Պետրոսյանի կարծիքով՝ կասկածելի է պարգևատրման հիմք հանդիսացած հանգամանքների առկայությունը
««Բարգավաճ Հայաստան» կուսակցությունը մտադիր է նոր խորհրդարանում հանդես գալ բազմաթիվ օրենսդրական նախաձեռնություններով»,- այսօր լրագրողների հետ ճեպազրույցում ասաց ԲՀԿ խմբակցության պատգամավոր Գևորգ Պետրոսյանը:
«Լիահույս ենք, որ ԱԺ-ում «Իմ քայլը» դաշինքը, ունենալով բացարձակ մեծամասնություն, ականջալուր կլինի ընդդիմադիրների կողմից բարձրացվող հարցերին, և խնդիրները ԱԺ-ում կլուծվեն փոխըմբռնման, փոխհամագործակցության արդյունքում, քանի որ դրանից շահում է ՀՀ ժողովուրդը։ «Բարգավաճ Հայաստան» կուսակցության սկզբունքը մեկն է, գործել այնպես, ինչպես թելադրում է ժողովրդի շահը», - ասաց նա:
Պատգամավորը նշեց նաև, որ ավելորդ լավատեսություն չունի, որ ընդդիմադիրների բոլոր նախաձեռնությունները հաջողությամբ կպսակվեն կամ ընդդիմադիրները կողմ կքվեարկեն խորհրդարանական մեծամասնության բոլոր նախաձեռնություններին:
Լրագրողները Պետրոսյանից հետաքրքրվեցին նաև այս օրերին շրջանառվող մարզպետների՝ իրենց կողմից տրվող պարգևավճարներից ու 13-րդ աշխատավարձերի մասին լուրերից։
«Մենք այդ ամենին ընդամենը տիրապետում ենք ինտերնետային կայքերի մակարդակով։ ՀՀ Սահմանադրության համաձայն յուրաքանչյուր պետական մարմին, տեղական ինքնակառավարման մարմին և պաշտոնատար անձ իրավասու է իրականացնել միայն այնպիսի գործողություններ, որոնց համար լիազորված է Սահմանադրությամբ կամ օրենքով։ Հիմա ԱԺ-ն առաջին իսկ շփման առումով չունի այնպիսի իրավազորություն քննարկել կոնկրետ մարզպետի պարգևատրման հարցը։ Գոյություն ունի Հաշվեքննիչ պալատ, Պետական վերահսկողական ծառայություն, եթե դրանք կհայտնաբերեն, որպես խախտում կարձանագրեն, ԲՀԿ-ն երբերք չի խորշի այդ խախտման քաղաքական և իրավական գնահատականը տալուց»,- պատասխանեց պատգամավորը։
Նրա խոսքով՝ պետք չէ ավելորդ շտապողականություն դրսևորել և գնահատել այդ ամենը որպես յուրացում, վատնում։
«Ես իմ անձնական կարծիքը կարող եմ հայտնել, որ ընդհանրապես պարգևատրումները ՀՀ գործող աշխատանքային օրենսգրքի համաձայն կատարվում են տարեկան գործողությունների արդյունքների հիման վրա, և քանի որ այդ մարզպետների պաշտոնավարման մեկ տարին չի լրացել, այս առումով կասկածելի է պարգևատրման հիմք հանդիսացած հանգամանքների առկայությունը»,- նշեց Գևորգ Պետրոսյանը։
Անդրադառնալով Կառավարության կառուցվածքում փոփոխությունների հարցին, ԲՀԿ-ական պատգամավորը հայտնեց, քանի որ նախագիծը դեռ ներկայացված չէ, ԲՀԿ ներսում քննարկում չի եղել, հետևաբար որոշում չի կարող լինել։
«Խմբակցության անունից չեմ կարող կարծիք հայտնել, բայց իմ անձնական համոզմամբ՝ ոստիկանությունն ու ԱԱԾ-ն պետք չի տարանջատել իրարից ու մեկի կառավարումը հանձնել կառավարությանը, մյուսինը՝ վարչապետին: Ինձ համար անհասկանալի է՝ ինչո՞ւ պետք է ոստիկանությունը պահել կառավարության կազմում, ԱԱԾ-ն տալ վարչապետին: Երկուսն էլ կոչված են ՀՀ-ում հանցագործությունների կանխմանը, հասարակական կարգի ամրապնդմանը: Այս կառույցները թեև գործառութային մի շարք էական տարբերություններ ունեն, բայց դրանք պետք չի տարանջատել, այլապես այդ կառույցների փոխշահավետ, փոխհամաձայնեցված և շահավետ համագործակցությունը կարող է խախտվել», - ասաց նա:
Ինչ վերաբերում է Սփյուռքի և Մշակույթի նախարարությունների լուծարմանը՝ կրկին հայտնեց միայն իր անձնական կարծիքը. «Այդ լուծարումը նպատակահարմար չէ։ Հայ ժողովրդի գոյապահպանման գործում մշակույթը ոչ պակաս դերակատարում է ունեցել, որքան՝ զինված ուժերն ու բանակը: Պարզպապես խնդիրն այն է, որ չգիտենք այն լուծարելով, այդ գործառույթների իրականացումը ինչ մեխանիզմով է կառավարությունը տեսնում: Դրա համար մեզ համար շտապողական կլինի, որ ասենք՝ միանշանակ դեմ ենք մշակույթի նախարարության լուծարմանը»։
Լրահոս
Տեսանյութեր
Աշխարհի առաջնությունից առաջ ինձ «подножка տվեց» Սիմոն Մարտիրոսյանը. Փաշիկ Ալավերդյան
