Ձեր վստահելի աղբյուրը

Լոնդոնի «Արսենալի» գլխավոր մարզիչ Ունայ Էմերին հայտարարել է, որ իր թիմի համար ընթացիկ մրցաշրջանում բարդ է մրցակցել մրցաշարային աղյուսակի առաջին երեք հորիզոնականներն զբաղեցնող թիմերի հետ` Պրեմիեր լիգայի չեմպիոնի կոչման պայքարում:

«Իհարկե, կան թիմեր, որոնք մեզանից լավն են: Պետք է խոստովանեմ, որ առաջին քառյակում տեղ գտնելու համար մենք հետնապահ ենք: Հիմա «Արսենալը» 6-րդն է, սա է իրականությունը: Դեռ հավատում ենք, որ մրցաշրջանը կարող ենք ավարտել լավագույն քառյակում, բայց, միևնույն ժամանակ, հասկանում ենք, որ խնդիրը բարդ է:

Մեր և առաջատար եռյակի` «Մանչեսթեր Սիթիի», «Լիվերպուլի» և «Տոտենհեմի» միջև միավորների տարբերությունը շատ մեծ է: Ինչ վերաբերում է «Չելսիին» և «Մանչեսթեր Յունայթեդին», մենք կարող ենք նրանց հետ պայքար մղել»,- ասել է Էմերին:

Հիշեցնենք, որ Պրեմիեր լիգայի 26-րդ տուրի շրջանակներում այսօր «զինագործներն» արտագնա խաղում ուժերը կչափեն «Հադերսֆիլդի» հետ: Սպասվում է, որ Հայաստանի ֆուտբոլի ազգային հավաքականի ավագ Հենրիխ Մխիթարյանւ տևական դադարից հետո կարող է խաղադաշտ վերադառնալ: