Քաղաքացիները Փաշինյանին հրավիրում են իրենց մեքենաներով շրջել քաղաքում
Վարչապետ Նիկոլ Փաշինյանի՝ երթևեկության ու վթարների հետևանքով հունվարին զոհերի թվի նվազման հիման վրա արված լավատեսական ու հուսադրող գրառման հետ բազմաթիվ օգտատերեր իրենց անհամաձայնությունը հայտնեցին։
Բանն այն է, որ կառավարության ղեկավարը համեմատել էր այս տարվա հունվարին ու նախորդ տարվա հունվարին ՃՏՊ հետևանքով զոհերի թիվը, նշել էր, այս տարի ավելի քիչ մարդ է զոհվել։
«ՃՏՊ-ների և դրանց հետևանքով վիրավորվածների թվին դասվում են նույնիսկ ամենաթեթև դեպքերը, այնպես որ՝ իմաստ ունի առաջնակի ուշադրություն դարձնել զոհերի թվին:
Եվ այս առումով դինամիկան հուսադրող է»,-գրել էր նա։
Ավելի վաղ ոստիկանության հասարակայնության հետ կապերի և լրատվության վարչության պետ Աշոտ Ահարոնյանը ֆեյսբուքյան իր էջում թվեր էր հրապարակել, ըստ որի. «Նախորդ տարվա հունվարին ճանապարհատրանսպորտային պատահարների հետեւանքով զոհվել է 37 մարդ, իսկ այս տարվա նույն ժամանակահատվածում՝ 21, այսինքն 16-ով պակաս»։
Նա նշել է, որ միաժամանակ ավելացել են հայտնաբերված ոչ սթափ վիճակում գտնվող վարորդների թիվը, ինչպես նաև կազմվել է 4900-ով ավելի վարչական իրավախախտման վերաբերյալ արձանագրություն։
Ոչ թե հուսադրող է, այլ խիստ մտահոգիչ։ Փաշինյանի կարծիքին հակադրվեց Վազգեն Թորոսյանը, ով շահագրգիռ է ու ամեն կերպ պայքարում է հանուն կանոնակարգված երթևեկության։ Նա իր կարծիքը թողել է նաև գրառման ներքո։
«Ընդհանրապես հուսադրող չի, պարոն վարչապետ: Տեսեք, դուք միայն հունվար ամսվանն եք նայում: Եկեք՝ տարվա կտրվածքով նայենք: 2018-ին ունեցել ենք մահվան ելքով 220 վթար: Իսկ 2017-ին այդ թիվը 176 էր: Դա զոհերով վթարների քանակն է: Բայց քանի որ ամեն վթարի ժամանակ կարող է մեկից ավելի մարդ զոհվել՝ նայեցի կոնկրտ զոհերի քանակին: Ուրեմն 2016-ին ունեցել ենք 267 զոհ: 2017-ին՝ 279, իսկ 2018-ին ունեցել ենք 343 զոհ: Դինամիկան առավել քան մտահոգիչ է»,-Panorama.am-ի հետ զրույցում կրկնեց գրառման ներքո թողած մեկնաբանությունը։
Որ վթարների թիվն ավելացել է, փաստում են նաև ԱՊՊԱ-ի վերաբերյալ թվերը։ Վազգեն Թորոսյանի ներկայացրած տվյալների համաձայն, մեքենաների թիվը ըստ ԱՊՊԱ պայմանագրերի քանակի աճել է ընդամենը 2.1 տոկոսով: Իսկ վթարների դինամիկան(նույն ԱՊՊԱ բազայով) հետևյալն է եղել.
2018թ 1-ին եռամսյակում՝ 2017-ի 1-ին եռամսյակի համեմատ 8 տոկոս նվազում(ինչը պայմանավորված է փողոցների փակ լինելու հետևանքով երթևեկության պասիվացմամբ)
2018թ 2-րդ եռամսյակում՝ 31 տոկոս աճ
2018թ 3-րդ եռամսյակում՝ 25 տոկոս աճ
2018թ 4-րդ եռամսյակում՝ 14 տոկոս աճ։
Նա ընդգծում է, եթե օր լինի, որ վթար չլինի, դա չի նշանակում, որ ամեն ինչ լավ է ու էլ վթարներ չեն լինելու։
«Ես հույս ունեի, որ վարչապետն էլ կանհանգստանար ու կոչ կաներ, որ այդպես չվարեն։ Բայց հակառակը եղավ, որովհետև բարեբախտաբար հունվարին զոհերը քիչ եղան։ Ես շատ կուզեմ, որ 2019-ի ընթացքում ընդհանրապես զոհեր չլինեն, բայց դինամիկան հասկանալու համար մի ամսվա կտրվածքով համեմատություն չեն անում»,-ասաց Վազգեն Թորոսյանը։
Նորմալ երթևեկության հաստատման գործում հետևողական քայլեր ձեռնարկող, ՃՈ-ի հետ հաճախ շփման մեջ գտնվող քաղաքացի Սերգեյ Ղահրամանյանն էլ համամիտ չէ հնչեցված գնահատակին, նշում է, որ կարևոր մի քանի փաստեր հաշվի չեն առնվել։ Նա ընդգծում է, որ հունվարին շատ քաղաքացիներ իրենց մեքենաներով հանրապետությունից բացակայել են, բացի այդ մի պահ մոդայիկ էր դարձել պետհամարանիշները փակելը, տեսախցիկներ վնասելու դեպքեր էին եղել։
Հաջորդ անհամաձայնությունը թեթև վնասվածքների մասով է, Ղահրամանյանի խոսքով, թեթև վնասվածքներ ստացածները չեն էլ դիմում բուժօգնություն ստանալու համար, հաճախ չեն էլ ընդգրկվում վիճակագրության մեջ։ Բացի այդ, նա ուշադրություն է հրավիրում փաստին, որ 2018-ի հունվարին 2017-ի հունվարի համեմատ զոհերի թիվը մոտ 200 տոկոսով ավելի մեծ է եղել։
«Պարոն Փաշինյան բայց միայն զոհերի քանակով երթևեկության վիճակը չեն գնահատում, հրավիրում եմ Ձեզ իմ մեքենայով շրջենք ու տեսնեք իրական իրավիճակը փողոցներում, Ձեզ սխալ տեղեկություն են տալիս։ Դինամիկան մտահոգիչ է։ Եթե համաձայնի պարոն վարչապետը, պատկերը տեսնելուց հետո հոգոց կհանի։ Կառավարական մեքենայի մեջ նրանք շատ բան չեն տեսնում։ Ես մի դեպք գիտեմ, որ նախորդ տարի կառավարական մեքենան մնացել է խցանման մեջ, նույնիսկ նրան չեն զիջել»,-նշեց Ղահրամյանը։
Ի դեպ, նա կարծում է, որ վատ երթևեկության պատճառն են նաև Փաշինյանի՝ բողոքի ակցիաների օրերին արած հայտարարությունները, ինչպես նաև վարչական համաներումը։ «Նրանք ներքին համոզմունք ունեն, որ կրկին համաներում է լինելու։ Հիմա տեսեք, տուգանված տաքսիստները պահանջում են քաղաքապետի հրաժարականը, որ իրենց նոր տուգանքները չեն ներում, հայտարարում են՝ բա մենք սրա՞ համար էինք պայքարել»,-նշում է նա՝ կոչ անելով իրավիճակի բարելավման համար ձեռնամուխ լինել խնդիրների համակարգային լուծմանը։
Փաշինյանի գրառման ներքո արված մեկնաբանություններից մի քանիսը ներկայացնում ենք առանց խմբագրման.
« Պարոն վարչապետ, կխնդրեի՝ մի 2 օր Շահ Աբասի նման դուրս գաք փողոց ու mystery drive անեք։ Հենց դա անեք, ամեն ինչն իր տեղը կընկնի։ Լավ կլինի՝ պարոն Օսիպյանի հետ միասին դա իրագործեք»։
«Ման արի, տես էլ որ բնագավառում կա առաջխաղացում դրանից էլ խոսա, խի չես ասում որ պետության պարտքը լավ տեմպերով աճումա, հայերը արտագաղթում այլ ազգեր են ներգաղթում, գողությունների քանակը կրկնապատկվել է, բոլոր երկիրը թալանածները իրենց գողացածը ազատ վայելում են(դրա հետ վարչապետը կապ չունի), թե չէ պատահարներից մի հոգի պակաս է մահացել, երեկ թատրոնում էինք, կիրակի խաշ ուտելու.....»։
«Ինչ կապ ունի դա, եթե նախորդ տարվա հունվարի համեմատ այս տարվա հունվարին վարորդները խայտառակ կանոնները խախտելով մեքենա են վարում ։
Կրթական համակարգի սայլն էլ կանգնած է նույն ճահճի մեջ ...
Իսկ հասարակական տրանսպորտով տեղաշարժվելն էլ հատկապես 18:00-19:00 խայտառակ անտանելի է, դրա մասին չեմ խոսում, այստեղ էլ է սայլը մնացել ճահճում»
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
