Ձեր վստահելի աղբյուրը

Կառավարության այսօրվա նիստում  ընդունած որոշման համաձայն՝ 5 մլրդ 705 մլն դրամ կհատկացվի զինվորական ծառայությունից սահմանված կարգով արձակված նախկին զինծառայողների ընտանիքների բնակարանային խնդիրների լուծմանն աջակցելու նպատակով։

ՀՀ պաշտպանության նախարարի պաշտոնակատար Դավիթ Տոնոյանը նշեց, որ որոշման նախագծի ընդունումը պայմանավորված է զինվորական ծառայության ընթացքում որպես բնակարանային պայմանների բարելավման կարիք ունեցող հաշվառված, սակայն զինվորական ծառայության ընթացքում սեփականության իրավունքով անհատույց բնակարան չստացած և առողջության կամ տարիքի կամ երկարամյա ծառայության զինվորական կենսաթոշակի անցնելու կապակցությամբ զինվորական ծառայությունից սահմանված կարգով արձակված նախկին զինծառայողներին բանակարան ձեռքբերելու համար պետական մասնակցության չափով աջակցությամբ:

Ըստ նրա՝  ծրագրի շահառու է ճանաչվել 1141 նախկին զինծառայող, որից  326-ը՝  Երևանում: Նախատեսվում է շահառուների գրավոր համաձայնության դեպքում յուրաքանչյուրին տրամադրել 2 տարի մարման ժամկետով և միջինը 5 մլն դրամ արժեքով բնակարանի գնման վկայագիր:   

Առաջին փոխվարչապետ Արարատ Միրզոյանն անդրադառնալով որոշմանը՝ նշեց, որ այն զինծառայողները, որոնց հանդեպ պետությունը պարտավորություններ ուներ, և  տարիներ շարունակ այդ հարցը լուծում չէր ստանում, այժմ «պատուհան է բացվել խնդրի լուծման համար»:

Դավիթ Տոնոյանը նշեց, որ խոսքը գնում է հերթում եղած զինծառայողների մասին, որոնք արդեն զորացրվել են. «Այս գումարով կարելի է տներ գնել ու կառուցել  նաև մարզերում»: