Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի կալանքը գրավով փոխարինելու միջնորդությունը քննող դատարանի կազմի հիմքերի մասին հարցերին դատարանի նախագահը դեռ չի պատասխանել։ Քոչարյանի փաստաբանական թիմի անդամ Արամ Օրբելյանը դատարանում լրագրողների հետ զրույցում նշեց՝ այդ պատասխանից հայտնի կլինի, արդո՞ք ինքնաբացարկի հիմքեր կան դատավորին, թե՞ ոչ։

Հարցին, արդո՞ք այսօր դատարանը կքննի կալանքը գրավով փոխարինելու միջնորդությունը, Օրբելյանը դժվարացավ ասել, ամեն ինչ կախված է պատասխանից ու ինքնաբացարկ հայտնելու հնարավորությունից։ Այս պահին դատավորին ինքնաբացարկի միջնորդություն հայտնելու հիմքեր չեն տեսնում։

Անդրադառնալով մամուլի այն հրապարակմանը, ըստ որի՝ «Քոչարյանի խափանման միջոցի վերաբերյալ միջնորդությունը քննելու բախտը վիճակվել է մի դատավորի, որը հենց Քոչարյանի իշխանավարման տարիներին՝ 1999թ.. օգոստոսին, վերաքննիչ դատարանում «Հայկական ժամանակ» օրաթերթի գլխավոր խմբագիր, այժմ ՀՀ վարչապետ Նիկոլ Փաշինյանին դատապարտել էր մեկ տարվա պայմանական ազատազրկման», Օրբելյանն ասաց, դա ինքնաբացարկի հիմք չէ։

«Եթե իհարկե չպարզվի, որ վարչապետն ինչ-որ կերպ ուղղակի առնչություն ունի, ի նկատի ունեմ, գաղտնալսումները։ Ամեն դեպքում մենք այս պահին դա ինքնաբացարկի հիմք չի հանդիսանում»,-ասաց նա՝ չբացառելով, որ հետագայում որոշ տվյալներ ի հայտ գալուն զուգահեռ  այն հիմք դառնա։

Հիշեցնենք, որ դատարանը միևնույն ժամանակ կքննի նաև Հատուկ քննչական ծառայության քննիչի կողմից Ռոբերտ Քոչարյանի նկատմամբ խափանման միջոց կալանավորումը ևս երկու ամիս ժամանակով երկարացնելու վերաբերյալ միջնորդությունը:

Փաստաբանի խոսքով, իրենք պնդելու են որ դրանք առանձին քննվեն։

«Կպնդենք, որ միջնորդություններն իրար հետ չմիացնեն։ Դրանք տարբեր են, նույնիսկ տարբեր մեղադրանքների են վերաբերում, նույնիսկ տարբեր ժամանակահատվածների են վերաբերում։ Պետք է խնդրենք, որ սկզբում քննվի գրավի միջնորդությունը և դրա վերաբերյալ որոշում կայացվի, նոր դրանից հետո քննվի կալանքը երկարացնելու միջնորդությունը, եթե իհարկե գրավի միջնորդությունը մերժվի»,-ասաց փաստաբանական խմբի անդամը։

Հիշեցնենք, որ Դատավոր Նելլի Բաղդասարյանի կողմից՝ հունվարի 10-ին, դատախազների և քննիչի միջնորդությունը բավարարելուց և ինքնաբացարկ հայտնելուց հետո, կալանավորումը գրավով փոխարինելու վերաբերյալ միջնորդության քննարկումը մակագրվել է դատավոր Դավիթ Գրիգորյանին, սակայն դատավոր Գրիգորյանը հունվարի 12-ին ինքնաբացարկ է հայտնել պատճառաբանելով, որ հերթապահ չի եղել, բայց գործն իրեն է մակագրվել:

Այդ ամենից հետո գործը մակագրվել է դատավոր Արթուր Մկրտչյանին:

Հիշեցնենք, որ Ռոբերտ Քոչարյանի պաշտպանները կալանավորումը գրավով փոխարինելու վերաբերյալ միջնորդությունը ներկայացրել են դեռևս նախորդ տարի՝ դեկտեմբերի 26-ին, և դատարանին խնդրել են որոշել սահմանվող գրավի չափը: