Ձեր վստահելի աղբյուրը

«Մարդու իրավունքները հետհեղափոխական Հայաստանում», ԱԺ ամբիոնից իր ելույթն այսպես վերնագրեց «Լուսավոր Հայաստան» խմբակցության ղեկավար Էդմոն Մարուքյանը։

«Երկրում մի իրավիճակ է, որ բոլորը հպարտ են ու ուրախ, որ երկրում հեղափոխություն է եղել, այդ թվում՝ ես, բայց մարդու իրավունքների հարցում խնդիրներ ունենք, և ոնց որ թե խոսողներ չկան, և այն մարմիններն ու ինստիտուտները, որոնք կոչված են, որ խոսեն, վախեցած են ֆեյսբուքյան կամ այլ ձևաչափերով իրենց վրա ուղղված հարձակումներից: Ուզում եմ հստակ ասել՝ չենք լռել, չենք էլ լռելու, բոլորս պետք է իմանանք, որ Հայաստանում մարդու իրավունքներն այնքան էլ լավ վիճակի չեն»,-ասաց Էդմոն Մարուքյանը:

Պատգամավորը նշեց, որ ինքն իր կյանքի 10 տարին նվիրել է մարդու իրավունքների պաշտպանությանը և շատ անհանգիստ է այսօր եղած վիճակից:

«Այնտեղ փաստաբանն ուզում է՝ պաշտպանյալի նիստին մասնակցի, բայց բողոքի ցույց է, մասնագիտական գործողությունները խոչընդոտվում են, ոստիկանները նայում են, սպասում են, որ մի հատ էլ թքեն, որ ասեն՝ լավ, քիչ թքեք, Արդարադատության նախարարությունը ոչ մի ձայն չի հանում դեպքի վերաբերյալ, մեր կուսակցությունը հայտարարությամբ է հանդես գալիս Քրեական օրենսգրքի վերաբերյալ, հայտարարությունից հետո՝ երեք օր անց, նույն նախագիծը շրջանառության մեջ է դրվում, իյաա, բա ու՞ր էիք, էս ինչ գրագողություն է։ Մեր իշխանություններին ուզում եմ «շնորհավորել» ՄԻԵԴ-ում արդեն կոմունիկացված գործ կա ձեր դեմ՝ փնթի վարված նախաքննության հետ կապված։ Տպավորություն կա, որ գաղտնալսման դեպքն անցավ, գնաց, ուրեմն իմացեք՝ չի մարսվել, մեր պետությունը չի մարսել, դրա ձայնը դեռ կլսեք եվրոպական դատարաններից։

Գաղտնալսման մասով գործ կա հարուցված, բայց  ոնց որ ձեն-ձուն չկա հա՞, բայց ոնց որ հարցնող չկա ինչ եղավ։ Մենք հարցնելու ենք։ Հասել ենք նրանք, որ դատավորները խուսափեն քրեական գործեր քննելուց, գործադիր իշխանությունը պետք է հստակ ձևակերպում տա, որ դատարանները պետք է լինեն անկախ, փաստաբանները՝ պաշտպանված, դրանք կոնկրետ գործողությունների տեսքով պետք է լինեն: Որ շատ ուրախացել ենք, որ նախկին իշխանությունների ներկայացուցիչների դեմ գործեր կան հարուցված, կարո՞ղ է այնքան անենք, որ փաստաբանները հրաժարվեն պաշտպանել, ու մարդիկ, գործերը չսկսած, կրեն բոլոր առումներով եվրոպական դատարաններում»,- ասաց Մարուքյանը։

Նրա խոսքով՝ հասել ենք նրան, որ թերթի խմբագիր է բողոքում իշխանություններից, ընդ որում հեղափոխությանը սատարած թերթի խմբագիր, իսկ մեդիա կազմակերպությունները չեն արձագանքում. «Մարտի 1-ի ժամանակ ՔԿՀ-ներ եմ այցելել այսօրվա իշխանությունների բազմաթիվ ներկայացուցիչներին, բայց այսօր մենք մի իրավիճակում ենք, որ տեսնում եմ՝ նույն պրակտիկան է նույն նախաքննական մարմնի կողմից, էն ժամանակ որ արգելքներ կային տեսակցությունների հետ կապված, հիմա էլ կան, ես ու Նիկոլը գնացել էինք Ժիրայր Սեֆիլյանին տեսնելու, նույն հիմնավորմամբ, որ մեզ չթույլատրեցին, այսօր մարդկանց մոտ այդ նույն հիմնավորմամբ չեն կարողանում մտնել»։

Պատգամավորը զգուշացրեց, որ մարդու իրավունքների հետ կապված ոչնչի առջև կանգ չի առնելու՝ անկախ նրանից, թե ով կնեղանա, քանի որ դրանից վեր արժեքներ իր համար չկան. «Տիկին Զոհրաբյանի թեկնածությունը ԱԺ մարդու իրավունքների մշտական հանձնաժողովի նախագահի պաշտոնում շատ լավ է, որպես միշտ բարձր ձայն ունեցող մարդ, մենք էլ մեր ներդրումը կունենանք հանձնաժողովում, ես իմ գիտելիքներով ձեզ ծառա»։

«Երբ տեղեկացա, որ օրինակ Սամվել Մայրապետյանի գործն այդքան արագ կոմունիկացվել է ՄԻԵԴ, ապշած եմ, գործեր ունեմ՝ հինգ տարի է, ինչ դեռ չեն սկսել նամակագրությունն ինձ հետ, երբ ամիսների ընթացքում գործ են կոմունիկացնում, ամեն ինչ պետք է տրամաբանություն ունենա, սենց ուր ենք գնում, ուռա-ուռա ասելով՝ գնալու ենք, խայտառակ լինենք»,-ասաց նա:

Պատգամավորրը կոչ արեց բոլոր այն քաղաքացիներին, փաստաբաններին, իրավական ոլորտի ներկայացուցիչներին, որոնց սահմանադրական իրավունքները ոտնահարվել են, դիմել «Լուսավոր Հայաստան» խմբակցությանը։

«Իմ քայլը» խմբակցության ղեկավար Լիլիթ Մակունցն էլ իր ելույթում Մարուքյանին դիմելով ասաց. «Մենք որպես իշխանություն, չենք  հանդիսանում նշված խնդիրների պատճառը: Բայց ինչպես մենք, այնպես էլ դուք՝ որպես ընդդիմություն, մեզ կարող ենք համարում ու պատասխանատու ենք համարում, որ, իհարկե, մարդու իրավունքների  տիրույթում կան ՀՀ-ում խնդիրներ: Մենք սկզբունքային դիրքորոշում ունենք, որ պետք է լուծում տանք բոլոր հարցերին, և ուրախ եմ, որ նշեցիք՝ պատրաստ եք ձևաչափեր գտնել, որ մատնանշեն շատ հարցեր պատկան մարմիններին, և մենք այդ հարցում գտնվում ենք նույն տիրույթում»։