Ձեր վստահելի աղբյուրը

Այսօր քաղաքապետարանի դիմաց Երևանի կենդանաբանական այգու աշխատակիցների բողոքի ցույցից հետո համացանցում լուրեր տարածվեցին, թե այգու մի քանի աշխատակիցներ հեռացվել են աշխատանքից։

Panorama.am-ը զրուցեց այգու Մարդկային ռեսուրսների կառավարիչ Ազնիվ Գրիգորյանի հետ՝ պարզելու՝ արդյո՞ք ակցիայից հետո աշխատակիցներ են հեռացվել։

Նա հայտնեց, որ այգու երկու ավագ խնամողները՝ Գևորգը և Գայանեն աշխատանքից ազատվել են դեռ երեկ, մինչև ցույցերին մասնակցելը։ Իսկ թե ինչով է պայմանավորված աշխատանքից ազատվելը, նա պարզաբանեց. «Դեռ հունվարի 30-ին բոլոր ավագ խնամողները և կենդանի խնամողները ծանուցում են ստացել իրենց աշխատանքի էական պայմանների, աշխատաժամանակի, հանգստի ռեժիմի,  տրված արտոնությունների փոփոխման մասին։ Համաձայն այդ ծանուցման՝  ավագ խնամողները, այդ թվում և Գևորգն ու Գայանեն,  ովքեր նախկինում աշխատում էին առավոտյան ժամը 9-ից 17-ը, պետք է աշխատեին առավոտյան 8։30-ից մինչև 12։30-ից, հետո երկրորդ հերթափոխով ժամը 15։30-ից  մինչև ժամը 17:30,  դրան գումարած իրենց հանգստյան օրվա նախորդ ամբողջ ցերեկը տանն են լինելու,  իսկ գիշերը 22-ից մինչև առավոտ ժամը 9-ը լինելու են այգում։  Փղի ու գետաձիու խնամող Գևորգին տեղափոխելու էին սողունների բաժին, ոչ թունավոր օձերի ու ձկների խնամքն էր սովորելու, իսկ երկրորդ հերթափոխի ժամանակ լինելու է կերախոհանոցում, քանի որ նա կենդանաբուծություն էր սովորել և կարող էր մասնագիտական աճ ունենալ։ Մնացած բոլոր աշխատողները ստորագրեցին այս ծանուցումը, ասացին որ համաձայն են պայմաններին, իսկ Գևորգը և Գայանեն չեն համաձայնվել նոր պայմաններով աշխատելուն, չեն ստորագրել, հունվարի 31-ից նրանք ազատվել են աշխատանքից։
Մյուս ավագ աշխատողը՝ Արմանին, ծանուցումն ուղարկվել է փոստով, իսկ պատասխան դեռ նրանից չենք ստացել»։

Ազնիվ Գրիգորյանը նշեց, որ ավագ խնամողների այս փոփոխությունը կապված է նրանով, որ իրենք տիրապետեն ամբողջ խնամքի բաժնի աշխատանքներին։

«Չնա այդպիսի բան, որ ցույցի մասնակիցներին են միայն տեղափոխում։ Փոփոխությունները դեռևս սկսել ենք վեց ամիս առաջ՝ բոլոր ավագ խնամողների համար։ Աշխատաժամերի երկարաձգումը պայմանավորված է Կենդանաբանական այգու աշխատաժամանակով, փետրվարի 1-ից այգին բաց է լինելու մինչև ժամը 19-ը։ Նշեմ նաև, որ գիշերային հերթափոխի յուրաքանչյուր ժամի համար վարձատրվելու է աշխատողը»,- հավելեց այգու Մարդկային ռեսուրսների կառավարիչը։