Ձեր վստահելի աղբյուրը

Բրիտանացի երգիչ և կոմպոզիտոր Դեյվիդ Բոուին (1947-2016)  Միացյալ Թագավորությունում համարել են «20-րդ դարի մեծագույն էստրադային արտիստ»։ ՏԱՍՍ-ի հաղորդմամբ, Բի-Բի-Սի հեռարձակող ընկերության կողմից անցկացված հարցման համաձայն, բրիտանացի ռոք երգիչ, երգերի հեղինակ, դերասան և երաժշտական պրոդյուսեր, նկարիչ և հնչյունային ռեժիսոր Բոուին առաջ է անցել մյուս հավակնորդներից՝ կինոդերասան, կատակերգու Չարլին Չապլինին (1889-1977 թթ.), բլյուզ կատարող Բիլլի Հոլիդեյին (1915-1959 թթ.), դերասանուհի Մերլին Մոնրոյին (1926-1962 թթ.):

Իր գործունեության առաջին տարիներին թողարկելով «David Bowie» ալբոմը և մի քանի սինգլներ՝ Դեյվիդ Բոուին հանրությանը հայտնի է դարձել միայն 1969 թվականին, երբ նրա «Space Oddity» երգը հասել է բրիտանական հիթ-շքերթի լավագույն հնգյակ։ 3 տարվա փորձերից հետո նա կրկին հասարակությանը ներկայացել է 1972 թվականին՝ գլեմ-ռոքի ծաղկման ժամանակ՝ ստեղծելով Զիգգի Սթարդաստ անունով կերպար։ Նրա «Starman» սինգլը հանրահայտ «The Rise and Fall of Ziggy Stardust and the Spiders from Mars» ալբոմից մտնում էր Մեծ Բրիտանիայի հիթ-շքերթի լավագույն տասնյակի մեջ։ Զիգգի Սթարդաստի կերպարը օգտագործելու ժամանակ Բոուին հաճախ էր երաժշտական ոչ սովորական, վիզուալ նորամուծություններ մտցնում։

1975 թվականին Բոուին հասել է առաջին մեծ հաջողությանը Ամերիկայում իր առաջին «Fame» սինգլով, որ գրված էր Ջոն Լենոնի հետ համատեղ և Young Americans ալբոմով, որի ոճը երգիչը պլաստիկ սոուլ է համարում

2002 թվականին 100 ամենամեծ բրիտանացիների վերաբերյալ Բի-Բի-Սի-ի հարցման մեջ Բոուիին գրավել է 29-րդ հորիզոնականը։ Իր կարիերայի ընթացքում նա վաճառել է ավելի քան 136 միլիոն սկավառակներ՝ դրանով մտնելով Մեծ Բրիտանիայի հայտնի երաժշտության պատմության ամենահաջողակ արտիստների շարք։ Նրա ալբոմներից վեցը մտնում են Rolling Stone ամսագրի տարբերակով «բոլոր ժամանակների 500 լավագույն ալբոմների» ցանկում։ 2004 թվականին Rolling Stone ամսագիրը նրան համարել է 39-րդը «բոլոր ժամանակների 100 լավագույն ռոք կատարողների» ցուցակում և 23-րդը «բոլոր ժամանակների 100 լավագույն վոկալիստների» ցուցակում։
Բոուն մահացել է 2016 թվականին 69 տարեկանում լյարդի քաղցկեղից, ինչի դեմ նա պայքարում էր իր կյանքի վերջին կես տարվա ընթացքում։