Ձեր վստահելի աղբյուրը

ՔՊ այսօրվա նիստից հետո Նիկոլ Փաշինյանը լրագրողների հետ զրույցում անդրադարձավ Ղազախստանի Կարագանդա քաղաքում հայերի և ադրբեջանցիների միջև տեղի ունեցած մահվան ելքով միջադեպին։

«Նախ ուզում եմ ցավակցություն հայտնել զոհվածի հարազատներին և ցանկանում եմ ասել, որ այդտեղ չի կարող ազգամիջյան կոնտեքստ լինել: Ինչքան ինձ են զեկուցել, կոնֆլիկտ ունեցած խմբերը ազգային առումով միատարր չեն եղել, և դանակահարողների խմբի մեջ ազգությամբ ղազախ է եղել»,- ասաց նա:

Հարցին՝ որոշվել է  արդյոք կառավարության կազմը, վարչապետի պաշտոնակատարը պատասխանեց, որ գործադիրի կառուցվածքի մասին հարց չի քննարկվել: Նա տեղեկացրեց, որ «Իմ քայլը» խմբակցության կանոնադրությունն են քննարկել:

Հաջորդ  հարցին, թե ում է հակված տեսնել Ազգային ժողովի նախագահի ընդդիմադիր տեղակալի պաշտոնում, Նիկոլ Փաշինյանն ասաց. «Խմբակցությունում այդ հարցի քննարկմանը դեռ չենք հասել: Ինձ թվում է, որ պետք է սկզբունք գործի, ինստիտուցիոնալ սկզբունք: Այն խմբակցությունը, որն ավելի շատ ձայներ է ստացել ժողովրդի կողմից, նրա ներկայացուցիչն էլ պետք է փոխնախագահի պաշտոնը զբաղեցնի: Հակառակ դեպքում տրամաբանությունը չի հասկացվի»:

Լրագրողները Նիկոլ Փաշինյանին նաև հարց ուղղեցին գազի գնի վերաբերյալ: Դիտարկմանը, որ սահմանին գազի սակագնի բարձրացումը համարվում է իշխանությունների կողմից պարտություն, ՀՀ վարչապետի պաշտոնակատարն ի պատասխան նկատեց. «Բելառուսի ներքաղաքական իրավիճակն ինչպիսին է, որ այնտեղ էլ թանկացավ: Մենք բանակցությունները շարունակում ենք, որպեսզի երկարաժամկետ լուծումների գանք: Մենք չենք կարող գազի գնի հարցը դիտարկել այդ կոնտեքստում: Մենք շարունակելու ենք բանակցությունները և դիրքորոշում ենք արտահայտելու՝ մեր երկրի շահերը պաշտպանելու համար: Ի՞նչ պարտության մասին է խոսքը, այդ կարծիք հայտնողները չեն ասում, թե ի՞նչ պարտության մասին է»:

Հարցին,երբ ինքն ասում է, որ գազը սպառողների համար չի թանկանալու, ինչ ժամկետների մասին է նշում, վարչապետի պաշտոնակատարն ասաց. «Ժամկետների մասին այս պահին որևէ բան չեմ կարող ասել»:

Իսկ արդյոք իրանական գազի ներկրումը իշխանությունների օրկարգում կա, քանի որ նախկինում միշտ այդ մասին էր բարձրաձայնում, Փաշինյանը պատասխանեց. «Նախկինում քննարկվել է, քննարկվում է և միշտ կքննարկվի, որովհետև կոնկրետ և ձեռնտու լուծում չի գտնվել»: