Ձեր վստահելի աղբյուրը

Այսօր վիրահատվել է ապրիլյան պատերազում  ծանր վիրավորված Ավետիս Զարգարյանը: Վիրահատությունը կատարել են «Հերացի» թիվ 1 համալսարանական հիվանդանոցի բժիշկները՝  ԵՊԲՀ  ռեկտոր Արմեն Մուրադյանի գլխավորությամբ:

Համալսարանի աշխատակազմի ղեկավար  Շուշան Դանիելյանը  Panorama.am-ին ասաց, որ էնդոսկոպիկ եղանակով կատարվել է միզապարկի քարերի կոնտակտային քարափշրում և հեռացում: Ըստ նրա՝ վիրահատությունը բարեհաջող է անցել, Ավետիսն արդեն իրեն լավ է զգում:

Նշենք, որ Ավետիսը վիրավորվել է 2016 թվականի ապրիլի 4-ին Թալիշի  մարտական գործողությունների ժամանակ, գնդակը մտել է նրա ծնոտը, թիկունքով ներքև իջել և վնասել մի քանի ողը, ողնուղեղը: Բժիշկները թեև հույս չունեին, որ Ավետիսը կապրի, բայց  համառ պայքարում էին նրան փրկելու համար: Ավելի քան մեկ ամիս միացված էր արհեստական շնչառության ապարատին, մի քանի անգամ վիրահատել են, այդ թվում՝ բազմաբեկորային վիրավորում ստացած ծնոտը, հեռացրել են ողնաշարի գնդակը, վերականգնել բեկորից վնասված ձեռքի ոսկորը:

Նա քանի ամիս մնացել է Զինվորական հոսպիտալում, իսկ 2017 թվականի հունվարին տեղափոխվել էր Մոսկվա, որտեղ երեք ամիս վերականգնողական բուժում էր ստացել: Մոսկվայից վերադառնալուց հետո Ավետիսը մինչ օրս վերականգնողական բուժում է ստանում Հայրենիքի պաշտպանի վերականգնողական կենտրոնում, կամ ինչպես իրենք են ասում՝ Զինվորի տանը:

Ավետիսը Panorama.am-ի հետ զրույցում ասել էր, որ մարտական է տրամադրված և ամեն ինչ անելու է, որ քայլի: «Ուրիշ ձև չի կարող լինել, պետք է քայլեմ, ճիշտ է համառություն, կամքի ուժ է պետք, բայց աշխատում եմ չկոտրվել»,- ասել էր նա: