Ձեր վստահելի աղբյուրը

«Իրենց պատկերացրած լուծումը սա է՝ տալիս եք մեզ մարզի հարակից բոլոր շրջանները, մենք պատրաստ են քննարկել նախկին ԼՂԻՄ-ին ինչ-որ ինքնավարություն տալու հարցը»,- լրագրողների հետ հանդիպմանն ասաց  ադրբեջանագետ Տարոն Հովհաննիսյանը՝ պատասխանելով հարցին, թե ինչպե՞ս կմեկնաբանեք Ադրբեջանի արտգործնախարար Էլմար Մամեդյարովի հայտարարությունը, որ Բաքուն պատրաստ է Լեռնային Ղարաբաղում հայերին բարձր մակարդակով ինքնորոշման իրավունք տալ։

Նա նշեց, որ առաջին անգամ չէ Ադրբեջանի կողմից հնչում նման հայտարարությունը, անցած տարի նախագահ Իլհամ Ալիևը  նմանատիպ հայտարարություն նույնպես արել է։

Ինչ վերաբերում է  Մամեդյարովի հայտարարության այն մասին, որ պատրաստ են իրենց երկրում ապահովել ինչպես  այլ էթնիկ խմբերի ներկայացուցիչների անվտանգությունը, նույնկերպ դա անել Լեռնային Ղարաբաղում հայկական ծագում ունեցող քաղաքացիների համար, Տ. Հովհաննիսյանն ասաց. «Դա, բնավ, լավ բան չի հուշում։ Բոլորս հասկանում ենք, որ իրենց մոտ որևէ փոքրամասնություն որևէ իրավունքից չի օգտվում, և իրանական ծագմամբ, և կովկասյան ծագմամբ փոքրամասնություններին միշտ ճնշել են, ռեպրեսիվ մեթոդների են դիմել։  Բնականաբար, այդպես չի կարող լինել։ Մյուսը մեր ունեցած օրինակը. արդեն իսկ Լեռնային Ղարաբաղը  եղել է Ադրբեջանի Խորհրդային Հանրապետության կազմում, տեսել ենք, թե ինչ քաղաքականություն են իրենք տանում։ Արդեն իսկ Նախիջևանը  փոխանցվել է  Ադբեջանին, տեսել ենք այնտեղի հայաթափման քաղաքականությունը, շատ բան ենք տեսել, Սումգայիթի, Բաքվի ջարդերը։ Իրենք որևէ երաշխիք չեն կարող տալ,  որ ցանկացած ամենաբաձր ստատուսի դեպքում անգամ Արցախի հայ բնակչությանը վտանգ չի սպառնա»։

Ադրբեջանագետի կարծիքով, որևէ դեպքում Ադրբեջանի  կազմում ցանկացած կարգավիճակով Արցախի ներառվելու հարցը չի կարող քննարկվել և բանակցությունների առարկա չպետք է լինի առհասարակ, որովհետև օբյեկտիվորեն հնարավոր է  ապացուցել, ցույց տալ, որ այդ դեպքում  հայ բնակչության կյանքին վտանգ կսպառնա։

«Կարծում եմ՝ ավելի շատ սադրիչ բնույթ կրող հայտարարություն է։ Իրենք վերջին շրջանում առհասարակ շատ են փորձում սադրիչ բնույթի հայտարարություններ անել։ Կարծեմ, Մամեդյարովն այսօր նաև հայտարարել է, որ 2019 թվականին ինչ-որ շարժ կգրանցվի հայկական զորքերը տարածքներից դուրս բերելու հարցում։  Սա էլ եմ գնահատում սադրիչ բնույթի հայտարարություն, չեմ կարծում, որ 2019  ԼՂ հիմնախնդրի լուծման հարցում էական փոփոխություն կգրանցվի, որովհետև իշխանությունները մեզ մոտ նոր են,  դեռևս գնում է  բանակցային գործընթացի ուսումնասիրման գործընթացը, դեռևս բուն բանակցություններին չենք անցել, ոչ ոք չգիտի, թե բանակցությունների սեղանին  ինչ փաստաթուղթ է դրված, արդյոք նախկինն են, թե նոր փաստաթղթեր են պատրաստվում, միգուցե նոր ուղղությամբ են շարունակում համագործակցությունը։ Իմ կարծիքով, 2019 թվականին միակ առաջընթացը եթե իրոք լինի, եթե քննարկումները տարվեն, տարվելու են սահմանին լարվածությունը փոքրացնելու ուղղությամբ, այսինքն իրավիճակային բանակցություններ են լինելու 2019 թվականին»,- ասաց Տարոն Հովհաննիսյանը։

Հարցին՝ բանակցային գործընթացում Արցախի ներգրավելու մասով որևէ տեղաշարժ կարելի՞ է սպասել, նա պատասխանեց, որ հայկական կողմն այդ առումով պետք է իր հստակ դիրքորոշումը շարունակի ներկայացնել, որովհետև հստակ նկատում է, որ Ադրբեջանը վերջին 2-3 ամսում փորձում է  շրջանցել այդ հարցը, նաև խուսափել դրանից։

«Հավանականությունը ցածր է, որ 2019 թվականին մենք նման արդյունք կտեսնենք, բայց այդ ուղղությամբ աշխատանքը պետք է շարունակել»,- ընդգծեց Տ. Հովհաննիսյանը։

Պատասխանելով հարցին, որ կարծիքներ կան Ադրբեջանը  պատրաստվում է պատերազմի, նա  նշեց, որ Ադրբեջանը, նաև հայկական կողմը, միշտ են պատրաստվում պատերազմի։

«Բանակցությունները շարունակվում են, բայց կողմերը շարունակվում են զինվել, քանի որ բանակցությունների ճանապարհով, ըստ էության, առաջընթաց գրանցելը շատ բարդ է, առհասարակ հակամարտություն լուծել բանակցությունների միջոցով  աշխարհում շատ բարդ է, ցանկացած նոր փուլ բերելու է նոր շահերի բախման ու նոր հակամարտության»,- ասաց Տ.Հովհաննիսյանը։ 

Ադրբեջանագետը նշեց, որ Ադրբեջանը դեռևս չունի վստահություն, եթե ունենային,  նաև քաղաքական հենք, կարծում է, կձգտեին հնարավորինս արագ ռազմական ճանապարհով ինչ-որ լուծում գտնել։