Ձեր վստահելի աղբյուրը

Երևանի ընդհանուր իրավասության դատարանում շարունակվեց ՊՊԾ գնդի գրավման գործով  մեղադրվողներ՝ Պավել Մանուկյանի, Վարուժան Ավետիսյանի, Արայիկ Խանդոյանի, Մխիթար Ավետիսյանի, Գագիկ Եղիազարյանի, Արմեն Բիլյանի, Սմբատ Բարսեղյանի, Արեգ Կյուրեղյանի, Էդուարդ Գրիգորյանի, Սեդրակ Նազարյանի գործը: Այսօր դատարան է հրավիրվել նախկին փոխոստիկանապետ Վարդան Եղիազարյանը, ով գործով տուժող է: Նա 2016 թ. հուլիսին ՊՊԾ գնդի գրավման ժամանակ Հայաստանի փոխոստիկանապետն էր։

Վ. Եղիազարյանն ասաց, որ, ըստ էության, քիչ բան կարող է ավելացնել, արդեն ոստիկանապետ Վալերիյ  Օսիպյանը մանրամասն ներկայացրել է, ինչպես նաև այն, ինչ ասել է նախնական քննության  ժամանակ իր ցուցմունքներում, դրանք լրիվ հաստատում է։

Նա պատմեց, որ ժամը 6։00-ին  է հասել դեպքի վայր, այնուհետև Վ.Օսիպյանի հետ գնացել է գունդը գրավածների հետ բանակցությունների։ 

«Ինքնաձիգները դրեցին վզներիս և պահանջեցին, որ գնանք գունդ։ Այդտեղ քաշքշուկ եղավ։ Գնդում  մեր ձեռքերը մի քանի րոպե կապեցին, հետո որոշեցին հանել։ Հիմնականում հայհոյանքներ  էին հնչում, բորբոքված մթնոլորտ էր։ Ի սկզբանե մեր  միակ խնդրանքն ու պահանջն այն էր, որ բաց թողնեն սերժանտական կազմի պատանդության մեջ գտնվող 6-8 հոգու, մերժեցին, հետագայում երկուսին բաց թողեցին, մեկը վատառողջ էր, մյուսը ամուսնանում էր, թե ինչ այդ օրը։ Մեզ անվերջ փորձում էին ուղղորդել, որ իրենց գործողությունները ճիշտ են, իրենց տրամաբանությամբ, որ հեղաշրջում էին իրականացում։ Մենք էլ ուզում էինք մեղմել այդ իրավիճակը։ Վալերիյ Օսիպյանը կապի էր դուրս գալիս մեր ոստիկանների հետ, խնդրում էր, որ կրակոցներ չլինեն։ Այնուհետև մի փոքր անց հնչեցին կրակոցներ։ Խառնաշփոթ վիճակ էր։ Արդյունքում իրենցից մի տղա վիրավորվեց։ Հետո իմացանք, որ մեր ոստիկանության աշխատողներից ևս երեք հոգի ստացել էին մարմնական վնասվածքներ։ Հետագայում մեզ պահում էին սենյակներից մեկում, ինձ ու Օսիպյանին մեկուսացրել էին մյուս տղաներից»,- պատմեց Վ. Եղիազարյանը։

Նա ասաց, որ իր անձնական, սպայական արժանապատվությանը  և իր անձի վերաբերյալ լուրջ ոտնձգություններ չեն եղել, վերաբերմունքը եղել է բավականին պարկեշտ, այնուամենայնիվ, դա գնահատել մեծ լավություն, կարծում է, չի կարելի։

«Իհարկե, պատանդ էինք։ Բայց գնահատականը պետք է տա, որոշի դատարանը  և քննությունը»,-ասաց նախկին փոխոստիկանապետը։

Խոսելով գնդի տարածքում սպանությունների մասին, Վ. Եղիազարյանն ասաց. «Ինձ համար զայրանալու աստիճանի զարմանալի է, որ այսքան ժամանակ ոչ մի ներողամտության կամ զղջանքի խոսք չի եղել։ Նույնպես զարմանալի է, երբ այստեղ խոսում են սպանությունների մասին, դահլիճից նույնիսկ ծափահարություններ են հնչում։ Կարծում եմ՝ սա մարդկային տրամաբանության մեջ չի տեղավորվում։ Ինձ համար այս ամբողջ պատմության մեջ ամենաանհասկանալին սա է՝ ոչ մի զղջանք խմբի կողմից չեմ լսել, ոչ մեկի նկատմամբ։ Երեք հոգի մարդ է զոհվել, սրա  պատասխանն ինչ որ մեկը պետք է տա»։

Վ. Եղիազարյանն ասաց, որ գունդը գրավածների պահանջները բազմազան էին՝ պաշտոնանկ արվի ոստիկանության ղեկավարությունը, Հանրապետության նախագահը, կառավարությունը լուծարվի,  հիմնական մեխը՝ Ժիրայր Սեֆիլյանին ազատ արձակել  կամ նրան գունդ տեղափոխել։ Նա նշեց, որ բոլորը զինված էին, ամենավատն այն էր, որ կային  նռնակներ, «չեմ հասկանում՝ նռնակի կարևորությունը», ղեկավարում էին Պավել Մանուկյանն ու Մխիթար Ավետիսյանը։

Նիստի ընթացքում ամբաստանյալներից մեկն ասաց. «Այն ժամանակ է բացատրվել  ձեզ, որ իշխանությունը յուրացված է եղել, ոստիկանությունը համագործակցել է իշխանության հետ, խլել է մարդկային կյանքեր, խոշտանգելով սպանել է,  հասցրել է ինքնասպանության։ Այդ  պարագայում, եթե կրկնվի, մենք նույնպես սերժանտից մինչև գեներալ կպառկեցնենք պոլին»։ Դահլիճում հնչեցին ծափահարություններ։

Նախագահող դատավոր Մ եսրոպ Մակյանն ամբաստանյալներից Կյուրեղյանին նկատաղություն  հայտարարեց, իսկ Բարսեղյանին 20 ժամով հեռացրեց նիստերի դահլիճից, քանի որ արդեն մեկ անգամ նկատողություն ստացել էր։

«Հաշվի առնելով հանգամանքը, որ դահլիճում գտնվող անձինքն շարունակաբար խախտում են դատական նիստի կարգը, նրանց դրսևորած վարքագծով չի ապահովվում դատական կարգը, ինչպես որ պահանջվում է Քքրեական դատավարության օրենսգրքի 16-րդ հոդվածով,  դատարանը որոշում է կայացնում գործի քննությունն անցկացնել դռնփակ, բացառությամբ դահլիճում գտնվող լրատվամիջոցների, որպեսզի դատական նիստի և գործի քննության հրապարակայնության սահմանափակում թույլ չտրվի»,- հայտարարեց Մ. Մակյանը։

Դահլիճում ներկա «Սասնա ծռերի» աջակիցների  կողմից  դատարանի այս որոշումը վատ ընդունվեց։

Դատարանը հայտարարեց ընդմիջում։ Սակայն հաշվի առնելով,  որ «Սասնա ծռերի» աջակիցները հրաժարվում են լքել դատական նիստերի դահլիճը, դատավոր Մակյանը հատարարեց, որ դատարանը որոշում է կայացրեց հետաձգել այսօրվա դատական նիստը։Վ. Եղիազարյանի հարցաքննությունը կշարունակվի հաջորդ նիստին։