Ձեր վստահելի աղբյուրը

Քաղաքական գործիչ Գուրգեն Եղիազարյանն այսօր կայացած մամուլի ասուլիսի ժամանակ համոզմունք հայտնեց՝ ՀՀ երկրորդ նախագահ Ռոբերտ Քոչարյանին բաց կթողնեն, քանի որ նա մեկը մեկից ուժեղ և հաջող փաստաբաններ ունի։

«Ես հավատում եմ նրա փաստաբաններին։ Եթե նրանք գործն ուսումնասիրելուց հետո ասում են, որ ջուր է, ուրեմն ջուր է։ Ինչ վերաբերում է ձայնագրություններին, դրանցից պարզ երևում է, որ այս ամենի թիկունքում մեկ մարդ է կանգնած՝ անուն-ազգանունը՝ Փաշինյան Նիկոլ։ Թե ինչու է նա ընկել Ռոբերտ Քոչարյանի հետևից, ժամանակին կպարզվի։ Կարող է՝ Նիկոլ Փաշինյանը մի մեծ նախագծի մի փոքր հատվածն է միայն»,- ասաց նա։

Խոսելով Մարտի 1-ի՝ բացահայտված լինելու մասին հայտարարություններից՝ բանախոսը չհամաձայնեց հնչած տեսակետի հետ։

«Հինգ ամիս անցել է արդեն։ Եթե բահայտված է, ինչո՞ւ մինչև այսօր մարդասպանները հայտնի չեն։ Ինչո՞ւ է նրանց անունները գաղտնի պահվում։ Ոչ մի բան էլ չի բացահայտվել, ուղղակի հարյուր օրվա համար ասեցին, անցան առաջ՝ մեկը մեկից սուտ։ Խնդիրն այլ հարթության վրա է. պետք էր ականջալուր անել բոլորին, որ Մարտի մեկը բացահայտված է։ Ամեն սանտիմետրը նկարված է՝ որտեղ են սպանել, ինչպես են սպանել, մնում է նայել և հայտնել մարդասպանների մասին։ Բայց ոչ, Փաշինյանը խնդիր ուներ Քոչարյանի նկատմամբ, ինչ խնդիր ուներ՝ կպարզվի։ Հիվանդ, մահամերձ Մայրապետյանին էլ պահում են, լավ է՝ բաց թողեցին, հիմա էլ չեն թողնում գնա Գերմանիա»,- ասաց նա։

Գուրգեն Եղիազարյանը նաև հարց ուղղեց՝ զարմանալի չէ՞ր, որ ազատ արձակվեց Մանվել Գրիգորյանը։

«Էս իշխանությունների հիմնական «ռոլիկը» Մանվելն էր՝ իր տուշոնկաներով։ Իմ գործը չէ,  դատարանը թող որոշի՝ նա մեղավոր է, թե ոչ։ Բայց դատավորն այստեղ կապ չունի, դատարանների հետ կապված ցանկացած հարց լուծում է մի մարդ՝ Նիկոլ Փաշինյանը։ պարտադիր չէ, որ նա կանչի-հրահանգի դատավորին։ Ես ապացույցներ ունեմ, որ անձամբ ինքն է բաց թողել Մանվել Գրիգորյանին։ Եթե հանկարծ մի դատավորի մտքով անցներ բաց թողնել Մանվելին, պատկերացնո՞ւմ եք ինչ հայտարարություններ կհաջորդեին մեկը մյուսին, ինչ ելույթներով ու հայտարարություններով կլցնեին համակարգը։ Մանվելին բաց թողնելու խնդիրն այլ հարթությունում է. նախևառաջ, որպեսզի փնովենք դատական համակարգը, որ ասենք՝ Մանվելի պես հրեշին բաց թողեցին։

Երկրորդ, Նիկոլին օդի պես հարկավոր է, որ այդ համակարգը հանի փողոց, որպեսզի վճիռները լուծվեն ոչ թե դատարանի դահլիճում, այլ փողոցում։ Հիմա դուրս կգա Ռոբերտ Քոչարյանը, էլի կփակեն փողոցը, կպահանջեն, որ դատվի և ոչ մի ապիկարի մտքով չի անցնի հարցնել՝ ուր են Մարտի մեկի մարդասպանները։ Դեռ պետք է տարբեր ատյաններում ապացուցեք, որ Ռոբերտ Քոչարյանն է հրամաններ արձակել»,- ասաց նա։

Գուրգեն Եղիազարյանը միաժամանակ կեսկատակ-կեսլուրջ նշեց՝ Նիկոլ Փաշինյանը երեք օրով գնում է արտասահմանյան գործուղման, երեք թշնամի վաստակած՝ վերադառնում է։

«Հո ամբողջ աշխարհին պատերազմ չենք հայտարարելու։ Գնա Դավոս, մի քանի թշնամի էլ կարող է այնտեղից բերի։ Չի կարողանում աշխատի»,- ասաց բանախոսը։

Անդրադառնալով պարգևատրումների թեմային՝ բանախոսը հիշեցրեց՝ խանութներում պարտքով հաց վերցնելու համար ցուցակագրված հարյուր հազարավոր մարդիկ կան։ 

Հարցին՝ ինչո՞ւ է վարչապետին պետք ոստիկանությունն ու ԱԱԾ-ն պահել իր ենթակայության  ներքո, Գուրգեն Եղիազարյանը նշեց՝ իրեն հենց դա է պետք. «Բա եթե այդ կառույցները չլինեն, ասֆալտի վրա փռելը, պատերը լղոզելն ով պետք է անի»։