, որ ունենալով տեխնիկայի այս ամբողջ քանակը՝ կկարողանանք հաղթահարել ձմռան դժվարությունները»,- ասաց քաղաքապետը։

Հայկ Մարությանը նշեց՝ ամեն ինչ արվելու է՝ օգնելու «Սանիտեքին», սակայն ավագանու ուժերը սահմանափակ են, բյուջեում գումարներ չկան։ Այն, ինչն արվելու է, արվելու է էնտուզիազմի հաշվին։

«Չեն լինելու ընտրովի ձնամաքրման աշխատանքներ։ Եթե նախկինում  մաքրվում էր որևէ պաշտոնյայի տան դիմացը կամ այն դպրոցը, ուր հաճախում էին նրան երեխաները, մենք նման բաները բացառում ենք։ Շեղումներ չեն լինելու»,- հավաստիացրեց քաղաքապետը։

Բացօթյա առևտրի մասին

Անդրադառնալով բացօթյա առևտրի թեմային՝ Հայկ Մարությանը նշեց, որ ինքը մշտապես շրջում է Երևանի փողոցներով, քաջատեղյակ է խնդրին։

«Ինձ մոտենում են երկու կողմի քաղաքացիներին էլ։ Մի կողմը պահանջում է, որ ապօրինի առևտուր չիրականացվի, մյուս կողմը՝ հենց առևտուր անողները, ասում են, որ տուն են պահում և հանապազօրյա հաց վաստակում։ Մենք, այնուամենայնիվ, պետք է օրինականությունը պահենք։ Հունվարի 1-ից ապօրինի առևտրին մոտեցումը շատ ավելի խիստ է լինելու։ Մինիմումի ենք հասցնելու։ Ցավոք, մարդիկ հեղափոխությունը կապում են են ամենաթողության հետ։ Աշխատանքներ են տարվում ոչ միայն բիրտ ուժով, այլ նաև բացատրելով, ինչը մեզնից մի փոքր ժամանակ է պահանջում»,- հավաստիացրեց Երևանի քաղաքապետը։

Տրանսպորտի մասին

Ինչ վերաբերում է քաղաքային տրանսպորտին՝ Հայկ Մարությանը նշեց, որ շատ հաճախ օգտվում է մետրոյից, երբեմն նաև ավտոբուս և երթուղային է նստում։

«Ասում եմ, որ բարեփոխելու ենք և բարեփոխում ենք։ Նորից պետք է ասեմ. մենք ժառանգություն ենք ստացել տրանսպորտային համակարգ, որը գրեթե քանդված է։ Երթուղային տաքսիներն իրենց մաշվածության մասով եզրին են հասել։ Նախորդ իշխանությունները բազմիցս հայտարարել են, որ փոխելու են տրանսպորտային ցանցը, բայց նրանք ուղղակի ոչ միայն ճիշտ չեն իրազեկել, այլև տնտեսավարողներին մեսիջ են տվել, որ փոխելու են, և այդ մարդիկ ոչ մի լումա չեն ներդրել իրենց տրանսպորտային միջոցների մեջ։ Սա մեզ «նվեր» են արել նախկին իշխանությունները։ Այն խոստումները, որոնք նրանք ասել և չեն իրականացրել, մենք ասում ենք և իրականացնելու ենք։ Ամբողջական ցանցը փոխելու համար առնվազն երկու տարի ժամանակ է պետք»,- հավաստիացրեց քաղաքապետը։

Հայկ Մարությանը տեղեկացրեց, որ առաջիկայում՝ արդեն հունվար-փետրվար ամիսներին, սպասում են բրիտանական մի ընկերության չափումներին, ինչից հետո կկարողանա նախաձեռնել տրանսպորտային ցանցի փոփոխոխությունը։

Աղբահանության մասին

«Մենք մնում ենք այն համոզմունքին, որ Երևանը պետք է առնվազն երկու օպերատոր ունենա, եթե ոչ՝ երեք կամ չորս։ «Սանիտեքն» ունի մեքենաների պակաս։ Իրենք գիշեր-ցերեկ են աշխատում, որովհետև մենք ենք իրենց ստիպում։ Մենք հորդորել ենք, որ ենթակապալառուներ վերցնեն, ինքնուրույն չեն կարողանում անել։ Մեղավորը բնականաբար «Սանիտեքն» է, բայց մեղադրում եմ նաև հին իշխանություններին, որ մեկ ընկերության  են թույլ տվել աղբահանությամբ զբաղվել»,- ասաց Հայկ Մարությանը։

Հարցին՝ ի՞նչն է հիմա խանգարում նախաձեռնել երկրորդ օպերատորի մուտքը՝ քաղաքապետը նշեց, որ առաջինը հենց «Սանիտեքը» շահագրգռված չէ նմանօրինակ երկրորդ ընկերության մուտքով։

«Չեմ ուզում շատ չակերտներ բացել, որովհետև դա կխանգարի բանակցություններին, բայց հավատացնում եմ, որ իրենց հետ շատ երկար աշխատելուց հետո հասել ենք նրան, որ իրենք ասեցին, որ կզրուցեն իրենց մի քանի սեփանակատերերի հետ և կսկսեն մտածել երկրորդ օպերատորի մասին։ Սա լավ է նրանով, որ մենք չենք գնում դատական պրոցեսով, այլ իրենք ինքնակամ համաձայնում են գալ այս կետին»,- ասաց Հայկ Մարությանը։

Քաղաքի բյուջեի մասին

Երևանի քաղաքապետը հավաստիացրեց՝ իրենց գլխավոր նպատակը եղած գումարներն առավելագույնս արդյունավետ ծախսելն է։  «Նույն աշխատանքը կատարվելու է՝ ավելի ցածր գնով։ Մենք բացառելու ենք գումարների փոշիացումը, մենք փորձելու ենք հասկանալ՝ ինչպես է ծախսվելու յուրաքանչյուր լուման, և եթե որևէ համատիրություն «արանքում» ցանկանա համայնքի հաշվին գումար գրպանել, մենք դա թույլ չենք տալու»,- ընդգծեց Հայկ Մարությանը։

Անդրադառնոլով գործուղումների թեմային՝ նա հավաստիացրեց, որ անձամբ ինքը շահագրգռված չէ ինչ-որ տեղ մեկնել, քանի որ այստեղ բազմաթիվ գործեր ունի, աշխատանքի գալիս է առավոտյան ժամը 8։00-9։00-ին և տուն գնում գիշերվա ժամը 1։00-ին։
«Անկախ ամեն ինչից՝ փետրվարին մենք բյուջեում ուղղումներ ենք ունենալու»,- ամփոփեց քաղաքապետը։