Ձեր վստահելի աղբյուրը

Հունվարի 8-ին ՀՀ Քննչական կոմիտե է ստացվել և վարույթ ընդունվել ՀՀ ոստիկանության Իջևանի բաժնում ՀՀ քրեական օրենսգրքի 178-րդ հոդվածի 2-րդ մասի 1.1 և 2-րդ մասի հոդվածներով հարուցված քրեական գործը:

Քննչական կոմիտեից հայտնեցին, որ Իջևան քաղաքի բնակիչը ոստիկանություն հաղորդում է ներկայացրել, որ Իջևան ԲԿ ՓԲԸ-ի նախկին տնօրենը իրեն հիշյալ ԲԿ-ում աշխատանքի տեղավորելու համար պահանջել և ստացել է 3 հազար ԱՄՆ դոլար գումար, սակայն չկատարելով խոստումը հափշտակել է գումարը:

«Հունվարի 17-ին Իջևան ԲԿ ՓԲԸ-ի նախկին տնօրենին ծանուցագիր է ուղարկվել նախաքննական մարմին ներկայանալու վերաբերյալ: Վերջինս մինչ օրս չի ներկայացել նախաքննական մարմին»,- հայտնեցին Քննչական կոմիտեից։

Կատարվում է նախաքննություն:

Հիշեցնենք, որ Իջևան ԲԿ ՓԲԸ-ի նախկին տնօրենը Նարեկ Վանեսյանն է: Նա առողջապահության նախարար Արսեն Թորոսյանի հովանավորյալն է, «Հոգեկան առողջության պահպանման ազգային կենտրոնի» տնօրենի պաշտոնից ազատման դիմում էր գրել հայտնի միջադեպից հետո։

ՀՀ քրեական օրենսգրքի 178-րդ հոդվածի 2-րդ մասը նշված հոդվածները սահմանում են. 

«Խարդախությունը, որը կատարվել է՝

.1) պաշտոնեական դիրքն օգտագործելով,

2) խոշոր չափերով

պատժվում է տուգանքով` նվազագույն աշխատավարձի հինգհարյուրապատիկից հազարապատիկի չափով, կամ ազատազրկմամբ` երկուսից հինգ տարի ժամկետով»։