Ձեր վստահելի աղբյուրը

Պետական եկամուտների կոմիտեն «Գազպրոմ Արմենիա» ընկերությունում շարունակում է ստուգումները: Ինչպես այսօր լրագրողների հետ հանդիպման ժամանակ ասաց ՊԵԿ նախագահ Դավիթ Անանյանը, դրանք սովորական, ընթացիկ ստուգումներ են՝ կապված բյուջեի հետ փոխհարաբերությունները ճշտգրտելու հետ:

Նա նշեց, որ մամուլի հաղորդագրություն էին տարածել, որ այնտեղ կա նաև որոշակի քննչական գործողություններ կատարելու անհրաժեշտություն: «Ընթացիկ պրոցեսը շարունակվում է և ես խորհուրդ կտամ գազի սակագնի փոփոխությունը կամ այդպիսի ակնկալիքները մեր հսկողության հետ որևէ կերպ չկապել: Առաջին անգամ չէ, որ ՊԵԿ-ը «Գազպրոմ Արմենիա»-ում ստուգում է իրականացնում: Սա սովորական ստուգում է: Ուղղակի գազալցակայանների այս գործողությունների կամ ՊԵԿ-ի այդ հսկայածավալ հսկողական գործառույթների համատեքստում մի քիչ թեման, կարծես թե, ավելի մեծ հանրային հնչողություն ստացավ, որի կարիքը, կարծում ենք, այդքան էլ չկա»,- ընդգծեց Դավիթ Անանյանը:

ՊԵԿ նախագահը նաև ասաց, որ ընկերությունում այս պահին գործընթացը կասեցված է, որոշակի ճշգրտող տեղեկություն ձեռք բերելու նպատակով: