Ձեր վստահելի աղբյուրը

«Կալանավորումը պետք է կիրառվի այն ժամանակ, երբ առկա են կալանավորման հիմքերը և պայմանները: Երբ խոսքը գնում է Ռոբերտ Քոչարյանի մասին, դատարանների վրա շատ ավելի մեծ ճնշում կա»,- այսօր լրագրողների հետ զրույցում ասաց Ռոբերտ Քոչարյանի պաշտպան  Հայկ Ալումյանը:

«Մեծ պատվեր կա, որ պարոն Քոչարյանը գտնվի կալանքի տակ»,- ասաց նա՝ նկատելով, որ պատվերը ներկայիս գործադիր իշխանության կողմից է:

Հայկ Ալումյանը նաև նշեց, որ ստանդարտ պատճառաբանություններ են բերվում առ այն, որ կալանավորման պայմանները չեն փոխվում, քանի որ Ռոբերտ Քոչարյանը, ազատության մեջ գտնվելով, իբրև կխոչընդոտի քննությանը կամ կարող է թաքնվել քննությունից:

«Դատարանն այսպիսի հարց ուղղեց, թե արդյոք պարոն Քոչարյանը փորձե՞լ է քննությանը խոչընդոտել: Քննիչը պատասխանեց, որ չէ, չի փորձել խոչընդոտել քննությանը: Հետո շարունակեց և ասաց, որ գիտեր, որ խոչընդոտելու դեպքում դա կարող էր կալանավորման պատճառ հանդիսանալ»,- նշեց պաշտպանը։

Գլխավոր դատախազության հատկապես կարևոր գործերով քննության նկատմամբ հսկողության վարչության ղեկավար Վահագն Մուրադյան էլ իր հերթին լրագրողներին հայտնեց, որ այսօրվա դատական նիստում քննիչը ներկայացրել է իր միջնորդությունը, դատարանը հարցեր տվեց քննիչին, դառախազներին, պաշտպաններն իրենց առարկություններն են հայտնել։

Հարցին՝ ինքն անձամբ միակարծի՞ք է քննիչի միջնորդության հիմքերին, նա դրական պատասխան տվեց, սակայն , թե որոնք են հիմքերը, ասաց, որ հայտնել չի կարող։