Ձեր վստահելի աղբյուրը

ՀԱՊԿ անդամ վեց երկրներից հինգը պաշտոնապես հաստատել են ՀԱՊԿ գլխավոր քարտուղարի պաշտոնում  Բելառուսի թեկնածու Ստանիսլավ Զասի թեկնածությունը։  Իր համաձայնությունը չի տվել միայն Երևանը։ Գրում է «Կոմերսանտ»-ը՝ վկայակոչելով ԱԳՆ խոսնակ Աննա Նաղդալյանի խոսքերը, ըստ որի Հայաստանը ելնում է այն բանից, որ հարցը վերջնականապես որոշված չէ։

ԱԳՆ-ից լրատվամիջոցին ասել են, որ վերջակետ այդ հարցով կդրվի դեկտեմբերի 27-ին Մոսկվայում Ռուսաստանի նախագահ Վլադիմիր Պուտինի ու Հայաստանի վարչապետի պաշտոնակատար Նիկոլ Փաշինյանի հանդիպման ժամանակ։
Աղբյուրի տեղեկություններով, Զասին Պուտինն ընդունել է դեկտեմբերի 18-ին, սակայն այդ մասին տեղեկատվություն Կրեմլի էջում չկա։

Դեկտեմբերի 12-20-ն ընկած հատվածում Բելառուսի կողմից առաջադրված թեկնածուն հանդիպումներ է ունեցել  նաև ՀԱՊԿ անդամ երկրներից՝ Ղրղզստանի, Ղազախստանի, Տաջիկստանի ղեկավարների հետ։ Նրանք իրենց աջակցություն են հայտնել Ստանիսլավ Զասի թեկնածությանը։
«Նիկոլ Փաշինյանի հետ հանդիպումը հետաձգվել է »,-ասել է ՀԱՊԿ մամուլի խոսնակը։

Ռուսաստանի ԱԳ նախարարությունից թերթին հայտնել են՝ Մոսկվան հույս ունի, որ կադրային հարցը կլուծվի մինչև տարեվերջ։

«Կարծում եմ դեկտեմբերի 27-ին Փաշինյանի և Պուտինի հանդիպումից հետո հստակություն կլինի։ Ցանակալի է՝ Նոր տարին սկսենք դրական։ Հույս ունենք, որ դեկտեմբերի 27-ին ամեն ինչ կորոշվի։ Պետք են փոխզիջումներ։ Հույս ունենք, որ հայկական կողմն իմաստուն կգտնվի։ Երբ կազմակերպության անդամ ես, ապա պետք է պատրաստ լինես փոխզիջումների»,-ասել է ԱԳՆ աղբյուրը։