Ձեր վստահելի աղբյուրը

Կառավարության ծրագրի կրթության մասի որոշ հատվածներ ոլորտի փորձագետ Սերոբ Խաչատրյանին նախկին կառավարության ծրագիրն է հիշեցրել։ Panorama.am-ի հետ զրույցում Խաչատրյանը խոսեց այս ծրագրի բացերից ու նորություններից։

«Որոշ բաներ կային, որ նախորդ կառավարության ծրագրից էին գալիս, մասնավորապես նախադպրոցական կրթության ոլորտում ընդգրկվածների թվի ավելացումը։ Թեև այս անգամ թիվը փոխվել է՝ 70 տոկոս ընդգրկվածության ցուցանիշի է հասցվել, այսինքն ավելի բարձր նշաձող է դրվել, բայց այդ կետը նախորդ կառավարությունն էլ անընդհատ կարևորում էր։ Բայց, օրինակ, ես կուզենայի, որ նախադպրոցական կրթության ոլորտում անպայման խոսվեր կառավարման, բովանդակության մասին։ Մենք նախադպրոցական կրթության մեջ խոսում ենք միայն մանկապարտեզի ընդգրկվածության հարցից, բայց շատ կարևոր է, թե ինչ ուսումնական ծրագրեր կան մանկապարտեզներում, կամ նախադպրոցական մանկավարժների վերապատրաստման մասնագիտական զարգացման հարցը քննարկեինք։ Սրանք  կառավարության ծրագրում դեռևս շարունակում են բաց մնալ, միայն մանկապարտեզ գնալը քիչ է, կարևոր է, թե այնտեղ ինչ է տեղի ունենում»,- մանրամասնեց մեր զրուցակիցը։

Ինչ վերաբերում է դպրոցական կրթությանը, Խաչատրյանն ասաց, որ ինչպես նախորդ, այնպես էլ այս կառավության ծրագրերում շեշտված է խթանումը բնագիտությանը, տեխնոլոգիաներին, ինժեներական առարկաներին ու ձեռնարկատիրական կրթությանը։

«Այս անգամ, ի տարբերություն նախորդ կառավարության շեշտադրվում է նաև քննադատական մտածողության դերը, քաղաքացիական կրթությունը։ Ծրագրում նորություններից մեկն այն է, որ դպրոցները փորձ է արվում դիտելու որպես համայնքային կենտրոններ, այսինքն դպրոցը լինի ոչ միայն դաս անելու տեղ, այլ բաց կլինի նաև համայնքի ընդհանուր կրթական ներուժի համար։ Սա իհարկե կարևոր կետ է, բայց սրա համար պետք է լուրջ ներդրումներ արվեն, քանի որ, եթե դպրոցը համայնքային կենտրոն է, բայց ոչ մի ռեսուրս չի դրվում այդ ֆունկցիան իրականացնելու համար, ո՞վ պետք է դա  անի»,- ասաց փորձագետը։

Նրա դիտարկմամբ՝ ծրագրում մնացել է 12-ամյա կրթության չափորոշիչները մշակելը, գաղափարը, որը գալիս է 2016 թվականից։

Սերոբ Խաչատրանի կարծիքով՝ բացերից մեկն էլ այն է, որ ոչինչ չի ասվում ոչ ֆորմալ կրթության մասին, թեև նախարարությունում կա այդպիսի բաժին. «Չենք կարևում ոչ ֆորմալ կրթությունը, այն կրթությունը, որը պետության կողմից պարտադրանք չի ենթադրում և տեղի է ունենում արտադասարանական և այլ ֆորմատներով։ Այսօր մենք կրթության ամբողջ բեռը դնում ենք դպրոցի վրա, այսինքն բանակն ուզում է, որ դպրոցը հայրենասեր դաստիարակի, քաղաքացիական հասարակությունը՝ լավ քաղաքացի, հոգևորականները՝ հավատացյալ, գործատուները մի բան են ուզում, բայց ակնհայտ է, որ դպրոցը չի կարող այդ բոլորն անել, դրա համար շատ կարևոր է այդ ոչ ֆորմալ հարթակները ստեղծել, քանի որ շատ բաներ կրթության ոլորտում պետք է անել դասացուցակից դուրս»։

Այնուամենայնիվ, մեր զրուցակցի կարծիքով, անգամ այն, ինչ գրված է ծրագրում, եթե արվի, կունենանք մի փոքր ավելի լավ համակարգ, բայց ոչ ուժեղ։

Ինչ վերաբերում է դպրոցներում առարկայացանկի վերանայմանը՝ Խաչատրյանն ասաց. «Այս պահին խնդրի հետ կապված լարվածություն կա, բայց պետք է գտնել կոմպրոմիսը, որն էլ պետք է ելնի գիտական տեսանկյունից, դպրոցի ու երեխայի շահերից։ Մենք չպետք է ակադեմիական էգոիստ լինենք և ամեն մեկը փորձի իր առարկան պարտադրել երեխաներին։ Պետք է գտնել, լավագույն ձևը, որպեսզի կարևոր գիտելիք դուրս չթողնենք դպրոցական ծրագրից»։