Ձեր վստահելի աղբյուրը

«Պարգևատրումներ պետք է լինեն, բայց դրանք արդյունքային ցուցանիշների հետ պետք է կապված լինեն։ Այս առումով, կարծում եմ, որ պետական համակարգում աշխատավարձային քաղաքականության էական վերանայումներ պետք է լինեն»,- ԱԺ-ում լրագրողների հետ ճեպազրույցում ասաց «Իմ քայլը» խմբակցության անդամ, տնտեսագետ Արտակ Մանուկյանը։

Նրա խոսքով՝ խնդիր կա նաև, թե ով է ում պարգևատրում, ինչ ցուցանիշների դիմաց։

«Իմ կարծիքով, պարգևատրումը որպես գործիքակազմ պետք է լինի, այլ հարց է, որ դա պետք է կապված լինի արդյունքային ցուցանիշների հետ»,- ասաց պատգամավորը։

Լրագրողները հետաքրքրվեցին, թե հնարավո՞ր է պարգևավճարները վերադարձնել, Մանուկյանը պատասխանեց, որ դա անձնական սեփականություն է և անձը կարող է որոշել՝ ինչ անել դրա հետ։

Անդրադառնալով ՊԵԿ նախագահի դիտարկմանը, թե պարգևավճարները պետք է կոռուպցիոն ռիսկերը զսպելու համար, նա նշեց, որ պարգևավճարը կամ աշխատավարձային ավելի բարենպաստ քաղաքականություն իրականացնելը, որպես պայքարի արդյունավետ տարբերակ, անհրաժեշտ, բայց ոչ բավարար է։