Ձեր վստահելի աղբյուրը

ՀՀ նախկին փոխվարչապետ, նախագահի աշխատակազմի նախկին ղեկավար Արմեն Գևորգյանի փաստաբան Էրիկ Ալեքսանյանը վերաքննիչ դատարանում լրագրողներին հայտնեց՝  այս պահին հստակ ասել, որ կդիմեն Վճռաբեկ դատարան միանշանակ ասել չի կարող։

«Պարզ տրամաբանությունը հուշում է, եթե մենք Վերաքննիչ դատարան էինք դիմել 190 հոդվածի՝ այսինքն հիմնավոր կասկածի արձանագրման հետ, ապա պարզ տրամաբանությունը հուշում է, որ մենք նաև Վճռաբեկ պետք է բողոք ներկայացնենք, բայց հաշվի առնելով այն հանգամանքը, որ դեռ չենք խորհրդակցել թե պարոն Գևորգյանի, թե գործով մյուս պաշտպանի հետ, ուստի Վճռաբեկ դիմելու վերաբերյալ միանշանակ պատասխանել չենք կարող»,-ասաց Էրիկ Ալեքսանյանը։

Ինչ վերաբերում է Վերաքննիչ դատարանի կայացրած որոշմանը, ապա Ալեքսանյանն ասաց, կարծում է, որ առաջին ատյանի ու վերաքննիչ դատարանները կայացրել են անկախ դատական ակտ։

«Մենք որևէ կասկած չունենք դատական համակարգի անկախության վերաբերյալ»,-ասաց նա։

Փաստաբանը նշեց, որ կալանավորման հիմքերի ու հիմնավոր կասկածի դատախազության պնդումների հետ համաձայն չէ պաշտպանական կողմը, կալանավորման հիմքերի հետ համաձայն չէ  նաև դատարանը։

«Կալանավորման հիմքերից վարույթն իրականացնող մարմինը նշել էր թաքնվելը, քննությանը խոչընդոտելը, որը կարող է դրսևորվել վարույթի մասնակիցների վրա ճնշումներ գործադրելով։ Որևէ ապացույց, որոնք նման ենթադրություն կառաջացնեին, վարույթն իրականացնող մարմինը չէր ներկայացրել»,– ասաց փաստաբանը` միաժամանակ հավելելով, որ նախաքննական մարմինը նման ապացույց ներկայացնելու պարտավորություն չունի, սակայն պետք է փաստական տվյալներ ներկայացներ։

Էրիկ Ալեքսանյանն ասաց, որ առաջին ատյանի դատարանի կայացրած որոշումից հետո մինչ այս պահը Արմեն Գևորգյանի մասնակցությամբ որևէ դատավարական կամ քննչական գործողություն չի կատարվել։

Նա հիշեցրեց, որ Գևորգյանին առաջադրված է երեք մեղադրանք՝ սահմանադրական կարգի տապալումը, որը դրսևորվում է օժանդակությամբ, առանձնապես խոշոր չափերով կաշառք ստանալը, փողերի լվացումը։

«Այն հարցերին, որոնք գտնվում են նախաքննության գաղտնիքի շրջանակում, չեմ կարող պատասխանել»,-ասաց փաստաբանը։