Այնպես չէ, որ՝ վախ պաշտոն, այլ՝ վայ մամա ջան. Նարինե Գրիգորյան
ՀՀ վաստակավոր արտիստ, դերասանուհի Նարինե Գրիգորյանը նշանակվել է Սոս Սարգսյանի անվան Համազգային թատրոնի գեղարվեստական ղեկավար։ Հայաստանյան և միջազգային տարբեր փառատոներում մրցանակների արժանացած դերասանուհուն հենց թատրոնի դերասանական կազմն է առաջադրել գեղարվեստական ղեկավարի պաշտոնում։
Նարինե Գրիգորյանը պատասխանել է Panorama.am-ի՝ առաջիկա ծրագրերի, թատրոնի հետագա գործունեության, ֆիլմերում նկարահանվելու վերաբերյալ հարցերին։
Panorama.am-Նարինե, ձեր առաջին աշխատանքն արդեն որպես Համազգային թատրոնի գեղարվեստական ղեկավար, ո՞րն է լինելու։
Ն.Գրիգորյան- Հիմա ամենակարևորը խաղացանկը թարմացնելն է, նոր ներկայացումներ ստեղծելը։ Հիմա չորս պիեսների աշխատանքները սկսվել են։ Ժամանակակից հայ դրամատուրգ Սառա Նալբանդյանի «Պատերազմի խաղալիքները» պիեսի պրեմիերան նախատեսել էինք հունվարի 28-ին, սակայն քանի որ ուզում ենք վերանորոգել թատրոնը, թարմացնել բեմի հարդարանքը, գուցե մի քիչ հետաձգվի, մինչև փետրվարի սկիզբ։
2019 թվականի համար նախատեսել ենք չորս պրեմիերա՝ ժամանակակից հայ և դասական հայ դրամատուրգիա, ժամանակակից արտասահմանյան և դասական արտասահմանյան դրամատուրգիա։
Panorama.am- Այդ գործերը վաղո՞ւց էիք պլանավորել ու Վիգեն Չալդրանյանի տնօրեն և գեղարվեստական ղեկավար լինելու ընթացքում հնարավոր չեղա՞վ իրականացնել, թե՞ նոր եք ընտրել։
Ն. Գրիգորյան- Ընդհանրապես չեմ պլանավորել։ Շատ լավ գիտեմ ընկերներին, որոնց հետ խաղացել եմ երկար տարիներ, մտածել եմ, թե այս պիեսն ինչպես կխաղար այս դերասանը։ Ավելի շատ խաղացանկն ընտրվել է բացի նրանից, որ իր ասելիքով շատ համընկնում է այսօրվա Հայաստանում ասելիքով, նաև ամեն ինչից կախված է, որ ամեն դերասանի համար մի հրաշալի պարտիա լինի խաղալու։
12 պիես առանձնացրել եմ, որոնք կարդացել ենք, խմբով ընտրել, որոնց վրա պետք է աշխատենք։ Հայաստանում քիչ է բեմադրվում արտասահմանյան ժամանակակից դրամատուրգիա։ Ես ժամանակակից հինգ հայ դրամատուրգի հետ եմ աշխատում, ունեմ ժամանակակիցների հետ աշխատելու փորձ, նաև շատ եմ սիրում ժամանակակից դրամատուրգիան։
Ընդհանրապես չեմ սպասել, որ այսպես ամեն ինչը կլինի։ Ես իսկապես շատ պատասխանատու եմ մոտենում ու շատ վախեցած։ Այնպես չէ, որ՝ վախ պաշտոն, ես դա չեմ հասկանում՝ վախ պաշտոն, այլ՝ վայ մամա ջան, ոնց կկարողանամ արդարացնել։ Գործընկերներս հավատացել են, հանկարծ այդ հավատը չկոտրվի։ Իսկապես անհանգստանում եմ, բայց մոտ 15 տարի փորձ եմ ձեռք բերել։ Չգիտեմ, հույս ունեմ հետաքրքիր կլինեմ իմ ընկերներին։
Panorana.am-Դուք շարունակելո՞ւ եք հանդես գալ նաև որպես դերասանուհի, թե միայն արդեն որպես թատրոնի գեղարվեստական ղեկավար կլսենք ձեր անունը։
Ն.Գրիգորյան- Անպայման, որպես դերասանուհի, որովհետև մեծագույն երջանկություն է, միշտ լինելու եմ իմ ընկերների հետ խաղալիս։ «Պատերազմի խաղալիքները» խաղում ենք ես, թատրոնի ժամանակավոր տնօրեն Արման Նավասարդյանը և Վարշամ Գևորգյանը։
Panorama.am-Դժվար չի՞ լինի համատեղելը։ Դուք նաև հաճախ եք մասնակցում միջազգային փառատոների, ինչպե՞ս եք այժմ այդ ամեն ինչը հասցնելու։
Ն. Գրիգորյան-Արմանի գործն ավելի ծանր է։ Ես միևնույն է զբաղում եմ նրանով, ինչով միշտ զբաղվել եմ։ Մնջախաղում էլ ունեմ ներկայացում, Տիկնիկայինում էլ ունեմ մի քանի բեմադրություն։ Գուցե հիմա ավելի հեշտ է, որ մեկ տեղում եմ կենտրոնացնելու ավելի շատ բան, բայց, իհարկե, Տիկինիկայում էլ շարունակելու եմ խաղալ ներկայացումները։
Իսկ միջազգային փառատոների կտանեմ նաև նոր ներկայացումներ։ Այս կոլեկտիվը շատ աշխատող է, առանց ինձ էլ կաշխատեն, բեմադրությունների միայն ես չեմ անում, ռեժիսորները տարբեր են, ամեն մեկն իր աշխատանքը կանի։ Իմը երկու-երեք օրով կուշացվի, բայց ոչինչ։ Գեղարվեստական ղեկավարն այն մարդը չէ, որ ինքն է անում բոլոր բեմադրությունները, այլ ուղղորդում է, գործը հանձնում ռեժիսորին։
Panorama.am-Նարինե, շարունակելո՞ւ եք նկարահանվել ֆիլմերում։
Ն.Գրիգորյան-Որ հրավեր ստանամ, այո։ Առջևում «Եվա» ֆիլմի իրանահայ ռեժիսոր Անահիտ Աբադի հետ աշխատանք ունեմ։ Նայել են նրա «Եվա» ֆիլմը ու իտալացիները 50 հայ և 100 դրսի կինոռեժիսորներից ընտրել են հենց նրան, որ «Արտույտների ագարակը» երկրորդ գրքի հիման վրա ֆիլմ նկարահանի։ Ապրիլին սկսվելու են նկարահանումները։ Անահիտն Աբադն ասել է, որ ես կնկարահանվեմ այդ ֆիլմում։
Panorama.am-Ի՞նչ պետք է արվի, հանդիսատեսին թատրոն բերելու համար, արդյո՞ք շարունակելու եք թատրոնի արդեն ձևավորված ավանդույթները, թե՞ նոր գործելաոճ եք որդեգրելու։
Ն. Գրիգորյան-Մեր թատրոնը միշտ եղել է դերասանակետրոն, ամենակարևոր կետն է, այդ տեսակը երբեք չի փոխվելու, պետք է հնարավորինս շատ արտահայտվի։ Դա է մեր դեմքը, դերասանի շնորհիվ կարելի է հանդիսատեսին գրավել։
Թատրոնն ունենալու է սրճարան, կազմակերպելու ենք ցուցահանդես ներկայացումներ, ժամանակակից պիեսների ընթերցանություն։ Թատրոնը պետք է լինի ամենուր՝ աստիճաններին, ֆոյեում, բարի մոտ։
Panorama.am-Դրսից ռեժիսորներ հրավիրելո՞ւ եք։
Ն.Գրիգորյան-Անպայման։ Հունվարի 15-ին Ֆրանսիայից Հայաստան է գալու Սերժ Մելիք-Հովսեփյանը, ով բեմադրելու է ֆրանսիացի ժամանակակից դրամատուրգի «-2» պիեսը։ Կլինեն նաև Վիգեն Ստեփանյանը, երիտասարդ բեմադրիչներ, գուցե ավարտող ռեժիսորին հնարավորություն տանք դիպլոմային աշխատանքը բեմադրել հենց այստեղ։
Հարակից հրապարակումներ`
- Համազգային թատրոնն առաջիկա օրերին կունենա գեղարվեստական ղեկավար
- Համազգային թատրոնի դերասանները դադարեցնում են գործադուլը
- Վիգեն Չալդրանյանը դեռևս անդրդրվելի է. Համազգային թատրոնի դերասան
- Սուրեն Շահվերդյանը որոշել է հրաժարվել Համազգային թատրոնի գեղարվեստական ղեկավարի պաշտոնից
- Այնինչ Սուրեն Շահվերդյանին Համազգայինում չեն սպասում
- Համազգային թատրոնը կաթվածահար է. Լիլիթ Գալստյան
- Սուրեն Շահվերդյանը թող գնա իր համար թատրոն բացի ու ղեկավարի. ՀՀ վաստակավոր արտիստ
- Սոս Սարգսյանի անվան համազգային թատրոնն ունի նոր գեղարվեստական ղեկավար
- «Կինոշոկ» փառատոնում լավագույն դերասանուհի է ճանաչվել Նարինե Գրիգորյանը
- Շատ քիչ մարդ է հավատացել, որ այս ֆիլմը կէկրանավորվի. «Եվա» ֆիլմի ռեժիսոր
- Նարինե Գրիգորյանը ղարաբաղյան պատերազմի մասին ներկայացում է բեմադրելու
- Նարինե Գրիգորյանի «Թռիչք քաղաքի վրայով» ներկայացումը զբաղեցրել է երրորդ տեղը. «Ամաչելու բան չունենք»
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
