Ձեր վստահելի աղբյուրը

«Հանրապետության նախագահն անձեռնմխելի է։ Այն նորմը, որով նրան մեղադրանք է առաջադրվել, տեղին չէ, այդ նորմով նրան մեղադրանք առաջադրել չի կարելի»,-լրագրողների հետ զրույցում հայտարարեց ՀՀ երկրորդ նախագահ Ռոբերտ Քոչարյանի փաստաբանական խմբի անդամ Ռուբեն Սահակյանը։

Նա ընդգծեց, գործում հիմնավոր կասկածը բացակայում է. «Եվ ընդհանրապես դա փաստաթուղթ չի, որը կայացվել է դատարանի կողմից, և այն միջնորդությունը, որը ներկայացվել է դատարան։ Համենայն դեպս իմ կարծիքով, դրանք իրավական տեսանկյունից քննադատության չեն դիմանում։ Քննիչից պահանջում ենք, որպեսզի պարոն Քոչարյանն ազատ արձակվի»։

Լրագրողները հետաքրքրվեցին, դատարանի որոշման մեջ՝ կալանքը երկարաձգելու վերաբերյալ ինչ հիմնավորումներ են ներկայացված։

«Ոչինչ էլ չի նշել, դատարակ միջնորդություն է։ Գտել են, որ առկա է հիմնավոր կասկած, անձեռնմխելիությունն էլ տվյալ դեպքում չի գործում։ Էն, ինչ գրված է եղել քննիչի միջնորդության մեջ, արտագրել է ու ասել՝ դրանք առկա են։ Ես չեմ ասում կոնկրետ ինչի մասին է խոսքը, որովհետև կբացահայտեմ քննության գաղտնիքը»,-ասաց նա։

Ռուբեն Սահակյանը նշեց, նիստում նախ փորձելու են պարզել, թե ինչպես է ընտրվել դատարանի այս կազմը, ինչից հետո կորոշեն՝ ինքնաբացարկի միջնորդություն կներկայացնե՞ն դատավորին, թե՞ ոչ։

«Ես պնդում եմ, այդ մեղադրանքը չէր կարող առաջադրվել Ռոբերտ Քոչարյանին։ Իրավական տգիտություն է բոլոր նրանց կողմից, ովքեր այդ մեղադրանքը պաշտպանում են։ Ռոբերտ Քոչարյանն անձեռնմխելի է, բոլոր նրանք, որ հակառակն են ասում, տգետ են կամ նպատակ են դրել անել այն, ինչ մինչ օրս արել են, այսինքն ապօրինի մեղադրել, ձերբակալել, կալանավորել հանրապետության երկրորդ նախագահին։ Ես այն կարծիքին եմ, որ սահմանադրական կարգը տապալելու փորձ կատարվել է Լևոն Տեր-Պետրոսյանի ու նրա շրջապատի կողմից, բայց քանի որ փոփոխություն իրականացվեց Քրեական օրենսգրքում, նրանց նկատմամբ քրեական հետապնդումը դադարեցվեց»,-ասաց նա։

Նա հիշեցրեց, Քրեական օրենսգրքում փոփոխությունը կատարվել է 2009-ի մարտին, արդեն մարտի վերջին Ալեքսանդր Արզումանյանի ու ևս վեց հոգու նկատմամբ քրեական հետապնդումը դադարեցվեց։

«Այդ նորմը վերափոխվեց, 300 հոդվածը տրանսֆորմացիայի ենթարկվեց, շարադրվեց նոր խմբագրությամբ, բաղկացած երկու հոդվածից՝ իշխանությունը զավթելը և իշխանությունը պահելը վերնագրերով։ Թող այդ հոդվածով մեղադրանք առաջադրեն Ռոբերտ Քոչարյանին, ինչո՞ւ չեն անում։ Չէ՞ որ Ռոբերտ Քոչարյանին մեղադրում են այն բանի մեջ, որ նա սահմանադրական կարգն է խափանել՝ յուրացնելով իշխանությունը։ Մի՞թե կարդալ  չգիտեն մեր իրավագետները, քննիչները, դատախազը։ Գիտեն կարդալ։ Եթե գրված է, որ նա մեղադրվում է իշխանությունը յուրացնելով սահմանադրական կարգը տապալելու համար, ապա ճիշտ 300-րդ հոդվածն է։ Ինչո՞ւ չեն փոխում մեղադրանքը, իրենց հարցրեք»,-ասաց նա։

Վերաքննիչ քրեական դատարանը՝ դատավոր Մնացական Հարությունյանի նախագահությամբ, այս պահին քննում է ՀՀ երկրորդ նախագահ Ռոբերտ Քոչարյանի խափանման միջոցի վերաբերյալ պաշտպանական խմբի ներկայացրած բողոքը:

Հիշեցնենք, որ Երևան քաղաքի ընդհանուր իրավասության դատարանի՝ 18.01.2019 թ․ որոշմամբ, բավարարվել է Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանքի տակ պահելու ժամկետը երկարացնելու վերաբերյալ և մերժվել՝ պաշտպանների միջնորդությունը Ռոբերտ Քոչարյանի նկատմամբ որպես խափանման միջոց ընտրված կալանքն այլընտրանքային խափանման միջոց գրավով փոխարինելու մասին:

Դատարանի այս որոշման դեմ պաշտպանական խումբը վերաքննիչ բողոք է ներկայացրել: