Ձեր վստահելի աղբյուրը

«2017-ին ներդրված տնտեսվարման համակարգերը թույլ տվեցին, որ մենք ավելի արդյունավետ օգտագործենք միջոցները 2018-ին»,-խորհրդարանում լրագրողների հարցերին ի պատասխան հայտարարեց ԱԺ աշխատակազմի ղեկավար Արա Սաղաթելյանը։

Հիշեցնենք, որ  վառելիքի գծով 2018թ-ին ԱԺ աշխատակազմը տնտեսել է 114.000 լիտր բենզին, այն պահեստավորվել է 2019 թվականի համար, իսկ ընդհանուր առմամբ, Ազգային ժողովի աշխատակազմը 2018 թվականի ընթացքում ունեցել է 404 միլիոն դրամի տնտեսում։
Սաղաթելյանն ասաց՝  չի ցանկանում թվարկել, բայց թողնում են մեծ քանակությամբ գույք, որ կարող է սպառել հաջորդ աշխատակազմը։

«Երբ ես եկա աշխատակազմի ղեկավար, մենք ունեինք հոսանքի գծով պարտավորություն։ Ես ստիպված էի նախագահի աշխատակազմից ու Կենտրոնական բանկից այստեղ բերել 5-6 տասնյակ օգտագործված համակարգիչներ, որը հիմնարկի կառավարման տեսանկյունից այնքան էլ նորմալ չէ, իսկ այդ համակարգիչները պետք էին»,-նշեց նա։

Լրագրողների դիտարկմանը, թե նախորդ տարիներին ԱԺ աշխատակազմի կողմից միջոցների տնտեսման մասին չեն լսել, Սաղաթելյանն ընդգծեց՝ դեմ է նախորդների կատարած աշխատանքը նսեմացնելու  հաշվին ինքնահաստատվելուն։

«Ես կարող եմ ազնիվ ասել մի բան։ Մենք կանոնակարգել ենք աշխատանքները, խիստ ու պատշաճ անցկացրել ենք բոլոր միջոցառումները ձեռքբերումների գծով, այդ դեպքում լինում է ինչ-որ շահած գումար։ Ֆինանսների նախարարության հետ երկար քննարկումներից հետո մենք ստացանք անհրաժեշտ ծավալի գումարը, նաև ընթացիկ վերանորոգման գումարը։ Արդյունավետ կառավարման արդյունքում մենք տնտեսեցինք»,-նկատեց աշխատակազմի ղեկավարը։
Ինչ վերաբերում է այն մեկնաբանություններին, թե տնտեսումը պայմանավորված է հեղափոխությամբ, Սաղաթելյանը հակադարձեց, ԱԺ աշխատակազմը գործում է նաև այս պահին ոի պարտավոր է ապահովել և ուղեկցել խորհրդարանի բնականոն գործունեությունը։

«Ծախսերի հիմնական մասը շենքի պահպանման համար են, անկախ այն բանից, թե քանի մարդ է մտնում շենք ու դուրս գալիս, այդ ծախսերն իրականացվում են։ Երկրորդ խումբը ներկայացուցչական ծախսերն են ու գործուղումները։ Ներկայացուցչականի մասով ես արդեն ասացի, մենք պահեստներում թողնում ենք զգալի ծավալի ապրանք։ Այն ինչ կրճատվել է, արվել է ողջամիտ։ Բայց կան գործուղումներ, որոնք չենք կարող չգնալ, օրինակ, եթե ալարում ես, կամ հիասթափված ես ու որոշում ես չգնալ, ապա այդ քննարկումներում կարող են հակահայկական բազմաթիվ բանաձևեր ընդունվել»,-մանրամասնեց նա։

Որոշ բաներից աշխատակազմը հրաժարվել է, դրա փոխարեն կան ձեռքբերումներ, օրինակ, մամուլի ծառայությունը երբեք չի ունեցել նման տեխնիկական հագեցվածություն։

Սաղաթելյանը նշեց, որ պատգամավորների գույքի խնդիր գոյություն չունի, գույքը պահեստներում է, այն նոր է։

«Գույքի խնդիր կար, երբ ես եկա։ Ես խնդրել, բերել եմ իմ սենյակի գույքն իմ ընկերների գրասենյակներից։ Ընդհանրապես գույք բերելը տվյալ մարդու որոշումն է, քանի որ պետությունը չի կարող գնել իտալական կահույք, քանի որ այն  ձեռք է բերվում տենդերով, որի ընթացքում պետք է գնել ողջամիտ էժանը։ Գույք բերելը եղել է անձի նախասիրությունը, պետությունը չի կարող ապահովել յուրաքաչյուր սենյակում հեռուստացույց, միաժամանակ պետությունը կարող է տալ 40 դրամանոց գրիչ»,-բացատրեց նա։

ԱԺ աշխատակազմն ունի 726 աշխատակից, այդ թվում նաև պատգամավորներն են։ Լրագրողները հարցրեցին՝ արդարացվա՞ծ է  նման թիվը։ Սաղաթելյանը կարծիք հայտնեց՝ կառավարման փիլիսոփայության խնդիր է։

«Ես կարծում եմ, երբ խոսում ենք պետական լուրջ կառույցների աշխատակազմերի մասին, դա համակարգված արտադրություն չէ։  Օրինակ, մեր ղեկավարման օրոք, շատ մարդիկ՝ ոչ միայն ստորաբաժանումների ղեկավարները մնում էին, աշխատում էին նաև աշխատանքային օրվա ավարտից հետո՝ մինչև ժամը յոթը, ութը»,-մանրամասնեց աշխատակազմի ղեկավարը՝ օրինակ բերելով այլ երկրների խորհրդարանները, երբ ուսումնասիրություններն ու հետազոտությունները պատվիրում են այլ կենտրոններին։

Անդրադառնալով զբաղեցրած պաշտոնը թողնելու թեմային՝ Արա Սաղաթելյանը նկատեց.
«Ես համարում եմ, որ մեր երկրում քաղաքական կուլտուրան դեռ չի հասել այն մակարդակին, որ ինչպես Շվեյցարիայում կամ Գերմանիայում, տարբեր թիմերի հետ դու մնաս ու աշխատես  խորհրդարանի աշխատակազմի ղեկավար։ Դու եկել ես հստակ մարդու հետ, հստակ քաղաքական թիմի հետ։ Ես համարում եմ, որ պետք է գնամ այն թիմի հետ, որի հետ եկել եմ և այն ԱԺ նախագահի հետ, որի հետ եկել եմ»,- ասաց Արա Սաղաթելյանը։
ԱԺ աշխատակազմի ղեկավարն ընդգծեց՝ իրենք արել են ամեն ինչ, որպեսզի ԱԺ աշխատակազմը մնա ապաքաղաքական, ինչն այնքան էլ հեշտ չի եղել։

«Ես համարում եմ, որ իմ թիմը և աշխատակազմը ստեղծել են պատշաճ պայմաններ, որ այն մարդը, ով կնշանակվի իմ փոխարեն, ունենա համապատասխան բազա շարունակելու զարգացումը»,-նշեց նա