Ձեր վստահելի աղբյուրը

Քաղաքապետարանը կարող է լուծարել «Սանիթեք» ընկերության  հետ կնքված պայմանագիրը։ Երևանի ավագանու ընթացող  նիստում հայտարարեց Երևանի ավագանու «Լույս» խմբակցության ղեկավար Դավիթ Խաժակյանը՝ անդրադառնալով Երևանի զարգացման հնգամյա ծրագրին։ 

Նա նաև ընթերցեց պայմանգրի 5-րդ գլուխը՝ «Լուծարում քաղաքապետարանի կողմից», որը սահմանում է պայմանագրի լուծման հիմքերը. «Եթե կապալառուն հրաժարվել է պայմանագրից կամ չնայած լիազորված պաշտոնատար անձի գրավոր զգուշացումներին, ներառյալ ձախողման մասին ծանուցումները, ձախողել է ծառայությունների հավուր պատշաճի տրամադրումը կամ այլ կերպ շարունակաբար, հիմնարար կերպով շարունակել է խախտել  իր պայմանագրով սահմանված պարտավորությունները, ապա նման ցանկացած հանգամանքներում քաղաքապետարանը առանց ձեռք բերված իրավունքների կամ քաղաքապետարանի հնարավոր տիրապետման տակ գտնվող փոխհատուցման կամ այլընտրանքային, լրացուցիչ միջոցների սահմանփակման իրավունքի անմիջապես ուժի մեջ մտնող գրավոր ծանուցմամբ, կարող է լուծել սույն պայմանագիրը»։

Խաժակյանը նշեց, պայմանագրի համաձայն, լուծարումից հետո ընկերության ունեցած ողջ գույքը, կազմը անցնում է քաղաքապետարանին։

«Մենք նրանց հետ մտել ենք քննարկման մեջ, քննարկում ենք՝ լուծարե՞լ այդ պայմանգիրը, թե՞ ոչ։ Սա անհասկանալի է։ Գործընթացը լավատեսություն չի ներշնչում։ Ես պաշտոնապես հայտնում եմ, որ «Սանիթեք»-ի հետ կապված ցանկացած խնդիր լինելու է այս քաղաքային իշխանության պատասխանատվությունը այն պարզ պատճառով, որ մենք հնարավորություն ունենք ընկերության հետ կնքված պայմանագիրը լուծել անմիջապես մեջբերածդ դրույթով, բայց մենք այն չենք իրականացրել»,-ասաց Խաժակյանը։

Խմբակցության ղեկավարի խոսքով, ինքը լավատեսորեն է տրամադրված, ակնկալում է, որ պայմանագիրը կլուծվի, նաև վստահեցրեց, որ որքան հետաձգվում է որոշման կայացումը, այնքան ավելի բարդ իրավիճակում ենք հայտնվում։

Խաժակյանը հետընթաց համարեց տրանսպորտի ոլորտի ծրագրերը։

«Այն, որ  հնգամյա զարգացման ծրագրում չի նշվում, որ պետք է ազատվենք միկրոավտոբուսներից, հստակ հետընթաց է նախորդի նկատմամբ, որովհետև գոնե նախկին իշխանություններն ասում էին, որ առհասարակ միկրոավտոբուսներից պետք է ազատվել։ Հիմա դա իրատեսակ էր, թե՞ ոչ, կարելի է քննարկել, բայց մենք հիմա կամք պետք է դրսևորենք։ Կարծում եմ, այս մասով ունենք հստակ հետընթաց»,-ասաց ավագանու անդամը։

Խաժակյանը հետաքրքրվեց, ի՞նչ պետք է անեն «հուսահատության գազելներով երթևեկող քաղաքացիները»։

«Դուք ի՞նչ եք անելու, հարգելի գործընկերներ։ Որո՞նք են ձեր պատկերացրած լուծումները։ Այս մասով մենք անընդհատ խոսում ենք հնից, և վերջերս սկսել ենք շատ մեջբերել, որ դա ժառանգություն է, բայց կարծես թե դա արդարացում է դարձել, որ չենք կարողանում ինչ-որ բան անել։ Ասում եք, սպասեք երկու տարի, մինչև կունենանք բարեփոխված համակարգ։ Իսկ մինչ այդ ի՞նչ պետք է անեն քաղաքացիները։ Սրա մասին չեք խոսում, հնգամյա ծրագրում չկա։ Հասկանալով, որ չեք տիրապետում ներկայացված փաթեթին, որոշել եք դրա ներդրումը հետաձգել։ Իսկ ընթացիկ վիճակը ինչպե՞ս եք կարգավորելու, այս հարցը մնում է բաց, ինչպես ասում են, սատանան մանրուքների մեջ է»,-քաղաքապետարանի ղեկավարությանը հարցեր ուղղեց ավագանու անդամը։

Ավագանու անդամը խորհուրդ տվեց նիստին ներկա անձանց կարդալ տրանսպորտային ցանցի վերաբերյալ հետզոտություն իրականացրած ընկերության զեկույցը։ Քաղաքապետ Մարությանին տեղեկացրեց, որ 2017-ի թվերն են վերցված ու դրանց հիման վրա են առաջարկներն արված։ Հիշեցնենք, որ քաղաքապետը նշել էր, որ այդ ընկերությանը տրամադրվել են 2013-ի տվյալներ։

«Էն որ ասել են 2013-ի տվյալները հին են, իրենք արդեն 2018-ին ճշգրտումներն արել են։ Կարդացեք WYG ընկերության կողմից ներկայացված զեկույցը։ Ի՞նչ եք հարցրել այդ ընկերությունից, որ չեն պատասխանել։ Հասկանալի չէ։ Սրանից հետո ասել, որ երկու տարի է պետք սկսելու համար ներդրման պրոցեսը, նշանակումէ  ձախողել ամբողջ բարեփոխումների գործընթացը, մարդկանց աշխատանքը ջուրը գցել, ինչը նշանակում է՝ տրանսպորտի աշխատանքը թողնել կոլապսի մեջ։ Զեկույցը համապատասխանում է այս պահին ներդնելու իրավիճակին, վիճակին, կարող էինք դա սկսել իրականացնել, եթե գլուխ հանեինք այդ տրանսպորտային ցանցից։ Ես ցավում եմ, որ գլուխ չհանելով այդ նախագծից, որպես լուծում ընտրվել է փնովել այն, ներկայացնել իրականությանը չհամապատսխանող հիմնավորումներ, և ասել, որ շուտ չենք կարող իրականացնել։ Ավելի ազնիվ կլիներ ասել, որ մենք չենք տիրապետում այդ նախագծին, որ մեզ ժամանակ է պետք այն տիրապետելու համար, ժողովուրդ ջան, կներեք, բայց հուսահատության գազելներից դեռևս ելք չկա»,-ասաց նա։

Հիշեցնենք, որ խորհրդատու WYG ընկերության կողմից մշակված է Երևանի հասարակական տրանսպորտի նոր ցանցի նախագիծը։ Ըստ այդմ, ներկայիս երթուղային 115 գծերի փոխարեն կգործի 42 երթուղի, իսկ առկա 2039 փոխադրամիջոցների փոխարեն՝ 939 տրանսպորտային միջոց։ Նոր ցանցի տրամաբանությամբ` տրանսպորտային միջոցները, ի տարբերություն առկա համակարգի, գործելու են փոխլրացման սկզբունքով։

Համաձայն նախագծի՝ նոր ցանցը նախատեսված էր ավտոբուսների, տրոլեյբուսների և մետրոյի ինտեգրված ամբողջական համակարգի համար և բացառում է միկրոավտոբուսների շահագործումը։