Ձեր վստահելի աղբյուրը

«Մենք որևէ կերպ չենք շեղվել մեր դիրքորոշումներից, երբ ընդգծել ենք այն բոլոր հիմնական սկզբունքները, որոնք վերաբերում են բացառապես խաղաղ կարգավորմանը, բացառապես Մինսկի խմբի համանախագահության շրջանակներում»,- Եռաբլուրում լրագրողների հետ ճեպազրույցում ասաց ՀՀ արտաքին գործերի նախարար Զոհրաբ Մնացականյանը:

Նա նշեց, որ այդ առումով ընդգծել են նաև խաղաղությանը նպաստող միջավայրի կարևորությունը։

«Ամենակարևորը, որ մենք ասել ենք, Հայաստանի համար ստատուսի և անվտանգության հարցերը մնում են ամենագերակա խնդիրները: Սրա շուրջ են բանակցությունները: Մենք ունենք մեր գերակայությունները ու չի եղել որևէ բան, որ դուք չիմանաք», - ասաց նա:

Նախարարը վստահեցրեց, որ չկա որևէ բան, որ խափանելու են իրենց դիրքորոշումները։

«Մենք պարտվողական չենք եղել և չենք լինելու»,- ասաց Զ.Մնացականյանը։ 

Անդրադառնալով բանակցություններին Լեռնային Ղարաբաղի ներգրավածության հարցին՝ նախարարը նշեց, որ դա հետևողական աշխատանք է:

«Լեռնային Ղարաբաղի ներգրավածությունը նաև պրակտիկ կիրառական հարց է: Եթե ամեն բան միանգամից չի լինում, չի նշանակում, որ մոռացանք, անցանք: Սա մեզ համար շատ կոնկրետ պրակտիկ խնդիր է, որպեսզի ավելի գործնական, ավելի իրատեսական լինել, բանակցային գործընթացում պրոգրես ունենալ», - ասաց նա:

Նախարարը նշեց, որ ժողովուրդներին խաղաղություն նախապատրաստելն անհրաժեշտություն է, որևէ նորություն չկա։ 

«Մենք աշխատում ենք խաղաղության համար, բայց մեր վճռականությունը չպետք է հարցականի տակ դրվի։ Խաղաղությանն այլընտրանք չկա։ Խաղաղության այլընտրանքը կատարստրոֆան է»,- ասաց Զ.Մնացականյանը։

Հարցին, թե երկու երկրների ղեկավարները երկու-երեք անգամ հանդիպում են առանց ԵԱՀԿ Մինսկի խմբի համանախագահների ուղղակի մասնակցության, մեկնաբանություններ կան, որ  կարծես շեղում է տեղի ունենում Մինսկի խմբի ֆորմատից, նախարարն ասաց. «Չէի ասի։ Առաջինը, որ եղել են երեք հանդիպում, եղել են անպատրաստի,  օգտագործվել է այն առիթը, որ  երկու ղեկավարները գտնվել են նույն վայրում միջոցառումների ժամանակ։ Սա ողջունելի է, դրական է,  առիթ է եղել  միմյանց ճանաչելու, փոխանակելու տեսլականները, մոտեցումները»։ 
Ինչ վերաբերում է Վիեննայի և Սանկտ Պետերբուրգի պայմանավորվածություններին, ԱԳ նախարարն ասաց, որ դրանք վերաբերում են ռիսկերի նվազեցմանը:
«Մենք ունենք Վիեննան և Սանկտ Պետերբուրգը, դրան ավելացել է նաև Դուշանբեն: Մենք հասել ենք մի իրավիճակի, երբ կան նվազ ռիսկեր, հանգստություն շփման գծում և սահմանին։ Սա նպաստավոր է: Որևէ հարց դուրս չի եկել: Մեզ համար ռիսկերի նվազեցումը եղել և մնում է ամենաէական հարցերից մեկը, ինչպես էլ որ դա կոչեք։ Ինչ որ կաշխատի, կաշխատացնենք»,- նշեց Զոհրաբ Մնացականյանը: