Ձեր վստահելի աղբյուրը

7-րդ գումարման Ազգային ժողովն այսօր սկսեց աշխատանքները` քննարկման դնելով Հաշվիչ հանձնախումբ  ստեղծելու հարցը:

Ինչպես հայտարարեց նիստը վարող պատգամավոր Կնյազ Հասանովը, «Կանոնակարգ» օրենքի համաձայն՝ հանձնախումբը պետք է կազմված լինի 7 անդամներից, որի  5 անդամները կլինեն «Իմ քայլը» դաշինքից և մյուս երկուսը՝ համապատասխանաբար՝ ԲՀԿ և ԼՀԿ խմբակցություններից: 

Նշենք, որ վարման կարգով ձայն խնդրեց «Իմ քայլը» խմբակցության ղեկավարի թեկնածու Լիլիթ Մակունցը՝ խնդրելով 20 րոպե ընդմիջում, որպեսզի խմբակցությունները կարողանան նիստ գումարել և ներկայացնել իրենց թեկնածուներին:

Վարման կարգով ձայն խնդրեց նաև ԼՀԿ խմբակցության ղեկավար Էդմոն Մարուքյանը, ով նշեց, որ մինչև նիստ գումարելը կարիք կլինի կառուցվածքը քննարկելու: Ըստ նրա՝ երեկ ուշ երեկոյան խոսել են, և առաջարկ է եղել ԲՀԿ-ից և ԼՀԿ-ից ընդգրկել երկուական պատգամավորի, իսկ ահա 3 պատգամավոր՝«Իմ քայլը» դաշինքից:

«Եթե մենք մեկական ներկայացուցիչ տանք, ապագայում եթե մի մարդ բացակայի մեր խմբակցությունից, մենք այդ քվեարկությանը չենք կարող միանշանակ վերաբերել։ Հետևաբար, երկուական ներկայացուցիչների պարագան կարևոր է։ Եթե 3-ի խնդիրն է, ես առաջարկում եմ՝ լինի երկուական ԲՀԿ-ից և ԼՀԿ-ից, 5 ներկայացուցիչ՝ «Իմ քայլից»։ Հետևաբար, դուք կունենաք մեծամասնություն, բայց մենք կունենանք մեկական ավելի ներկայացուցիչ»,-առաջարկեց Մարուքյանը: 

ԱԺ նախագահի թեկնածու Արարատ Միրզոյանը նշեց, որ նման հարցով եղել են քաղաքական կոնսուլտացիաներ:

«« Իմ քայլը» դաշինքը պատրաստ է գնալ նման հանգուցալուծման և  ձևավորել ոչ թե մանդատների համամասնությամբ, այլ ընդդիմությանը մեկական տեղ զիջելով իր մանդատներից, որևէ խնդիր չենք տեսնում։ Եթե իրավունքի ուժով հնարավոր է, մենք խնդիր չենք տեսնում»,-ասաց Միրզոյանը:

Խմբակցությունները գնացին 20 րոպե ընդմիջման:

Ընդմիջումից հետո նախագիծը դրվեց քվեարկության։ 72 կողմ, 1 դեմ քվեարկությամբ ԱԺ-ն ընդունեց Հաշվիչ հանձնաժողովի կազմի մասին նախագիծը:

«Իմ քայլը» դաշինքից հանձնաժողովի անդամներ էին ներկայացրել Վահագն Հովակիմյանին, Արփինե Դավոյանին, Սիսակ Գաբրիելյանին, Քրիստինե Պողոսյանին, Մարիա Կարապետյանին: ԼՀԿ-ն առաջադրել է Աննա Կոստանյանի, իսկ ԲՀԿ-ն՝ Շաքե Իսայանի թեկնածությունը։