Ձեր վստահելի աղբյուրը

«We remember» (Մենք հիշում ենք) գրությամբ ցուցանակներ են պարզել  Հոլոքոստի զոհերի հիշատակը հարգելու եկած քաղաքացիները։  Զոհերի հիշատակը հավերժացնող հուշարձանի մոտ հունվարի 27-ին  կառավարության, հրեական համայնքի ներկայացուցիչներ են եղել, Ցեղասպանության թանգարանի տնօրենը, գեներալ լեյտենանտ, պրոֆեսոր Հայկ Քոթանջյանը, քաղաքացիներ, երիտասարդներ։ Նրանք ծաղիկներ են դրել, մոմեր վառել։

Panorama.am-ի հետ զրույցում Հայաստանի hրեական համայնքի նախագահ Ռիմա Վարժապետյանն ընդգծեց, անընդհատ պետք է հիշեցնել ու խոսել ցեղասպանությունների մասին՝ նորերը թույլ չտալու համար։

«Հիմա համացանցում շատ վատ տեսանյութեր կան, որոնք բռնության կոչեր են անում, երիտասարներին դրդում բռնությունների։ Այն ինչ կատարվում է  շատ երկրներում, ընդհանրապես աշխարհում, մտահոգիչ է։ Պետք է նախ մարդկանց դաստիարակել, ատելություն սերմանել նման գործողությունների նկատմամբ, ապա դատապարտել դրանք»,-նշեց համայնքի ներկայացուցիչը։

Ռիմա Վարժապետյանը մտահոգված է, ՄԱԿ-ի հայաստանյան գրասենյակի աշխատակիցներին տեղյակ են պահել Հոլոքոստի զոհերի հիշատակի միջոցառման մասին, սակայն կառույցից որևէ մեկը ներկա չի գտնվել։

«Չէ՞ որ ՄԱԿ-ի ասամբլեան ընդունել  ու ճանաչել է Հոլոքոստը։ Նրանք արդեն երկրորդ տարին է՝ չեն մասնակցում մեր միջոցառումներին։ Տեղեկացրել ենք, ավելին, մի քանի տարի առաջ նրանք էին այս միջոցառումների նախաձեռնողը, մեզ ցուցապաստառներ էին տրամադրում, իսկ հիմա ընդհանրապես չեն մասնակցում, երկակի ստանդարտներ են գործում։ Նրանք հիմա Իսրայելը որակել են ֆաշիստ պետություն։ Սա ահազանգող է, քանի որ էլ ի՞նչ կազմակերպություն, եթե ոչ ՄԱԿ-ը, պետք է պայքարի այդ բռնությունների, ֆաշիստական տարրերի դեմ»,-ասաց նա։

Դիտարկմանը, որ  տարբեր պատճառաբանություններով  Հոլոքոստ տեսած  Իսրայելը չի ճանաչում Հայոց Ցեղասպանությունը, Ռիմա Վարժապետյանը նկատեց, Իսրայելը՝ որպես քաղաքացիական պետություն ճանաչում է, ցավակցում է, ուսումնասիրում է Եղեռնի խնդիրը, այդ թեմայով գրքեր են հրատարակվում, ֆիլմեր են ցուցադրվում։

«Դրանք շատ կարևոր են։ Ես այս տարի Քնեսեթի պագամավորներից մեկի հետ պայմանավորվածություն եմ ձեռք բերել, որ նոր խորհրդարանի ձևավորումից հետո, կարողանանք հենց Քնեսեթում ցուցադրել Մանվել Սարիբեկյանի՝ Ցեղասպանության մասին նկարահանած ֆիլմը։ Անցած տարի ֆիլմը ցուցադրվեց Թել Ավիվի ամենամեծ կինոթատրոնում։ Պետք է աշխատել, շատ լավ գիտեք, որ այս ամենը պայմանավորված է տնտեսական ու անվտանգության հարցերով։ Թուրքիան ուժեղ երկիր է, նրա հետ վեճի բռնվելը վտանգավոր բան է հատկապես Իսրայելի դեպքում, քանի որ այն միակ մուսուլմանական երկիրն է, որի հետ կապեր ունի։ Տեսնենք, հույս ունենք, որ դրան կհասնենք։ Գիտեք, կարծում եմ, որ Հայաստանին դա  այնքան էլ պետք չէ, Հայաստանի համար այնքան էլ կարևոր չէ, քանի որ Հայոց Ցեղասպանությունը ճանաչել է աշխարհը, կարող եք համարել, որ այդ թվում Իսրայելը»,-ասաց նա։

Հիշեցնենք՝ Հոլոքոստ նշանակում է ողջակիզում։ Երկրորդ համաշխարհային պատերազմի ժամանակ՝ 1941 թվականից մինչև 1945 թվականն ընկած ժամանակահատվածում  Նացիստական Գերմանիայի և իր դաշնակիցների կողմից համակարգված կերպով ոչնչացվել են շուրջ վեց միլիոն եվրոպացի հրեաներ՝ Եվրոպայի հրեա բնակչության մոտավորապես երկու երրորդը։ Ադոլֆ Հիտլերն իր հակամարդկային պլանն արդարացնում էր «Ո՞վ է այսօր խոսում հայերի բնաջնջման մասին...» արտահայտությամբ։











Լուսանկարները՝ Վարժապետյանի ֆեյսբուքյան էջից։