Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի վերաբերյալ առաջին ատյանի դատարանի որոշման դեմ պաշտպանական խմբի կողմից ներկայացված բողոքի քննությանը նա երկու ժամ ելույթ է ունեցել, մանրամասն ներկայացրել 2008-ի փետրվարի 23-ից հետո ստեղծված իրավիճակը, դրվագ առ դրվագ անդրադարձել մեղադրանքին։ Դատական նիստից հետո լրագրողներին ասաց Ռ. Քոչարյանի պաշտպաններից Հայկ Ալումյանը։

«Մանրամասն  ներկայացրեց այն իրավիճակը, որ ստեղծվել էր 2008-ի փետրվարի 23-ի դրությամբ։ Մասնավորապես, բավականին շատ տեղեկատվություն էր ստացվում, որ բանակում աշխատանքներ են տարվում, որպեսզի բանակայինները միանան ցուցարարներին, պաշտպանության փոխնախարարները, որոնցից մեկը նաև ԵԿՄ ղեկավար էր,  ԵԿՄ վարչությունում խմորումներ էին սկսվել, որ նրանք էլ միանան ցուցարարներին։ Ստեղծված իրավիճակում ինքը ցուցում է տվել պաշտպանության նախարարին, որպեսզի վերջինն ապահովի բանակի չեզոքությունը։ Ցուցում է տվել, այսինքն՝ ասել է գնացեք, ապահովեք, որպեսզի  բանակը այս պրոցեսներին չխառնվի, պաշտպանության նախարարին էլ ասվել է, որ ինքը ապահովի այդ ամենը», - ասաց Հ.  Ալումյանը։

Նա նշեց, որ ցուցումը եղել է բանավոր։

Պաշտպանն ասաց, որ անդրադարձ եղել է 0038 հրամանին, պարոն Քոչարյանը հստակ ասել, որ    հրամանին ծանոթանալուց հետո տեսել է, որ դրանում որևէ բան չկա, որը պետք է այդպես չլիներ, այլ ուրիշ ձևով լիներ։

«Նա ևս մեկ անգամ ընդգծեց, ինչպես պաշտպանության նախարարի ցանկացած հրաման,  այնպես էլ 0038 հրամանը ո՛չ իր պաշտոնավարման ժամանակ, ո՛չ Լևոն Տեր Պետրոսյանի և ո՛չ էլ Սերժ Սարգսյանի պաշտոնավարման ժամանակ, երբևիցե նման հրամանները չեն ուղարկվել նախագահական որպեսզի նախագահն այդ հրամանին ծանոթանա կամ իր հավանությունը տա կամ իր մոտ պահի», - նշեց փաստաբանը։

Հարցին, թե ստացվում է պաշտպանության նախկին նախարար Միքայել Հարությունյանի վրա՞ է մնում ամբողջ մեղքը՝ հրաման ստորագրելու ու դրա մասին չիրազեկելու համար, Հ. Ալումյանը պատասխանեց. «Իմ համոզմամբ, նշված հրամանը իր մեջ չի պարունակում որևէ դրույթ, որի համար կարելի է պարոն Հարությունյանին ոչ միայն մեղադրանք առաջադրել, այլ նույնիսկ նախատել։ Չկա այդպիսի դրույթ։ Այդ հրամանի մասին ձեզ բացարձակ ապատեղեկացրել են։ Այդ հրամանի մեջ չկա որևէ բան, որի համար կարելի էր թեկուզ ոչ թե քրեական պատասխանատվության ենթարկել, այլ ամաչել։ 0038 հրամանի մեջ ոչ մի վատ բան չկա»։

Անդրադառնալով մարտի 1-ի տասը զոհերին, Հայկ Ալումյանը նշեց՝  չի տեսնում, որ ՀՔԾ-ն սպանությունների հանգամանքների շուրջ լուրջ քննություն է իրականացնում: