Ձեր վստահելի աղբյուրը

Իրավական ակտերի նախագծերի e-draft.am կայքում շրջանառության մեջ է դրվել «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին օրենքի նախագիծը և հարակից նախագծերի փաթեթը, ինչը հասցրել է լուրջ դժգոհություններ առաջացնել ոչ միայն փաստաբանների, այլ հաշվապահների մոտ:

Նախագծի հրապարակումից թեև անցել է երկու օր, սակայն մասնագետներն արդեն հասցրել են իրենց բացասական գնահատականը տալ շրջանառության հարկին վերաբերող փոփոխությունների դրույթին։ Մասնավորապես, փոփոխության համաձայն, նախատեսվում է շրջանառության հարկ վճարողների ցանկից հաշվապահական, խորհրդատվական, իրավաբանական ծառայություններ մատուցողներին հանել և բերել ԱԱՀ-ի դաշտ:

Մասնագետները վստահ են, որ այս նախագծի ընդունումից հետո հաշվապահական հաշվառման, իրավաբանական ծառայություններ մատուցողների հարկման բեռը մի քանի անգամ մեծանալու է, արդյունքում՝ կբարձրանան ծառայությունների գները, կավելանա ստվերը, իսկ դրանից կտուժեն համապատասխան ծառայություն ստացող քաղաքացիներն ու իրավաբանական անձինք: «Անթույլատրելի է, երբ կատարվում են փոփոխություններ առանց համապատասխան ոլորտի մասնագետների կարծիքը հարցնելու»,- ասում են ոլորտի ներկայացուցիչները:

Նրան մեծ մասը կարծում է, որ ՀՀ ֆինանսների նախարարությունը մոտավորապես 20%-ով կթանկացնի ՀՀ-ում գրանցված անհատ ձեռնարկատերերի կողմից մատուցվող ծառայությունների գինը և նրանց անհավասար մրցակցության մեջ կդնի այն օտարերկրյա անհատ հաշվապահների, խորհրդատուների և իրավաբանների հետ, որոնց զգալի մասը իր երկրում ԱԱՀ-ով չի հարկվում:

Նախագծի վերաբերյալ հաշվապահական ընկերություններից մեկի աշխատակիցն էլ e-draft.am-ում իր դժգոհությունը հետևյալ կերպ է արտահայտել. «Չի կարելի նման չմտածված ու չքննարկված քայլ անել: Փոխարենը ԴՈՒԽՈՎ առաջ գնանք, ԴՈՒԽՈՎ հետ ենք գնում»:

Այսպիսով, նախագծի վերաբերյալ իրենց տեսակետները հայտնած մասնագետների հիմնական մասը ամբողջ փաթեթին դեմ են հենց այս մեկ կետի պատճառով։

Հայաստանի հաշվապահների և աուդիտորների ասոցիացիայի հարկային մասնագետ Գրիգորի Կոստանդյանը Panorama.am-ի թղթակցի հետ զրույցում ասաց, որ նախատեսվող փոփոխությունը ենթադրում է՝ եթե բոլոր հաշվապահական ընկերությունները կամ անհատ ձեռնարակատերերն աշխատեն ԱԱՀ-ի դաշտոմ, բնականաբար, նրանց մատուցած ծառայությունների արժեքը 20 տոկոսի չափով կավելանա:

«Կարծում եմ՝ սա կբերի նրան, որ հաշվապահական ծառայությունից օգտվողները կհրաժարվեն թանկ ծառայությունից, կամ էլ այդ ծառայությունը կմատուցվի առանց փաստաթղթավորման, առանց պայմանագիր կնքելու: Բացի այդ, այդ փոփոխության պատ-առով տվյալ ոլորտում ստվերը կմեծանա»,- ասաց հարկային մասնագետը:

Ըստ Գրիգորի Կոստանդյանի՝ տվյալ դրույթը պետք է փաթեթից հանվի, քանի որ պետք չէ ասել՝ եթե անհատ ձեռնարկատերը կամ իրավաբանական անձը զբաղվում է հաշվապահական հաշվառմամբ, կամ իրավաբանական ծառայություններ է մատուցում , ուրեմն միանշանակ ինքը պետք է լինի ավելացված արժեքի հարկ վճարող. «Միգուցե այլ սահմանափակում դնեն: Կարծում եմ, որ ավելի շատ պետք է «Շահութահարկի մասին» օրենքով ինչ-որ նորմեր նախատեսել»:

Նա նաև նշեց, որ իրենց կազմակերպությունը ևս այս հարցի շուրջ իր դիրքորոշումը կհայտնի:

Գրիգորի Կոստանդյանի խոսքով՝ Հայաստանում գրեթե ամեն տարի հարկային օրենսդրության տարբեր դրույթներ փոխում են, ինչը լավ չէ թե բիզնեսի, թե ներդրումների համար: «Հարկային օրենսդրությունը հաճախակի փոխելը շատ վատ է բիզնեսի համար, քանի որ փոփոխություններն անկանխատեսելի իրավիճակներ են ստեղծում բիզնեսի համար: Մարդիկ որոշակի պլաններ են մշակում, ծախսեր են հաշվարկում ու մեկ էլ փոխվում է այս կամ այն դրույթը, ուստի նրանք ժամանակի ընթացքում չեն կարողանում կանխատեսել իրենց հարկային բեռը ու այն միջավայրը, որտեղ գործունեություն են իրականացնում»,- ասաց մասնագետը: 

Ըստ նրա՝ ցանկացած փոփոխությունից առաջ պետք է հաշվի առնել մարդկանց կարծիքները, իսկ փոփոխությունները պետք է այնպես անել, որ դրանք լինեն երկարաժամկետ: