Ձեր վստահելի աղբյուրը

Հայաստանի Ազգային Ֆիլհարմոնիկ նվագախումբը, մինչ 2019թ.-ի առաջին համերգը, անգլիական հեղինակավոր Wright Music Management-ի նախաձեռնությամբ, ձայնագրել է Չայկովսկու թիվ 6 «Պաթետիկական»  և Արամ Խաչատրյանի թիվ 2 մեծակտավ սիմֆոնիաները: Ձայնագրությունը կատարվել է հայտնի շվեդական BIS ընկերության հնչունային ռեժիսոր՝ Յենս Բրաունի կողմից: Նվագախմբից հայտնում են, որ այս սիմֆոնիաները ՀԱՖՆ-ի կատարմամբ կարելի է ունկնդրել փետրվարի 11-ին և 14-ին ծրագրված համերգներին՝ Արամ Խաչատրյան համերգասրահում:

Ինչպես ձայնագրությունների ժամանակ, այնպես էլ համերգներին դիրիժորական վահանակի մոտ է ՀԱՖՆ-ի գեղարվեստական ղեկավար և գլխավոր դիրիժոր, ՀՀ Արվեստի վաստակավոր գործիչ՝ Էդուարդ Թոփչյանը: Երկու համերգներն էլ կտեսագրվեն իսպանական DAKAPP ընկերության կողմից և խմբագրական աշխատանքներից հետո կցուցադրվեն հանրահայտ Medici երաժշտական հեռուստաալիքով:

Չայկովսկու և Խաչատրյանի վերը նշված սիմֆոնիաների ձայնագրությունը և տեսագրությունը մեծ իրադարձություն են ՀԱՖՆ-ի և ողջ հայկական ու համաշխարհային  դասական կատարողական արվեստի համար: Ամբողջ աշխարհում Չայկովսկու 6-րդ սիմֆոնիայի կատարողական վարպետությամբ դատում են նվագախմբի որակի մասին: Արամ Խաչատրյանի 2-րդ սիմֆոնիայի ձայնագրությունը հայկական և համաշխարհային երաժշտական պատմության համար այնքանով է կարևոր, որ երկար տարիների ընդմիջումից հետո այժմ ունենք այս սիմֆոնիայի որակյալ թվային ձայնագրությունը՝ կատարված Հայաստանի Ազգային ֆիլհարմոնիկ նվագախմբի կողմից: Սա նաև կարևոր առիթ է հանրահռչակելու Արամ Խաչատրյանի երաժշտությունը և Հայաստանի դասական կատարողական արվեստը՝ ի դեմս ՀԱՖՆ-ի:  Խաչատրյանի 2-րդ սիմֆոնիան շատ կարևոր տեղ է զբաղեցնում կոմպոզիտորի երաժշտական ժառանգության մեջ: Այն գրվել է Հայրենական Մեծ պատերազմի տարիներին և արտացոլում է այդ բարդ ժամանակաշրջանի մարդկանց խոհերը, ապրումներն ու հաղթանակի հանդեպ հավատը, այն ներծծված է իրական մարդասիրությամբ: Այս ստեղծագործությունը հերոսական և հայրենասիրական  ժանրի վառ օրինակ է: Խաչատրյանը նվագախմբի կազմում ընդգրկել է նաև զանգեր, որի շնորհիվ երաժշտական գրականության մեջ այն անվանում են նաև «Ղողանջներով սիմֆոնիա»:

Փետրվարի 11-ին Չայկովսկու 6-րդ սիմֆոնիայից բացի կհնչեն նաև Չայկովսկու Պեցցո կապրիչոզոն և Ռոկոկո թեմայով վարիացիաները թավջութակի և նվագախմբի համար: Համերգի մենակատարն է թավջութակահարուհի Անաստասիա Կոբեկինան։ 

Փետրվարի 14 –ին  հնչելու է Արամ Խաչատրյանի թիվ 2 սիմֆոնիան և Բրամսի Կրկնակի կոնցերտը ջութակի, թավջութակի և նվագախմբի համար: Մենակատարներն են ջութակահարուհի Անուշ Նիկողոսյանը և թավջութակահարուհի  Անաստասիա Կոբեկինան: