Ձեր վստահելի աղբյուրը

Երևանի քաղաքապետը երեկ գովեց իրենց՝ 24 ժամյա աշխատանքի արդյունքում քաղաքում աղբահանումը կատարվել է։  Գովելը՝ գովել...  բայց մի հարց էլ կա՝ իսկ ինչ էր անում քաղաքապետարանը 24 ժամ, որ աղբը թափվի։

Panorama.am-ը զրուցեց Երևանի քաղաքապետի մամուլի քարտուղար Հակոբ Կարապետյանի հետ, թե՝ ի՞նչ է մտնում այդ «24-ժամյա ժամանակացույց» ասվածի մեջ։

«Քաղաքապետարանի, վարչական շրջանների կոմունալ ծառայությունների աշխատակիցներն իրենց բուն պարտականություններց բխող գործառույթներն են իրականացել, ոմանք աղբն են հավաքել, ոմանք՝ վերահսկել և հետևել են քաղաքացիների ահազանգներին»,-ասաց քաղաքապետի մամուլի խոսնակը։

Նրա խոսքով՝ ամենօրյա աշխատանք է տարվում ուժերի գերլարումով, որպեսզի խնդիրը կառավարելիի սահմաններում լինի։

Այնուամենայնիվ՝ չէ՞ որ աղբահանությունը «Սանիտեքն» է իրականացնում։

«Մայրաքաղաքում բուն աղբահանությունն, իհարկե, իրականացնում է «Սանիտեք»-ը, բայց տոն օրերին գրեթե առանց հանգստի հերթափոխով աշխատել են քաղաքապետարանի և վարչական շրջանների համապատասխան ստորաբաժանումները՝ աղբի կրիզիս քաղաքում թույլ չտալու համար։ Բայց այն, որ 24-ժամյա աշխատանք եղել է՝ իրականություն է»,- ասաց Կարապետյանը՝ նշելով, որ սա չի նշանակում, որ աղբահանության խնդիրը լուծված է և որ խնդիր չկա։

Իսկ ինչու էր «Սանիտեքին» անհրաժեշտ շուրջօրյա վերահսկողություն, իրենք զգու՞մ են դրա կարիքը։

Հետո էլ Panorama.am-ը զրուցեց նաև «Սանիտեք» ընկերության հետ, հասկանալու, թե արդյոք ընկերությունը ինքնուրույն չէր ենթադրել, որ տոնական օրերին աղբը սովորականից շատ կլինի ու նախապես պատրաստվեր դրան։

«Սանիտեք» ընկերության ղեկավարի օգնական Քրիստինե Հովհաննիսյանն ասաց. «Իհարկե գիտեինք, պատրաստ էինք, բայց բոլոր մեծ քաղաքներն էլ, կարծում եմ, այդպիսի խնդիրներ ունենում են։ Մենք փորձեցինք, հնարավորին սեղմ ժամկետում այդ խնդիրը կարգավորել, հիմա սովորական հունի մեջ են ընկել աշխատանքները»։

Մեկ այլ հարցի, թե ինչպիսին է եղել աշխատանքը քաղաքապետարանի հետ, քանի որ նրանք էլ իրենց հերթին «բողոքում են», որ աղբամանների բավարար չափով ապահովվածություն չկա, նա պատասխանեց. «Քաղաքապետարանի հետ ինչպես միշտ աշխատել ու աշխատում ենք սերտ համագործակցությամբ։ Այս օրերին աղբամանները կրկին վնասվել ու այրվել են, թվի պակասելը կապված է հենց դրա հետ, կամայականորեն աղբաման չի հանվել»։

Փաստորեն, այո, «Սանիտքին» անհրաժեշտ է «սերտ համագործակցությունը», թեև՝  ինչ է անում քաղաքապետարանը կոնկրետ աղբամանի չլինելու ժամանակ, մեզ որ, անհասկանալի է։

Նկատենք, որ թեպետ Մարությանը գովեց իրենց աշխատանքը, այնուամենայնիվ, մի քանի բողոք սպրդել էին սոցցանցեր։ Երեկ դերասան Սարգիս Գրիգորյանն էր իր էջում տեսաուղերձով և լուսանկարներով ներկայացրել 16-րդ թաղամասի 19 շենքի, մեղմ ասած, ոչ պատշաճ աղբահանության իրավիճակը։

Դերասանն ահազանգել էր, որ աղբահանության ոչ պատշաճ կատարման հետևանքով հակասանիտարական վիճակ է ստեղծվել, և իր զարմանքն էր հայտնել, որ մեկնաբանություններում ընթերցողները դժոհել էին, որ փաստը բարձրաձայնել է։

Հետաքրքիր է ընդհանուր պատկերը՝ քաղաքապետարանը ընդունում է, որ աղբահանության խնդիր դեռ կա, «Սանիտեքը» ընդունում է, որ «քաղաքացիների բողոքներն օբյեկտիվ են», ընթերցողները բողոքում են, եթե բողոք է հայտնվում, արդյունքում քաղաքապետը գովում է իրենց աշխատանքը, երբ քիչ թե շատ նորմալ աղբահանություն է արվում։

Ի դեպ՝ դերասանը մեկ այլ տեսանյութով շնորհակալություն էր հայտնել, որ խցանված աղբատարների խնդիրը վերացրել էին, ու դա էլ է ընդհանուր պատկերի մեջ մտնում՝ երբ շնորհակալությւն են հայտնում նորմալ աշխատանքի համար։ Ճնշմամբ, թե կամավոր։

Գոյություն ունի սահմանված պարտականություններ, որոնք պետք է կատարվեն պատկան մարմինների կողմից, իսկ քաղաքացու «պարտականությունն է» լինել պահանջատեր։