Ձեր վստահելի աղբյուրը

«Մամեդյարովի հայտարարությունը նոր բան չէ, այդ թեզն առաջ են տանում վաղուց։ Այստեղ կարևորն այն է, թե ինչ ֆոնի վրա են այդ թեզը վերադարձնում շրջանառություն»,-Panorama.am-ի հետ զրույցում ասաց ադրբեջանագետ Անժելա Էլիբեգովան՝ անդրադառնալով ադրբեջանական կողմի հայտարարությանն ու դրան հետևած հայկական կողմի արձագանքներին։

Հիշեցնենք, որ Ադրբեջանի ԱԳ նախարար Էլմար Մամեդյարովը հայտարարել էր՝ Բաքուն պատրաստ է Արցախին բարձր մակարդակի ինքնակառավարման իրավունք տրամադրել և ապահովել արցախահայության անվտանգությունը:

Էլիբեգովան այս առումով ընդգծում է, հայտարարությունը հետևեց Միլանի հանդիպմանը, իսկ այս օրերին Ադրբեջանի նախագահն ու արտաքին գործերի նախարարն անընդհատ կրկնում են՝ 2019-ին բանակցային պրոցեսում ակնկալում են լուրջ հաջողություններ։

«Այս համատեքստում բավականին հետաքրքիր է, խաղի մեջ փորձում են ներքաշել այսպես կոչված Արցախի ադրբեջանական համայնքը։ Փոխեցին ղեկավարին, երիտասարդ դիվանագետ է հիմա համայնքի ղեկավարը, պարբերաբար հայտարարություններով են հանդես գալիս, բավականին ակտիվացել են։ Ընտրել են ներկայանալի անձի, որպեսզի միջազգային հանրությանը լսելի դարձնեն իրենց համայնքի ձայնը։ Ըստ էության, Մամեդյարոցն ասում է, ուրիշ ազգային փոքրամասնությունների հետ լավ ենք վերաբերվում, ձեզ հետ էլ նույն կերպ կվերաբերվենք»,-նշում է ադրբեջանագետը։

Նա ընդգծում է, որ այդ թեզը կեղծ է, քանի որ Ադրբեջանում ապրող ազգային փոքրամասնությունները լուրջ խնդիրներ ունեն՝ կրթական, ասիմիլացիայի, ազգային ինքնության, նաև կենցաղային տարբեր հարցերի վերաբերյալ։

«Այդ մոդելը առաջարկել, երբ հայկական կողմը գիտի  տիրող տրամադրությունները, անհեռատեսական եմ համարում»,-ասաց Panorama.am-ի զրուցակիցը։

Հարցին՝ միգուցե հայտարարությունը տրամադրություններ ստուգելու նպատա՞կ ուներ, ադրբեջանագետը չբացառեց. «Հնարավոր է, քանի որ Միլանում տեղի ունեցած հանդիպումից հետո Ադրբեջանի հայտարարությունները բավականինին զգայուն արձագանքներ ունեցան հայաստանյան հասարակության մեջ, որովհետև կար տեղեկատվության պակաս, թե ի՞նչ ուղղությամբ են գնում բանակցությունները, ի՞նչ ակնկալիքներ կան,  երբ ՌԴ ԱԳՆ ներկայացուցիչ Զախարովան խոսում է կրեատիվ լուծումների մասին, ի՞նչ ի նկատի ունի։ Քանի որ այս բոլոր հարցերի պատասխանները հայ հասարակությունը չի ստանում լիարժեք, դա առաջացնում է տարատեսակ մեկնաբանություններ»։

Հիշեցնենք, որ Մամեդյարովին արձագանքել էր  առաջին փոխվարչապետի պաշտոնակատար Արարատ Միրզոյանը ֆեյսբուքյան իր էջում՝ մասնավորապես նշելով. «Պրն Մամեդյարովին խորհուրդ եմ տալիս առաջարկը ներկայացնել նաև Արցախի ժողովրդին՝ բանակցելով նաև Արցախի հետ․ ի վերջո արցախցիներն իրենք են որոշելու իրենց ճակատագիրը»։

Էլիբեգովան այս առումով հիշեցնում է, որ  Արցախի ժողովուրդը, ՀՀ և ԼՂՀ բնակչությունը վաղուց կայացրել են իրենց որոշումը։

«Այստեղ նորից իրենց հարցնելու, Ադրբեջանի հետ երկխոսության մեջ մտնելու կարիք չկա, երկրորդ, այն ունի իր ռիսկերը, օրինակ Ադրբեջանը կարող է իր առաջարկություններով գնալ սադրանքների, որոնք կարող են գործընթացը փակուղային դարձնել»,-նշեց նա։

Արցախի ՊԲ-ն երեկ հայտարարություն տարածեց, ըստ որի. «Չնայած վերջին շրջանում արցախա-ադրբեջանանական հակամարտ զորքերի շփման գծում կողմերի միջև ձեռքբերված բանավոր պայմանավորվածության, այդուհանդերձ հակառակորդը շարունակում է առաջնային գծի տարբեր հատվածներում ինտենսիվորեն խախտել հրադադարի պահպանման ռեժիմը, ինչպես նաև որոշ ուղղություններում իրականացնել ռազմավարամարտավարական նշանակության սադրիչ գործողություններ»։

Էլիբեգովան նշում է՝ ադրբեջանական կողմը, ըստ երևույթի, ձեռք բերված պայմանավորվածության վերջնաժամկետ  էր համարում Հայաստանի արտահերթ խորհրդարանական ընտրությունները։

«Բաքուն որևէ պարտավորվածություն հայկական կողմի առաջ չի զգում և գնալով սրում է իրավիճակը սահմանին ու առաջնագծում։ ՊԲ-ի հաղորդագրություններից մենք հստակ ֆիքսում ենք, որ իրավիճակն առաջնագծում  գնում է դեպի լարում։ Հայկական կողմը, Արցախի ՊԲ-ն ամեն դեպքում հետևում են, ֆիքսում են, դեռ չեն արձագանքում, բայց պատրաստ են դա անել ցանկացած պահի։ Այստեղ ի՞նչն է հետաքրքիր։ Ադրբեջանական կողմն այդ սրումը փորձում է քողարկել նաև քարոզչական դաշտում հարձակողական գործողություններով»,-ասում է նա։

Փորձագետի խոսքով, այսօր ադրբեջանական  լրատվամիջոցներում տեղեկություն է տարածվել, իբր Աղդամի ուղղությամբ հայկական կողմը մի կնոջ է վիրավորել։

«Սակայն դա նույնիսկ տեխնիկապես հնարավոր չէ, 15 կմ հեռավորության վրա է տեղի ունեցել դեպքը, հետևաբար ոչ միայն առաջնագծում, այլև քարոզչական դաշտում ևս պետք է պատրաստ լինել սադրանքների»,-նկատում է նա։

Հարցին, թե որքանով է այսօրվա կառավարությունը պատրաստ արձագանքելու քարոզչական դաշտի սադրանքներին, փորձագետը պատասխանում է՝ մինչ այս պահը արձագանք չի տեսել, վստահ պատասխանել չի կարող մոտեցումների, ռազմավարության մասին.
«Միգուցե կա նոր մոտեցում, ըստ որի ընդհանրապես չպետք է պատասխանել ադրբեջանական կողմի որևէ քարոզչական սադրանքի, բայց քանի որ ընդհանուր պատկերը ես չեմ տեսնում, չունեմ այդ հարցի պատասխանը»։