Ձեր վստահելի աղբյուրը

ՊՊԾ գունդը գրաված «Սասնա ծռեր» խմբի 10 անդամների  դատական նիստին ամբաստանյալ, ոստիկան Գագիկ Մկրտչյանի սպանության մեջ մեղադրվող Արմեն Բիլյանի շահերի պաշտպան  Զարուհի Փոստանջյանը միջնորդեց փոխել նրա խափանման միջոց կալանավորումը՝  չհեռանալու մասին ստորագրությամբ։

Ամբաստանյալ Պավել Մանուկյանը դատարանում հայտարարեց, որ Արմեն Բիլյանն այս ազգին պիտանի մարդ է, հանցավոր անցյալ չի ունեցել, նա որպես հայազգի մասին մտահոգ քաղաքացի կատարել է իր սրբազան պարտքը։

«Արմեն Բիլյանն այս հարցում հանցանք չի գործել, ապացույցները ցույց կտան։ Մենք չենք խուսափում պատասխանատվությունից։ Մենք գալիս ենք ու գալու ենք դատարան, հետամուտ ենք լինելու, մեզ պետք է, որ բացահայտվի այս հանցագործությունը»,- նշեց նա։

Նշենք, որ Արմեն Բիլյանին մեղադրանք է առաջադրվել ՊՊԾ գնդում վիրավորված, այնուհետև հիվանդանոցում մահացած ոստիկան Գագիկ Մկրտչյանի սպանության համար: Ավելի վաղ ՊՊԾ գնդի գրավման գործով դատավարության ժամանակ ամբաստանյալ Պավլիկ Մանուկյանը  հայտարարել էր, որ հիվանդանոցում մահացած ոստիկանին պատահաբար կրակել է ոչ թե Արմեն Բիլյանը, այլ՝  Էդվարդ Գրիգորյանը։

Նիստին ներկա սպանված Գագիկ Մկրտչյանի կինն ասաց. «Ազգի համար գնացող մեկը բանկոմա՞տ է թալանում, հանուն հայրենիքի ու հանուն ժողովրդի  մարդը չի գնում մանր գողության: Երկրորդ, ինձ հետաքրքիր չի` վնասվածքը եղել է իր կողմից, ուրեմն թող մինչև վերջ էլ նստի ու պատասխան տա: Գագիկ Մկրտչյանը վիրավոր է եղել, 27 օր ապրել է, որից 12 օրը գիտակցության մեջ է եղել, խոսել է,  ես խոսել եմ Գագիկի հետ։ Առարկում եմ միջնորդությունը»,-ասաց նա։

Դատարանը մերժեց ներկայացված միջնորդությունը:

Հիշեցնենք, որ ՊՊԾ գնդի գրավման գործով «Սասնա Ծռեր» խմբի անդամներից կալանքի տակ շարունակում են մնալ ամբաստանյալներ Արմեն Բիլյանն ու Սմբատ Բարսեղյանը, որոնք մեղադրվում են նաև սպանության մեջ: Մյուսների նկատմամբ ընտրված խափանման միջոց կալանավորումը փոխվել է՝  պատգամավորների անձնական երաշխավորությամբ։ Պավել Մանուկյանն ազատ է արձակվել 1 միլիոն դրամ գրավի դիմաց։