Ձեր վստահելի աղբյուրը

Գեներալ Մանվել Գրիգորյանի կալանավորումը  պահանջող քաղաքացիները հավաքվել են Էջմիածին քաղաքի մուտքի մոտ՝ իրենց ակցիան շարունակելու համար։ Ակցիայի մասնակիցներն ասացին, որ նախապես հայտարարած ակցիաները շարունակելու են, սպասում են իրենց միացող մյուս ցուցարարներին։ Ոստիկաններն պահանջում են, որպեսզի ակցիայի մասնակիցները փողոցի աջ կողմում հավաքվեն ու չխոչընդոտեն երթևեկող քաղաքացիներին։

Հիշեցնենք, որ նախօրեին ակցիայի մասնակիցները մինչև ուշ գիշեր  կրկին փակել էին Էջմիածնի ճանապարհը, իսկ նախքան այդ  հավաքվել էին Երևանում՝ Վերաքննիչ դատարանի շենքի մոտ, որտեղ քննվում էր Մանվել Գրիգորյանի խափանման միջոց կալանավորումը գրավով փոխարինելու որոշման դեմ դատախազության ներկայացրած բողոքը։

Հիշեցնենք, որ դեկտեմբերի 21-ին Երևան քաղաքի ընդհանուր իրավասության դատարանը որոշում էր կայացրել 25 միլիոն դրամ գրավի դիմաց ազատ արձակել գեներալ Մանվել Գրիգորյանին։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել:

Մանվել Գրիգորյանը կալանավորված էր հունիսի 19-ից: Նրան մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար: