Ձեր վստահելի աղբյուրը

«Փյունիկի» սեփականատեր Արթուր Սողոմոնյանն այսօր հանդիպել է լրագրողների հետ և ամփոփել ավարտվող տարին: Գործարարի խոսքերով` Հայաստանի առաջնությունում տեղի են ունեցել արմատական փոփոխություններ: Առաջին հերթին` ավելացել է Բարձրագույն խմբի մասնակից ակումբների քանակը և դա, բնականաբար, դրական տեղաշարժ է հայկական ֆուտբոլում:

«Հայաստանի առաջնությունն ավելի հետաքրքիր է դարձել և նախորդ տարիների համեմատ ուժեղացել է: Խաղերն անկանխատեսելի են, ընդգծված հետնապահներ չկան: Յուրաքանչյուր թիմ առաջատարների հետ կարող է կռիվ տալ: Իհարկե, դեռ անելիքներ շատ կան: Մեր խնդիրը երկրպագուներին խաղադաշտ բերելն ու ֆուտբոլն ավելի պահանջված ու մասսայական դարձնելն է:

Հաջորդ տարվա հետ կապված լուրջ նպատակներ ունենք: Նախատեսում ենք «Փյունիկի» մի քանի մասնաճյուղ հիմնել մարզերում: Այսօր հայկական մանկապատանեկան ֆուտբոլում շատ մեծ է մարզերում ակադեմիաների ստեղծման պահանջը: Տրամադրված ենք լավատեսորեն: Մեկնել եմ Մադրիդ, հանդիպել եմ իսպանական «Լեգանես» ակումբի ղեկավարության հետ և համագործակցության պայմանագիր ենք ստորագրել»,- ասել է Սողոմոնյանը:

Գործարարը տեղեկացրել է, որ հունվարի վերջին «Փյունիկի» երեխաներից 6-ը կմեկնի փորձնական վերապատրաստման և եթե ամեն ինչ լավ ընթանա, գարնանը 1,5-2 ամսով կուղևորեն ավելի լուրջ վերապատրաստման: Սողոմոնյանի կարծիքով` հայկական ֆուտբոլը մոտ է իսպանականին, հենց այդ պատճառով էլ ընտրությունը կանգ է առել «Լեգանեսի» վրա:

«Մեզ դուր եկավ «Լեգանեսի» մարզաբազան, մոտեցումը, ջերմ ընդունելությունը: Եվրոպայում սկզբում մեծացնում են անհատականության, հետո ֆուտբոլիստի: Այսօր ֆուտբոլը վաղուց հասարակ մրցակցությունից վերածվել է սոցիալական կյանքի, քաղաքականության, բեզնեսի: Նախատեսում ենք համագործակցել նաև իտալական ակումբների հետ»,- տեղեկացրել է Սողոմոնյանը:

Արթուր Սողոմոնյանը նշեց, որ մտադիր է առաջիկա 3 տարում 10-15 մլն դոլարի ներդրում կատարել հայկական ակումբում: «Փյունիկի» մարզաբազայի հարևանությամբ կա տարածք, որը պատկանում է պետությանը և իրենք աշխատում ենք այդ տարածքը գնելու ուղղությամբ` լիարժեք մարզաբազայի և նոր մարզադաշտի կառուցման նպատակով: