Ձեր վստահելի աղբյուրը

«Ինձ համար կայացած հասարակության, իրավագիտակից հայ մարդու ինստիտուտի կայացման հիմքում ընկած է բարձր որակի կրթությունը։ Բազմիցս բարձրաձայնել են կրթության ոլորտում առկա բազմաթիվ խնդիրները, որոնք պահանջում են օրենսդրական բարեփոխումներ։ ԱԺ-ն կարևորագույն դերակատարություն է ունենալու այդ գործում»,- ԱԺ գիտության, կրթության, մշակույթի, սփյուռքի, երիտասարդության և սպորտի մշտական հանձնաժողովի նախագահի թեկնածու Մխիթար Հայրապետյանը։

Նա մեջբերեց Նելսոն Մանդելայի խոսքերը, որ կրթությունը կարող է լինել այն գործիքը, որը կարելի է օգտագործել աշխարհը փոխելու համար։

«Ժամանակն է Հայաստանը փոխելու, իսկ թավշյա հեղափոխությունից հետո Հայաստանը փոխելու համար ունենք բոլոր նախադրյալները։ Ինձ համար սա կարևորագույն հանձնաժողով է։ Այստեղ անելիքները բազում են և դրանք արդյունք են տալու, առավել քան վստահ եմ»,- ասաց պատգամավորը։

Մխիթար Հայրապետյանը անդրադարձավ հանրակրթության ոլորտին՝ շեշետելով, որ այստեղ համակարգային փոփոխություններ են անհրաժեշտ։ Գիտության ոլորտում ևս, ըստ նրա, բավականաչափ անելիքներ կան։

ԼՀԿ ղեկավար Էդմոն Մարուքյանը հետաքրքրվեց Մխիթար Հայրապետյանից՝արդյոք նա դիսկոմֆորտ չի զգում, որ իր՝ պատգամավոր ընտրվելուց հետո Սփյուռքի նախարարությունը կարող է կրճատվել։

Մարուքյանը հետաքրքրվեց՝ ինչո՞ւ Հայրապետյանի՝ նախարար լինելու ժամանակ գերատեսչության դերը խիստ կարևորվում էր, իսկ արդեն հիմա այդքան չի կարևորվում։

«Մենք բավականին ազնիվ ենք եղել մեր ընտրողների առջև, որովհետև վարչապետ Փաշինյանը ամիսներ առաջ հայտարարեց, որ նախարարությունների թիվը կտրուկ կրճատվելու է։ Ամենայն պատասխանատվությամբ ասում եմ, որ սփյուռքի հետ քաղաքականության գործառույթները, որ ունեցել է Սփյուռքի նախարարությունը, պահպանվելու են»,- ի պատասխան նկատեց հանձնաժողովի նախագահի թեկնածուն։

Մարուքյանն էլ նշեց, որ Սփյուռքի նախարարության կրճատման և կոմիտեի ստեղծման դեպքում այդ գերատեսչությունը դուրս է բերվում խորհրդարանական վերահսկողության դաշտից։

«Չե՞ք զգում այնպիսի դիսկոմֆորտ, որ շուրջ 7 ամիս  եղել եք սփյուռքի նախարար, ձեր բազմաթիվ հարցազրույցներում արտերկրյա այցերի ժամանակ անընդհատ ասել եք, որ կարևոր է այս առաքելությունը և ձեր առաքելությունը, և հիմա որոշում է կայացվել փակել: Ո՞նց մենք այս ուղերձը տանք մեր սփյուռքի հայրենակիցներին, որ վնաս չբերի Հայաստան-Սփյուռք հարաբերություններին, և եթե կարևորել եք նախարարությունը, հիմա ինչո՞ւ կարևոր չի, որովհետև էլ Դուք նախարար չե՞ք»,-հարց ուղղեց նա:

Մխիթար Հայրապետյանը հակադարձեց, թե որևէ մեկը չի ասել, որ Սփյուռքի նախարարությունն այլևս կարևոր չէ:

«Սփյուռքի նախարարության կարևորության մասին բազմիցս խոսել ենք, բայց եթե պահպանենք, պետք է տանք սուպերլծակներ, որովհետև եթե պետք է մնա այն, ինչ նախկինում եղել է՝ որպես խորհրդանշական ինստիտուտ, ապա ավելի լավ է՝ չլինի։ Եթե Սփյուռքի նախարարությունը պետք է լինի, որպեսզի սփյուռքին հաճոյանանք, ավելի լավ է՝ չլինի, և մենք անկեղծ լինենք սփյուռքի հետ մեր երկխոսության մեջ»,-ասաց նա:

 «Լուսավոր Հայաստան» կուսակցության պատգամավոր Սրբուհի Գրիգորյանն էլ հարց հնչեցրեց Կարո Փայլանի՝ Թուրքիայի խորհրդարանի կողմից պատգամավորական անձեռնմխելիությունից զրկելու փորձի մասին. «Հանձնաժողովն ինչպե՞ս է կարողանալու կանգնել սփյուռքահայ մեր հայրենակցի կողքին»։

Ի պատասխան Հայրապետյանն ասաց. «Եթե Սփյուռքի նախարարությունը լիներ, չեմ կարծում, որ ինչ-որ բան պիտի փոխվեր, եթե Կարո Փայլանին ուզում են անձեռնմխելիությունից զրկել։ Այստեղ կարևոր կլինի նաև տեղի հայ համայնքի հետ կապը։ Բացի այդ՝ միջազգային այլ հարթակներում ևս կարելի է այդ խնդիրը բարձրացնել այլ խողովակներով»։

«Լուսավոր Հայաստան» կուսակցության պատգամավոր Անի Սամսոնյանն էլ հետաքրքրվեց, թե սփյուռքի հետ համագործակցության կառուցման աշխատանքում ի՞նչ թերացումներ են արձանագրվել և ի՞նչ նոր մոտեցումներ են փորձել ներդնել, ինչպիսի՞ տեսլական ունեն այդ հարաբերությունների մասին։

«Իմ գործունեության ութ ամիսների ընթացքում մի խումբ հայ սփյուռքագետների հետ, ինչպես օրինակ Խաչիկ Թորոլյանը, Արա Սանջյանը, մենք սփյուռքի հետ քաղաքականության ռազմավարության նոր կոնցեմպտ մշակեցինք։ Այդ ռազմավարության սևագիր տարբերակը պետք է հանրային քննարկումների արդյունքում հենց բերել նրան, որ մենք կունենանք այդ ռազմավարությունը։ Հետևողական եմ լինելու, որպեսզի նաև խորհրդարանական հարթակն օգտագործվի այդ ռազմավարության մշակման առումով»,- ասաց թեկնածուն։

Նրա խոսքով՝ սփյուռքի հետ համագործակցությունը պետք է լինի երկկողմանի փոխշահավետության սկզբունքով։

Արման Բաբաջանյանն էլ հարցրեց. «Սփյուռքի նախարար լինելու Ձեր պաշտոնավարման վերջում տված հարցազրույցներից մեկում նշել էիք, որ նախարարությունը կրել է հիմնականում սիմվոլիկ բնույթ։ Ինչ պետք է անեք, որ այս հանձնաժողովում սփյուռքին վերաբերող հարցերը ևս սիմվոլիկ չլինեն։ Ի՞նչ եք պատրաստվում անել սփյուռքում գտնվող Հայաստանի քաղաքացիների ընտրելու իրավունքը վերականգնելու համար»։

«Խորհրդանշական էր, քանի որ բազմաթիվ այլ գերատեսչություններ ունեցել են սփյուռքի հետ առանձին բաժիններ, այսինքն հարաբերվել են իրենց սեփական խողովակներով։ Այստեղ սփյուռքի նախարարությունը բացարձակ գերակա կարծիք հայտնելու և որոշման ստատուս չի ունեցել»,- պատասխանեց Հայրապետյանը։

Ինչ վերաբերում է ընտրելու իրավունքին՝ ասաց. «Այն կլինի օրակարգում, եթե մենք մեկ այլ կարևոր հարցի պատասխանենք՝ ինչպես ենք պատրաստվում կազմակերպել դա։ Ինչպես պետք է անենք, որպեսզի բոլորը ստանան այդ հնարավորությունը, օրինակ Ռուսաստանում՝ Պետերբուրգից մինչև Վլադիվաստոկ, այդ դեպքում։ Խնդիրներ կան նաև քարոզարշավի հետ կապված։ Խնդիրներ կան, որոնք բացակայում են օրակարգից՝ կրկին ընտրելու իրավունքը վերականգնելու համար»։