Ձեր վստահելի աղբյուրը

ԱՄՆ Հայ Դատի հանձնախմբի գործադիր տնօրեն Արամ Համբարյանն  անդրադարձել է  ԵԱՀԿ Մինսկի  խմբի հայտարարության այն հատվածին, որ պետք է Հայաստանի ու Ադրբեջանի ժողովուրդներին նախապատրաստել խաղաղության։

Համբարյանը նկատում է, որ հանրությունը ճշգրիտ գնահատական տալու համար գործընթացի թափանցիկության կարիք ունի, և առանց թափանցիկությաննման  կոչերը նման են հետևյալին՝ դու կարող ես ինձ վստահել, բայց պարտադիր չէ, որ ամեն ինչ իմանաս:

«Հակամարտության կարգավորման ներկա փուլի մասին հստակ պատկերացում կազմելու համար հարկավոր է նախ ստանալ այս հարցերի պատասխանները՝
-արդյո՞ք «Մադրիդյան սկզբունքներ»-ն ընթացիկ բանակցությունների համար հիմք են,
-ո՞րն է քննարկվող համաձայնագրի ուրվագիծը,
-ի՞նչ դերակատարում է ունենալու Արցախն այս գործընթացում,
-արդյո՞ք Ալիևը հետ է կանգնել իր «Երբեք Արցախ» դիրքորոշումից,
— ո՞ր տարրերն են առաջնային և որո՞նք` երկրորդական,
-ո՞րն է երկրորդ պլան մղված հանձնառությունների իրականացման տեսլականը,
-ի՞նչ երաշիքներ կարող են առաջարկվել ագրեսիայի չվերսկսման համար,
-որո՞նք են խաղաղապահների վերաբերյալ իրական սպասումները,
-հաստատման դեպքում ինչպե՞ս է կյանքի կոչվելու համաձայնագիրը կարճաժամկետ, միջնաժամկետ և երկարաժամկետ հեռանկարում:

Օրինակ, եթե Արցախը տարածք հանձնի, արդյո՞ք Ադրբեջանն ազնիվ կգտնվի ու կկատարի Արցախի ապագա կարգավիճակի վերաբերյալ իր հանձնառությունները: Կամ արդյո՞ք Ադրբեջանն այդ զիջումը որպես թուլության նշան կընկալի ու տարածքային նոր հավակնություններ կներկայացնի, մինչև որ Արցախն ամբողջությամբ, հայերով կամ առանց նրանց, չի հայտնվի Բաքվի վերահսկողության տակ»,-գրել է Համբարյանը:
Նա նշել է, որ պետք է հաշվի առնել պատմության դասերն ու աշխարհագրական դիրքը և նախապատրաստվել վատագույնին:

«Այժմ անխոհեմ մտածողության ժամանակը չէ»,-նշել է  Համբարյանը:

Հիշեցնենք, որ ավելի վաղ ԱՄՆ Հայ Դատի հանձնախումբը սուր կերպեով արձագանքել էր ԵԱՀԿ ՄԽ նախագահների` «կեղմերին խաղաղության նախապատրաստելու» հայտարարությանը` այն «հիմարների համաձայնություն» որակելով: