Ձեր վստահելի աղբյուրը

Մհեր Ենոքյանի կողմից դաժանաբար սպանված Իոսիֆ Աղաջանովի ընտանիքի անդամները որևէ տեղեկություն չունեն՝  ներվածների ցուցակում կա՞ հանցագործի անունը, թե՞ ոչ։

«Ես համոզված չեմ, որ մենք նախագահի աշխատակազմից կամ կառավարությունից պետք  է տեղեկություն ստանանք։ Չենք էլ դիմել»,-Panorama.am-ի հետ զրույցում ասաց սպանվածի քույրը, հայտնի բժիշկ Ելենա Աղաջանովան։

Լրատվական կայքերից մեկում նրանք կարդացել են, որ ներվածների մասին տվյալներ է հրապարակելու արդարադատության նախարարությունը։ Ամեն րոպե սպասում են այդ հայտարարությանը։

Իսկ մինչ այդ մեծ հույս ունեն, որ Մհեր Ենոքյանի անունը ներում ստացածների ցուցակում չկա։

Հիշեցնենք, որ Իոսիֆ Աղաջանովի հայրը բաց նամակով դիմել է վարչապետ Փաշինյանին՝ խնդրելով հանդիպել իր հետ։ Ինչպես հայտնեց նրա դուստրը, մինչ այս պահը հանդիպումը չի կայացել։

«Կառավարությունից ասում են, որ վարչապետը տեղեկացված է խնդրանքի մասին,  զբաղված է, սպասեք, ձեզ հետ կապ կհաստատեն»,-ասաց Աղաջանովան։

Հիշեցնենք՝ երեկ հայտնի դարձավ, որ ՀՀ նախագահի  նախագահի աշխատակազմը ստացել է մի շարք անձանց ներման խնդրագրերի վերաբերյալ վարչապետի առաջարկությունը և առանց առարկությունների ստորագրել համապատասխան հրամանագիրը:

Նախագահի աշխատակազմից նաև հայտնել էին, որ ներման խնդրագրերի մասին Հանրապետության նախագահի կողմից ստորագրված հրամանագիրը օրենքով սահմանված կարգով և ժամկետում ուղարկվել է համապատասխան լիազոր մարմին՝ Արդարադատության նախարարություն:

Ավելի վաղ նախագահականից հայտնել էին,  հաշվի առնելով, որ հասարակական հնչեղություն ստացած՝ ցմահ դատապարտյալ Մհեր Ենոքյանի ներման հարցը, ինչպես նաև՝ 1996թ. սպանված Իոսիֆ Աղաջանովի հոր՝ Երևանի պետական բժշկական համալսարանի բիոքիմիայի ամբիոնի վարիչ, պրոֆեսոր Միխայիլ Աղաջանովի՝ Հանրապետության նախագահին ուղղված հանդիպման խնդրանքը քննարկվում են զանգվածային լրատվամիջոցներում, և ի պատասխան բազմաթիվ հարցումների՝ հայտնում ենք, որ Հանրապետության նախագահին ուղղված բաց նամակի և դիմումի մասին զեկուցվել է նախագահ Արմեն Սարգսյանին: