Ձեր վստահելի աղբյուրը

Երուսաղեմի հայոց  պատրիարքարանի դիվանապետ Հովնան Բաղդասարյանը կարծում է՝ պետք է ոչ թե լուծարել Սփկուռքի նախարարությունը, այլ ընդլայնել դրա գործառույթները, ապա կոչել Սփյուռքի ու հայրենադարձության նախարարություն։

Վկայակոչելով Իսրայելի փորձը, հոգևորականը նկատում է, հայրանեդարձություն կազմակերպելը  դյուրին գործ չէ, և եթե այն չկրի համակարգված բնույթ, ապա ձախողելու հավանականությունը բարձր է։

Նա հիշեցնում է Փաշինյանի կոչերն ու հարց հնչեցնում՝ ո՞վ պետք է համակարգի հայրանեդարձության աշխատանքը։

«Արդէն մի քանի օր է, համացանցում բուռն կերպով քննարկւում է Սփիւռքի, եւ ոչ միայն Սփիւռքի, նախարարութեան, լուծարման հարցը:
Լուծարմանը դէմ արտայայտուողները հիմնականում բերում են երկու փաստարկ, թէ ինչու պէտք չէ լուծարել նախարարութիւնը.
1. Լուծարման արդիւնքում մեծ թուով աշխատողներ գործազուրկ կը դառնան,
2. Սփիւռքի հետ կապը կը խզուի:
Յիրաւի, Սփիւռքի նախարարութեան ստեղծումից ի վեր, բաւական ինտենսիւ աշխատանք է տարուել Հայաստան-Սփիւռքը կապը զարգացնելու եւ արդիւնաւետ դարձնելու ուղղութեամբ: Նախարարութիւնը, իր հնարաւորութիւնների շրջանակում, օգտակար է եղել Սփիւռքի բոլոր կառոյցներին: Կասկածից վեր է, որ Սփիւռքի նախարարութեան աշխատանքը եղել է արդիւնաւետ եւ բեղմնաւոր: Ուստի, պէտք է եզրակացնել, որ լուծարման որոշումը պայմանաւորուած է ոչ թէ նախարարութեան անարդիւնաւետ աշխատանքով, այլ պարզապէս կայացուել է քաղաքական որոշում:

Ի՞նչ կարելի է անել այս դէպքում, նախարարութիւնը չլուծարելու համար:

Թաւշեայ հեղափոխութիւնից յետոյ, Հայաստան են վերադարձել Սփիւռքում ապրող շատ հայեր: Մեծարգոյ վարչապետ տիար Փաշինեանը տարբեր առիթներով կոչ է արել սփիւռքահայ մեր հայրենակիցներին` հայրենադարձուելու: Սա ուրախալի փաստ է, սակայն, նկատի ունենալով Իսրայէի փորձը, պէտք է արձանագրենք, որ հայրենադարձութիւն կազմակերպելը դիւրին գործ չէ, եւ եթէ այն չկրի համակարգուած բնոյթ, ապա ձախողուելու հաւանականութիւնը շատ բարձր է: Արդ, հարց է ծագում ո՞վ պէտք է համակարգի հայրենադարձութեան աշխատանքը:

Ըստ իս` այս գործը լաւագոյնս կարող է համակարգել Սփիւռքի նախարարութիւնը: Պարզապէս պէտք է չլուծարել Սփիւռքի նախարարութիւնը, այլ` ընդլայնել դրա գործառոյթները, ներառելով դրանց մէջ նաեւ հայրենադաձութեան համակարգումը փոխել նախարարութեան անունը եւ կոչել այն Սփիւռքի եւ Հայրենադարձութեան նախարարութիւն»,-ֆեյսբուքյան իր էջում գրել է Երուսաղեմի հայոց  պատրիարքարանի դիվանապետ։