Ձեր վստահելի աղբյուրը

Հանրային  հեռուստառադիոընկերության խորհրդում թափուր տեղ է  առաջանալու՝ լրանում է նախագահ Ռուբեն Ջաղինյանի ժամկետը։ Խոսքի ազատության պաշտպանության կոմիտեի նախագահ Աշոտ Մելիքյանը լրագրողների հետ հանդիպմանը տեղեկացրեց, որ Հեռուստատեսության և ռադիոյի ազգային հանձնաժողովն ամռանը գործընթաց էր սկսել, որպեսզի այդ տեղի համար մրցույթ անցկացնելու նպատակով մրցութային հանձնաժողով ստեղծելիս ներգրավեն և պետական մարմինների, և ՀԿ ներկայացուցիչների։ Ստեղծվել է   մրցութային հանձնաժողով, այն գործելու է վեց տարի ժամկետով, և երբ թափուր տեղեր առաջանան Հանրային  հեռուստառադիոընկերության խորհրդում, կանցկացնի մրցույթներ։

«Այդ հանձնաժողովի կազմավորման փուլում որոշակի խնդիրներ առաջացան, որոնք մեզ լուրջ մտահոգում են։ Լրագրողական կազմակերպությունների կողմից կոնսենսուսի միջոցով ընտրվեց Լևոն Բարսեղյանը՝ որպես մրցութային հանձնաժողովի անդամ։ Մյուս թեկնածուն պետք է լիներ ստեղծագործական միությունների կողմից, այդ թվում նաև Ժուռնալիստների միության։

Այստեղ սկսվում է  ամենահետաքրքիրը։  Մամուլում հրապարակվեցին լուրեր, նյութեր, որտեղ նշվում էր, որ մի շարք ստեղծագործական միությունների ղեկավարներ առհասարակ տեղյակ չեն եղել այդ գործընթացից»,- ասաց Ա. Մելիքյանը։

Նրա ներկայացմամբ՝ Ժուռնալիստների միության նախագահ Սաթիկ Սեյրանյանը հոդվածում ասում է, որ բոլորի հետ խոսել է, ունի նույնիսկ ստորագրություններ, հոդվածի հեղինակն ասում է, որ զրուցել է ստեղծագործական բոլոր միությունների նախագահների հետ, ունի զրույցների ձայնագրությունները։

«Այստեղ հետաքրքիր բան է  ստացվում, կամ իսկապես ստեղծագործական միությունների ղեկավարները տեղյակ չեն եղել, ինչն անընդունելի է և հնարավոր չէ հանդուրժել, կամ էլ ստացվում է, եթե այդ ստորագրություններն ունի Սաթիկ Սեյրանյանն, այդ դեպքում ինչպես են ստեղծագործական միությունների  ղեկավարները մեկնաբանելու այն, որ կա իրենց ասածի ձայնագրությունը և այդ ստորագրությունները։ Տարօրինակ իրավիճակ է։ Իհարկե, պետք է հանգուցալուծի  Հեռուստատեսության և ռադիոյի հանձնաժողովը»,- ասաց նա։

Ասուլիսին ներկա  Երևանի մամուլի ակումբի նախագահ Բորիս  Նավասարդյանի խոսքով, Հեռուստատեսության և ռադիոյի հանձնաժողովը լիիրավ իրավունք ուներ ձևավորել այդ մրցութային հանձնաժողովն առանց որևէ մեկի հետ խորհրդակցելու, բայց ամռանը դրական գործընթաց տեղի ունեցավ։ Նա նշեց, որ ՀՌԱՀ-ից ստացել էին գրություն, կոնկրետ ստեղծագործական միությունների մասին ասված էր, որ դիմել էին միություններին թեկնածու առաջարկելու խնդրանքով։

