Ձեր վստահելի աղբյուրը

Ղազախստանի Կարագանդայի շրջանի ռեստորաններից մեկի մոտ 23-ամյա երիտասարդի սպանության մեջ կասկածյալի նկատմամբ հանրապետական հետախուզում է հայտարարված, իսկ երեք հոգու նկատմամբ դատարանի որոշմամբ որպես խափանման միջոց ընտրվել է կալանքը։ Այս մասին գրում է NUR.KZ կայքը։

Ոստիկանության աշխատակիցների կողմից անցկացված օպերատիվ-հետախուզական միջոցառումների արդյունքում հայտնաբերվել և ձերբակալվել են երեք տղամարդ՝ Մալխասյան Թորգոմ Մանվելի, Մալխասյան Սոխակ Սամվելի և Նադիրբեկով Քաիր Խամիտովիչ: Նրանք կասկածվում են լուրջ հանցագործություն կատարելու մեջ։ Կարագանդայի դատարանի որոշմամբ նրանց նկատմամբ խափանման միջոց է ընտրվել կալանքը։ Կարագանդայի ոստիկանական դեպարտամենտի աշխատակիցների կողմից 1997թ. ծնված  Գուրուրյան Նարեկի նկատմամբ հետախուզում է  հայտարարվել։

Ծեծկռտուքը տեղի է ունեցել ռեստորանի մոտ Նոր տարվա տոնակատարության ժամանակ, որին մասնակցել է մի քանի տղամարդ։ Փողոցում ծեծկռտուքի ընթացքում դանակի հարվածից մահացել է Կարագանդայի 23-ամյա բնակիչը։

Ղազախստանում Հայաստանի դեսպանությունը դեպքի հետ կապված հանդես է եկել հայտարարությամբ։ Նշվում է, որ վեճը տեղի է ունեցել ռեստորանի այցելուների միջև կենցաղային հողի վրա, մեկ հոգի մահացել է, երեքը ստացել են վնասվածքներ։ Դեսպանությունը ցավակցություն է հայտնել մահացածի հարազատներին և մերձավորներին, վստահություն հայտնել, որ քննությունը կպարզի միջադեպի բոլոր հանգամանքները, բոլոր մեղավորները կհայտնաբերվեն ու կպատժվեն օրենքի համաձայն։

«Ղազախստանը բազմազգ պետություն է, որտեղ ավանդաբար տիրում է միջմշակութային համաձայնությունը և բացառիկ հանդուրժողականությունը էթնիկ փոքրամասնություններին նկատմամբ։

Հույս ունենք, որ ԶԼՄ-ները հղում կանեն պաշտոնական աղբյուրներին և սոցցանցերում չեն տարածի չստուգված տեղեկատվություն, որը կարող է հասարակական կարծիքի մանիպուլյացիայի աղբյուր դառնալ և այդ ողբերգությանը հաղորդել ազգամիջյան հողի վրա կոնֆլիկտի նրբերանք»,- նշված է Ղազախստանում ՀՀ դեսպանության հաղորդագրության մեջ։