Ձեր վստահելի աղբյուրը

ՀՀ ոստիկանապետ Վալերի Օսիպյանը  «Սասնա ծռեր» խմբի անդամների գործով դատական նիստին մանրամասն պատմեց, թե ինչ է կատարվել ՊՊԾ գնդում այն ընթացքում, երբ ինքը ներսում էր՝ որպես պատանդ։

Հիշեցնենք, որ նա այս գործով տուժող է. 2016 թ. ՊՊԾ գնդի գրավման ժամանակ Վ. Օսիպյանը Երևանի փոխոստիկանապետն էր, մի քանի օր շարունակ պահվել է ՊՊԾ գնդում, այնուհետև ազատ արձակվել։

Վ. Օսիպյանը պատմեց. «2016 թվականի հուլիսի 17-ին առավոտյան ժամը 5-ի սահմաններում ոստիկանության Երևան քաղաքի վարչության հերթապահից ստացա զանգ և  տեղեկացա, որ ՊՊԾ ոստիկանության գունդը մի խումբ զինված քաղաքացիների կողմից զավթվել է։ Ես չեմ համակերպվում այն գաղափարի հետ, որ ասում են՝ գրավել են։ Գրավողն ուրիշ բան կգնա կգրվի, 35 հոգի 6 հոգու դեմ չի գնա գրավի։ Ապօրինի զավթել են։

Տեղեկանալով այս մասին, անմիջապես ծառայողական մեքենայով գնացի ՊՊԾ գունդ։ Հասնելով Էրեբունի ոստիկանության բաժնի մոտ, տեսա հավաքված մի խումբ ոստիկաններ, պարեկային մեքենաներ, անմիջապես հասկացա, որ այդտեղ պիտի կանգ առնեմ։ Կանգնելուց հետո մեքենայից իջա, տեսա ՊՊԾ գնդի մոտ կայանված կարմիր միկրոավտոբուս, շտապօգնության մեքենա, ինքնաձիգերով անկանոն շարժվող մարդիկ, Էրեբունու բաժնի դիմաց կանգնած ոստիկանության աշխատակիցներին։ Ինձ հորդորում էին, որ մի փոքր այն կողմ կանգնեմ,  որպեսզի ինձ չթիրախավորեն, որովհետև երբեմն կրակահերթեր էին լինում։ Տղաներից մեկի մոտ ռադիոկապ կար, լսվող ձայնից տարբերեցի Պավլիկ Մանուկյանի ձայնը և հասկացա, որ գունդ են մտել, մեր կապի միջոցները վերցրել են, բաժանել, մեր հաճախականության տակ իրենք կապի են դուրս գալիս»։

Նա նշեց, որ կապվել է Պավլիկ Մանուկյանի հետ, ներկայացել, առաջարկել զենքերը ցած դնել և դուրս գալ, այնուհետև համաձայնվել է բանակցել։

«Ինքն ընդունեց առաջարկս, բա՝ հիմա մոտենում եմ, ես քայլ արեցի, տղաները ուզում էին հետս գալ, ես  հրամայեցի, որ որևէ մեկը հետս չգա։  Այդ պահին, նկատեցի, որ Էրեբունու ոստիկանության բաժնից մոտեցավ պարոն Եղիազարյանը։ Տեղեկացավ ինչ է կատարվում։ Ես ասացի, որ գնում եմ այնտեղ, ասաց՝ գնանք միասին, ասացի՝ գնանք, պարոն Եղիազարյան։ Փորձում էինք բացատել, որ ճիշտ չեն անում։ Մենք մերն էինք ասում, իրենք իրենցն էին ասում։ Հասկացա, որ խոսակցությունները, բանակցություններն արդյունք չեն տալիս։ Փորձեցի զոհերի, վիրավորների մասին ինչ- որ բան տեղեկանալ, ասաց՝  բա ում պետք է մենք օգնություն ցույց տվել ենք, զոհ չունենք։

Արդեն ուզում էինք վերադառնալ, Սեդրակը ռադիոկապս տեսավ,  չէի տալիս, թե բա՝ պտի տաս, ասի՝ չեմ տալիս, թե բա մենակ կապի միջոցը չի, դու էլ պիտի գաս։ Այդպես սկսեցին բրդբրդել ինձ, ինքնաձիգը պահեցին վրաս։ Բոլորը պահեցին վրաս, հետևիցս ինքնաձիգով հարվածներ էի ստանում գլխիս և մեջքիս, ուսադիրներս պոկեցին, հետագայում տեղեկացա, որ Աշոտն էր։ Իրենք հարվածելով, ես պաշտպանվելով,  5-6 հոգով հարվածում էին, մտանք գունդ։ Անցակետի միջանցքում նկատեցի, որ համակարգիչների առջև աշխատում է Վարուժան Ավետիսյանը, ասացի՝ էս ի՞նչ եք անում, ասացին՝ լավ ենք անում, ռեժիմը մեր կյանքը կերավ։ Հանգստի սենյակում մեր հետ միասին 8 ոստիկաններ կային, ձեռքերները կապած էր։ Ինձ ու պարոն Եղիազարյանին էլ կանդալեցին»,- պատմեց նա՚

Վ. Օսիպյանն ասաց, որ անընդհատ բանակցում էր, իրեն հաջողվել է համոզել իր ու մյուս ոստիկանների ձեռքներն ազատել, համոզել է, որ հեռախոսն իր մոտ թողնեն, քանի որ ինքը դրսի ոստիկանների հետ կապող օղակն էր։

«Ինձ տարան դուրս, բարձրախոս բերեցին տվեցին ձեռքս ու ինքնաձիգն ուղղեցին իմ ուղղությամբ, ասացին՝ կգյուլենք պատի տակ, անմիջապես դիմի ոստիկաններին, թող զենքերը ցած դնեն ու գան միանան մեզ։ Դա տևեց 3-5 րոպե, սպառնալիքը սպառնալիքի հետևից։ Ես բնական է չհրամայեցի, դիմեցի կոչով, որ այս ուղղությամբ չկրակեն, իրենք էլ ձեր ուղղությամբ չեն կրակի։ Բա մենք դա չէինք ուզում, ասի ես դրանից ավելի չեմ ասի»,- դատարանում ասաց նա։

Նա հիշեց, որ այդ ժամանակ իրեն զանգել են դրսից, հարցրել, թե գնդի տարածքում տեսե՞լ է  ոստիկանության գնդապետ Վանոյան Արթուրին։

«Բարձրանալով Վանոյանի աշխատասենյակ, մուտքից պատկերացրեցի՝ ինչ է կատարվել։ Նկատեցի պատի վրա ինքնաձիգի պարկուճներ։ Ինչքան  քայլ էի անում, արյան հետքերն ավելանում էին։ Մոտենալով մուտքին՝ անմիջապես չկարողացա մտնել, ամբողջը արյուն էր։ Հաջողվեց մուտք գործել աշխատասենյակ, թափթփված էր, ամեն ինչ շուռ տված, տեսա կապույտ վերմակը ինչ -որ բանի վրա էր գցած,  երբ որ բարձրացրեցի, տեսա Արթուրն է անգիտակից վիճակում, արդեն մահացած էր։ Դին տեսնելով՝ զայրացած, մի փոքր անկառավարելի դարձա։ Բղավում էի, ասացի՝ էս ի՞նչ եք անում, Պավլիկը թե բա էս ո՞վ ա, ինչ դիակ ա, ո՞վ ա սպանել։ Զայրացա, սկսեցի քաշքշել։ Խնդրում էր հանգստանալ, որևէ մեկին առայժմ չասեմ։ Ասեցի՝  գյուլող տղա եք,  ինձ էլ գյուլեք, պրծեք։ Զանգեցի ու ասացի Վանոյան Արթուրը չկա, ասացին դե լավ ա, որ չկա։ Ես հասկացա, որ իրենք չհասկացան, որ մահացած է։ Նորից զանգեցի, ասացի՝ երևի ինձ ճիշտ չհասկացաք, Վանոյան Արթուրը մահացած է»։

Վ. Օսիպյանը 7 օր մնացել էր ՊՊԾ գնդում։

Հիշեցնենք, որ ՊՊԾ գնդի գրավման գործով «Սասնա Ծռեր» խմբի անդամներից կալանքի տակ շարունակում են մնալ ամբաստանյալներ Արմեն Բիլյանն ու Սմբատ Բարսեղյանը, որոնք մեղադրվում են նաև սպանության մեջ: Մյուսների նկատմամբ ընտրված խափանման միջոց կալանավորումը փոխվել է՝  պատգամավորների անձնական երաշխավորությամբ։ Պավել Մանուկյանն ազատ է արձակվել 1 միլիոն դրամ գրավի դիմաց։