«Մեզ համար ընդունելի էր միայն այս տարբերակը, այլապես այս գործի մեջ չէինք մտնի։ Վերջին ամիսներին ՀՌՀ-ն ինչ-որ մի այլ դիրքորոշում է ընդունել, թե՝ «օրենքով մեր  պարտականությունն է, լիազորությունն է, այն իմաստով, որ ում նպատակահարմար  կգտնենք,  նրան էլ կնշանակենք»։ Եթե այդպես է՝ ինչո՞ւ էին մեզ առաջարկել, մենք չէինք մասնակից այդ գործընթացի ձևական պրոցեսներում»,- ասաց Բ. Նավասարդյանը։

Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը, ով արդեն ՀՌԱՀ-ի որոշմամբ այդ մրցութային հանձնաժողովի անդամ է, ասաց,  որ ստեղծագործական յոթ միությունների նախագահներից որևէ մեկի չի հաստատել, որ իրենք տեղյակ են եղել թեկնածու առաջադրելու հնարավորությունց, Սաթիկ Սեյրանյանն ասում է, որ իր թեկնածությունը միություններն են առաջարկել։

«Դրանից հետո ես հարցում եմ ուղարկել հանձնաժողովի նախագահ Տիգրան Հակոբյանին՝ ի՞նչ իրավական հիմքով է Սաթիկ Սեյրանյանը նշանակվել մրցութային հանձնաժողովի անդամ։ Պատասխանն ընդհանրական է, մեջբերվում է Հեռուստատեսության և ռադիոյի մասին օրենքի 29-րդ հոդվածը, որով այդ հանձնաժողովն իրավունք ունի ձևավորելու մրցութային հանձնաժողովը։
Պատասխանի մեջ չի հասկացվում՝ ունեն այդ հիմքերը, թե չունեն։

Լուրջ մտահոգություն է, իսկապես չենք ուզենա մասնակցել մի այնպիսի պրոցեսի, որ սկզբում խոստացվում է  որպես բաց հրապարակային, բարի կամքի ազնվանական պայմանավորվածության վրա ձեռք բերված սկզբունք, հիմա տեսնում ենք, որ տարօրինակ  հակասություններ կան. յոթ միությունների նախագահները տեղյակ չէին, տեղյակ է եղել Ժուռնալիստների միության նախագահը, ասում է, որ գոնե ունեցել է երկուսից աջակցական նամակ կամ հավաստումը»,- մանրամասնեց Լ. Բարսեղյանը։

Բորիս Նավասարդյանի կարծիքով, ամեն դեպքում այս ամբողջ գործընթացի համար պատասխանատվությունը Հեռուստատեսության և ռադիոյի հանձնաժողովինն է, եղել է լրատվամիջոցումներում հրապարկում, այսօր այս ասուլիսն է, կցանկանար, որ սա ուղղակի որպես դիմում, հորդոր ընկալվեր ՀՌՀ-ի համար, որպեսզի իրենք պարզաբանումներ մտցնեն, գործընթացը մինչև մրցույթները  տեղափոխեն  նորմալ, առողջ և ազնիվ դաշտ։

«Որոշ չափով պաշտոնական նամակների փոխանակում է  եղել, որը ենթադրում է, որ մենք այդ գործընթացում կանք։ Եթե կանք, ուրեմն մինչև վերջ պետք է համոզված լինենք, որ ամեն ինչ և ըստ օրենքի, ըստ պայմանավորվածությունների են տեղի ունենում։ Եթե այդպես չէ, բնականաբար, մեզ մոտ կասկածներ է առաջացնելու նաև մրցույթի  արդյունքները։ Բնականաբար, չենք լռելու»,- ասաց նա։

Բ. Նավասարդյանի խոսքով, սկիզբը լավ էր, դրական էին համարում ՀՌԱՀ-ի  այդ նախաձեռնությունը՝ գործընթացը դարձնել ներառական։

«Բայց հետագա զարգացումները ...Առաջին սիգնալը մենք ստացել էինք դեռ մի քանի ամիս առաջ, որ այնպես չէ ամեն ինչ տեղի ունենում, ինչպես մենք պատկերացնում էինք»,- ասաց Երևանի մամուլի ակումբի նախագահը։