Ձեր վստահելի աղբյուրը

«Վստահորեն կարող եմ ասել, որ ունենք բանակ, որը բազում սխրանքներ է  գործել, հաղթանակ է ապահովել, այսօր երաշխավորոն է մեր երկրի, ժողովրդի անվտանգությունը»,- Բանակի օրվա առիթով պաշտպանության նախարարության կազմակերպված միջոցառմանը լրագրողների հետ զրույցում ասաց ՀՀ գլխավոր դատախազ Արթուր Դավթյանը։

Խոսելով գեներալ Մանվել Գրիգորյանի գործի մասին, նա ասաց, որ գլխավոր դատախազությունը այս գործով հանդես է գալիս որպես մեղադրանքի կողմ, իր ունեցած հիմքերով, փաստերով  ներկայացրել է բողոք, որևէ կողմնակալ դիրքորոշում ներկայացնելու մասին խոսք լինել չի կարող:

Ինչ վերաբերում է բավարար ու ակնհայտ ապացույցների դեպքում Մանվել Գրիգորյանի մեղադրանքը լրացնելուն, Ա.Դավթյանն ասաց, որ քրեական գործերով ճնշող մեծամասնության դեպքերում սկզբնական և ավարտական փուլում մեղադրանքները տարբերվում են: 

Նա նշեց, որ քննությունն արդեն յոթ-ութ ամիս ընթանում է, քննության առարկա են դառնում բազմապիսի նոր դրվագներ,ակնհայտ է, որ այդ դրվագներից, որոնցով ձեռք կբերվեն բավարար ապացույցներ, մեղադրանքը լրացվելու է: Սակայն չնշեց, թե  կոնկրետ ինչ դրվագներ են ներգրավելու։ 

«Քննությունը դեռևս չի ավարտվել։ Կան դրվագներ, որոնցով բավարար չափով ապացույցներ կան, կան դրվագներ, որոնցով դեռ քննությունն ընթանում է, և ապացույցների ծավալը պետք է մեզ թույլ տա՝ որոշելու՝ փոխելու ենք, չենք փոխելու»,- նշեց գլխավոր դատախազը:

Մանվել Գրիգորյանը կալանավորված է։ Նրան մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար: