Ձեր վստահելի աղբյուրը

ԱԺ նախկին պատգամավոր, գեներալ Մանվել Գրիգորյանն այսօր քրեակատարողական հիմնարկից տեղափոխվել է հիվանդանոց: ԱՆ Քրեակատարողական վարչության հանրային կապերի բաժնի պետ Նոնա Նավիկյանից Panorama.am-ը տեղեկացավ, որ  Մանվել Գրիգորյանին տեղափոխել են «Նաիրի» բժշկական կենտրոն՝ հետազոտության:

Հարցին` արդյո՞ք գանգատներ է ունեցել, նա ասաց. «Պարզապես հերթական հետազոտության»։

Մ. Գրիգորյանի պաշտպան Արսեն Մկրտչյանը Panorama.am-ին ասաց, որ ինքը որևէ տեղեկություն չունի՝  իր պաշտպանյալին բժշկական կենտրոն տեղափոխելու վերաբերյալ, նշեց, որ  առավոտյան է հետը հանդիպել, ժամը 11։15-ի դրությամբ չէր տեղափոխվել։

Մ. Գրիգորյանին մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով՝ ապօրինի կերպով ռազմամթերք ձեռք բերելու և այլ անձանց հետ նախնական համաձայնությամբ պահելու համար, ինչպես նաև ՀՀ քրեական օրենսգրքի 179-րդ հոդվածի 3-րդ մասի 1-ին կետով՝ մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակելու համար:

Նա կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել է։